លេខាធិការគណៈកម្មការរៀបចំការបោះឆ្នោតខេត្តបាត់ដំបង អះអាងថា មន្ត្រីជាប់កិច្ចសន្យាសម្រាប់បម្រើការងារចុះឈ្មោះបោះឆ្នោតជាច្រើននាក់ដែលត្រូវបានជ្រើសរើស គឺជាបុគ្គលិកចាស់។ លោកបញ្ជាក់ថា ការជ្រើសរើសនេះ ធ្វើឡើងទៅតាមរយៈការប្រឡងដោយមានការត្រួតពិនិត្យត្រឹមត្រូវ។ មន្ត្រីអង្គការសង្គមស៊ីវិលកត់សម្គាល់ថា ការជ្រើសរើសនេះ ធ្វើឡើងដោយខ្វះការផ្សព្វផ្សាយព័ត៌មានឲ្យបានទូលំទូលាយ។
លេខាធិការគណៈកម្មការរៀបចំការបោះឆ្នោតខេត្តបាត់ដំបង លោក វន ពន ប្រាប់អាស៊ីសេរី នៅទីស្នាក់ការរៀបចំការបោះឆ្នោតខេត្ត នៅព្រឹកថ្ងៃទី១៨ សីហា ថា លោកបានត្រៀមបុគ្គលិករួចជាស្រេចហើយ ដើម្បីបម្រើការចុះឈ្មោះបោះឆ្នោតនៅតាមឃុំ-សង្កាត់ក្នុងខេត្តបាត់ដំបង។ លោកអះអាងថា បុគ្គលិកជាប់កិច្ចសន្យាសម្រាប់ចុះឈ្មោះបោះឆ្នោត តំណែងប្រធាន និងជំនួយការប្រធាន ធ្វើឡើងតាមរយៈការប្រឡង។ ចំណែកឯមន្ត្រីផ្នែកកុំព្យូទ័រ ធ្វើឡើងតាមរយៈការធ្វើតេស្ដដោយការប្រើប្រាស់កុំព្យូទ័រ។
លោក វន ពន បញ្ជាក់ថា ការជ្រើសរើសនេះមានមន្ត្រីចាស់ដែលធ្លាប់ធ្វើការបោះឆ្នោតនាពេលកន្លងទៅជាច្រើននាក់ ត្រូវបានជ្រើសរើស ប៉ុន្តែលោកពុំបានបញ្ជាក់ថា មានមន្ត្រីចាស់ចំនួនប៉ុន្មាននាក់នោះទេ៖ « នៅពេលប្រឡងថ្នាក់ជាតិក៏បានចុះមក ហើយថ្នាក់ខេត្តក៏បានចុះទៅ។ ហើយអនុរក្សនៃការប្រឡងមានគ្រូប្រចាំស្រុកក្នុងមួយស្រុកចំនួន ៣នាក់ និងមានក្រុមប្រឹក្សាឃុំ - សង្កាត់គ្រប់គណបក្សនយោបាយបានចូលរួមសង្កេតការណ៍ »។
ទាក់ទងនឹងបញ្ហានេះ ប្រធានប្រតិបត្តិគណបក្សសង្គ្រោះជាតិ ខេត្តបាត់ដំបង លោក ជា ជីវ មានប្រសាសន៍ថា លោកពុំមានការបារម្ភអំពីមន្ត្រីជាប់កិច្ចសន្យាជាបុគ្គលិកចាស់ ដែលធ្លាប់ធ្វើការងាររៀបចំការបោះឆ្នោតនោះទេ៖ « សំខាន់គឺឯកសារដែលពលរដ្ឋត្រូវយកចុះឈ្មោះ ដែលមន្ត្រីក្រសួងមហាផ្ទៃ ត្រូវពន្លឿនធ្វើជូនប្រជាពលរដ្ឋឲ្យបានគ្រប់គ្នា »។
ទោះបីជាយ៉ាងនេះក្ដី មន្ត្រីផ្នែកស៊ើបអង្កេត និងតស៊ូមតិអង្គការខុមហ្វ្រែល (COMFREL) លោក ស៊ិន ទិតសីហា បញ្ជាក់ថា គណៈកម្មការរៀបចំការបោះឆ្នោតជ្រើសរើសមន្ត្រីជាប់កិច្ចសន្យានេះ ធ្វើឡើងដោយពុំបានផ្សព្វផ្សាយព័ត៌មានឲ្យសាធារណជន ជាពិសេសអ្នកមានជំនាញខាងបច្ចេកវិទ្យាបានដឹងឲ្យបានទូលំទូលាយនោះទេ។ ទោះបីជាយ៉ាងណា លោកពុំទាន់ដឹងថា ការជ្រើសរើសមន្ត្រីដែលធ្លាប់បម្រើការងាររៀបចំការបោះឆ្នោត ជាប់ជាមន្ត្រីកិច្ចសន្យាចុះឈ្មោះបោះឆ្នោត មានផលល្អ ឬផលអាក្រក់យ៉ាងណានៅឡើយ។ លោកអះអាងថា អង្គការខុមហ្វ្រែល នឹងតាមដានលើការងារនេះបន្តទៀត៖ « ខាងខុមហ្វ្រែល មានគម្រោងពីរ។ ទីមួយ មានគម្រោងអង្កេតដំណើរការឈ្មោះ នៅពេលគេផលិតជាបញ្ជី យើងនឹងធ្វើសវនកម្មទៅលើបញ្ជីឈ្មោះនោះ ទើបយើងអាចវាយតម្លៃបានថា ដំណើរទៅជាយ៉ាងណា ? ដែលមានមន្ត្រីចាស់បម្រើការនោះយើងរកឃើញយ៉ាងម៉េច ទើបអាចវាយតម្លៃបាន »។
ឧបករណ៍ចុះឈ្មោះបោះឆ្នោតជាច្រើនមុខ ត្រូវបានគេដាក់តម្រៀបជាពំនូកគរដូចភ្នំនៅទីស្នាក់ការរៀបចំការបោះឆ្នោតខេត្តបាត់ដំបង។
លោក វន ពន បញ្ជាក់ថា បុគ្គលិកជាប់កិច្ចសន្យាដែលបានជ្រើសរើសនៅខេត្តបាត់ដំបង សរុបចំនួន ៤៣០នាក់ ក្នុងនោះមន្ត្រីផ្នែកកុំព្យូទ័រចំនួន ១៦៤នាក់ ប្រធាន និងអនុប្រធាននៅឃុំ-សង្កាត់ចំនួន ២០៤នាក់ និងជំនួយការអនុប្រធាន ៦២នាក់។ របាយការណ៍លេខាធិការគណៈកម្មការរៀបចំការបោះឆ្នោតខេត្តបាត់ដំបង ឲ្យដឹងថា នៅខេត្តនេះមានចំនួន ១០២ឃុំ-សង្កាត់ និងមានប្រជាពលរដ្ឋអាយុចាប់ពី ១៨ឆ្នាំឡើងទៅចំនួនជាង ៧សែន ៨ម៉ឺននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។