គ.ជ.ប​នឹង​ប្រកាស​លទ្ធផល​បោះឆ្នោត​បណ្ដោះអាសន្ន​នៅ​ថ្ងៃ​ទី​១២ សីហា

ស្រប​ពេល​ដែល​ការ​បង្កើត​គណៈកម្មការ​ចម្រុះ​សម្រាប់​ស៊ើបអង្កេត​ភាព​មិន​ប្រក្រតី​ក្នុង​ការ​បោះឆ្នោត មិន​ទាន់​កើត​មាន គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) គ្រោង​ប្រកាស​លទ្ធផល​បណ្ដោះអាសន្ន ស្ដីពី​ការ​បោះឆ្នោត​ជ្រើសតាំង​តំណាងរាស្ត្រ​សម្រាប់​នីតិកាល​ទី​៥ នៅ​ព្រឹក​ថ្ងៃ​ទី​១២ ខែ​សីហា ឆ្នាំ​២០១៣ នេះ។

0:00 / 0:00

មន្ត្រី​គណៈកម្មាធិការ​ជាតិ​រៀបចំ​ការ​បោះឆ្នោត ហៅ​កាត់​ថា គ.ជ.ប ឱ្យ​ដឹង​ថា ទោះ​ជា​ការ​បង្កើត​គណៈកម្មការ​ចំពោះ​កិច្ច​ចម្រុះ សម្រាប់​ស៊ើបអង្កេត​ភាព​មិន​ប្រក្រតី​ក្នុង​ការ​បោះឆ្នោត នៅ​ខ្វែង​គំនិត​គ្នា​មិន​អាច​បង្កើត​ទៅ​រួច​ក្ដី ក៏ គ.ជ.ប នឹង​ប្រកាស​លទ្ធផល​បោះឆ្នោត​ជ្រើសតាំង​តំណាងរាស្ត្រ​ សម្រាប់​នីតិកាល​ទី​៥ នៅ​វេលា​ម៉ោង ៩​ព្រឹក ថ្ងៃ​ទី​១២ ខែ​សីហា ឆ្នាំ​២០១៣។

អគ្គលេខាធិការ គ.ជ.ប លោក ទេព នីថា មាន​ប្រសាសន៍​បញ្ជាក់​នៅ​ល្ងាច​ថ្ងៃ​ទី​១១ សីហា ថា ការ​ប្រកាស​លទ្ធផល​នេះ នឹង​ធ្វើ​ឡើង​តាម​រយៈ​ការ​ផ្សាយ​របស់​ទូរទស្សន៍​ជាតិ​កម្ពុជា វិទ្យុ​ជាតិ អេហ្វ.អឹម (FM) 96 MHz និង​វិទ្យុ​វត្ត​ភ្នំ FM 105.70 MHz។

លោក ទេព នីថា មាន​ប្រសាសន៍​ថា បន្ទាប់​ពី​ពិនិត្យ​ផ្ទៀងផ្ទាត់​ហ្មត់ចត់​លើ​របាយការណ៍​ករណី​ភាព​មិន​ប្រក្រតី​រួច​មក គ.ជ.ប សន្និដ្ឋាន​ថា បញ្ហា​ទាំង​នោះ​អាច​កើត​មាន​ឡើង​មែន ទាំង​ការ​ការ​រំខាន និង​ជះ​ឥទ្ធិពល​ដល់​អ្នក​បោះឆ្នោត ការ​បោះឆ្នោត និង​រាប់​សន្លឹក​ឆ្នោត​ក្នុង​កម្រិត​ណា​មួយ។ ក៏​ប៉ុន្តែ លោក​ថា​មិន​ផល​ប៉ះពាល់​អ្វី​ធ្ងន់ធ្ងរ​ដល់​លទ្ធផល​បោះឆ្នោត​ទេ។

លោក ទេព នីថា៖ «មាន​ភាព​មិន​ប្រក្រតី​មួយ​ចំនួន តែ​វា​មិន​មាន​សភាព​ធ្ងន់ធ្ងរ​ដែល​នាំ​ឱ្យ​ប៉ះពាល់​ទេ។ អ៊ីចឹង​បាន​ គ.ជ.ប សម្រេច​ថា ករណី​ហ្នឹង​គឺ​យើង​បាន​ត្រួត​ពិនិត្យ​ហើយ យើង​ទុក​ឯកសារ​ហ្នឹង​មួយ​ចំនួន ដែល​យើង​រក​ឃើញ​ហ្នឹង អាច​ថា​ជា​ឯកសារ​មេរៀន​ពិសោធន៍​សម្រាប់​ការ​បោះឆ្នោត​ទៅ​ថ្ងៃ​ក្រោយ ហើយ​អ្វី​ដែល​មិន​ប្រក្រតី​នេះ ត្រូវ​បាន​ប្ដឹង ហើយ​ត្រូវ​បាន​ដោះស្រាយ​មួយ​ចំនួន​ធំ​ហើយ​នៅ​ក្នុង​ការ​ប្ដឹង​ជា​ផ្លូវ​ការ ដែល​គេ​បាន​ធ្វើ​មក ហើយ គ.ជ.ប សម្រេច​នឹង​ប្រកាស​លទ្ធផល​ជា​បណ្ដោះអាសន្ន»

លោក​ថ្លែង​ថា ការ​សម្រេច​ប្រកាស​លទ្ធផល​បណ្ដោះអាសន្ន​នេះ គឺ​បន្ទាប់​ពី​អនុ​កម្មការ គ.ជ.ប បាន​ត្រួត​ពិនិត្យ និង​ផ្ទៀងផ្ទាត់​លើ​របាយការណ៍​ស្ដីពី​ភាព​មិន​ប្រក្រតី​ពាក់ព័ន្ធ​នឹង​ការ​បោះឆ្នោត​ ដែល​ដាក់​ដោយ​ភាគី​នានា​រួច​ហើយ ដោយ​មិន​អាច​រង់​ចាំ​ដំណោះស្រាយ​ពី​ការ​ជាប់​គាំង​រឿង​បង្កើត​គណៈកម្មការ​ចំពោះ​កិច្ច​ចម្រុះ​នោះ​បាន​ទេ។

ដោយ​ឡែក អ្នក​នាំ​ពាក្យ​គណបក្ស​សង្គ្រោះ​ជាតិ គឺ​លោក យឹម សុវណ្ណ ថ្លែង​នៅ​ល្ងាច​ថ្ងៃ​ទី​១១ សីហា​ដដែល​ថា គណបក្ស​សង្គ្រោះ​ជាតិ​នៅ​តែ​ទាមទារ​ឱ្យ​បង្កើត​គណៈកម្មការ​ចំពោះ​កិច្ច មាន​សមាសភាព​ចម្រុះ ដើម្បី​ស៊ើបអង្កេត​ភាព​មិន​ប្រក្រតី​ជា​មុន​សិន​មុន​នឹង​ប្រកាស​លទ្ធផល​បោះឆ្នោត។

លោក យឹម សុវណ្ណ៖ «គណបក្ស​សង្គ្រោះ​ជាតិ​នៅ​តែ​រក្សា​ជំហរ​ដដែល បើ​មិន​ដោះស្រាយ​ភាព​មិន​ប្រក្រតី ដែល​យើង​បាន​ដាក់​ជូន​ទៅ គ.ជ.ប ឱ្យ​ដោះស្រាយ​ទេ គឺ​យើង​មិន​ទទួល​ស្គាល់​លទ្ធផល​នៃ​ការ​បោះឆ្នោត​ទេ។ ឥឡូវ​នេះ យើង​នៅ​តែ​ជំរុញ​ឱ្យ​មាន​គណៈកម្មការ​ពិសេស ដើម្បី​ដោះស្រាយ​បញ្ហា​នេះ។ យើង​មិន​អាច​ទុក​ចោល​អំពើ​អយុត្តិធម៌ ភាព​មិន​ប្រក្រតី ចេះ​តែ​កើត​មាន​ឡើង​រៀង​រាល់​ការ​បោះឆ្នោត​ម្ដងៗ គឺ​យើង​ត្រូវ​តែ​ប្ដេជ្ញា​ចិត្ត​បញ្ចប់​បញ្ហា​ហ្នឹង​នៅ​ពេល​នេះ គឺ​យើង​មិន​អាច​ទទួល​យក​លទ្ធផល​ដែល​ពោរពេញ​ទៅ​ដោយ​ភាព​មិន​ប្រក្រតី និង​ប្រជាពលរដ្ឋ​មិន​បាន​ទៅ​បោះឆ្នោត​ដ៏​ច្រើន​លើសលប់​នោះ​ទេ​បាទ!»

លោក ទេព នីថា បញ្ជាក់​ទៀត​ថា ពាក្យ​បណ្ដឹង​របស់​គណបក្ស​សង្គ្រោះ​ជាតិ ដែល​ដាក់​មក​ គ.ជ.ប មិន​មាន​ឯកសារ​ភស្តុតាង​មក​ជា​មួយ​ទេ។ ទាក់ទង​នឹង​បញ្ហា​នេះ លោក យឹម សុវណ្ណ ឆ្លើយ​តប​ថា ភស្តុតាង​ទាំង​នោះ​នឹង​មាន​នៅ​ពេល​ណា​​​​គណៈកម្មការ​ចំពោះ​កិច្ច​ចម្រុះ​មួយ​ត្រូវ​បាន​បង្កើត​ឡើង។ ​ក្នុង​ពេល​ដែល​មិន​ទាន់​ទទួល​ស្គាល់​លទ្ធផល​នៅ​ពេល​នេះ​ដែរ លោក យឹម សុវណ្ណ បញ្ជាក់​ថា នឹង​មិន​មាន​ការ​ធ្វើ​បាតុកម្ម​នៅ​ឡើយ​ទេ ពី​ព្រោះ​គណបក្ស​នៅ​សល់​ពេល​វេលា​សម្រាប់​ដោះស្រាយ​បញ្ហា​នេះ​ដោយ​សន្តិវិធី៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។