សមាជិកក្រុមប្រឹក្សាខេត្តកំពង់ឆ្នាំង មកពីគណបក្ស សម រង្ស៊ី និងជាតំណាងឲ្យគណបក្សសង្គ្រោះជាតិ ប្រចាំខេត្តនេះ ប្រតិកម្មចំពោះអាជ្ញាធរខេត្តដែលមិនព្រមអនុញ្ញាតឲ្យអ្នកតំណាងរាស្ត្រគណបក្ស សម រង្ស៊ី ជួបសំណេះសំណាលជាមួយប្រជាពលរដ្ឋក្នុងខេត្តនេះ។
លោក ដួង ចិន្ត្រា ជាសមាជិកក្រុមប្រឹក្សាខេត្តកំពង់ឆ្នាំង គណបក្ស សម រង្ស៊ី លោកបានឲ្យដឹងនៅព្រឹកថ្ងៃទី១ ខែមីនា ថា អ្នកតំណាងរាស្ត្រគណបក្ស សម រង្ស៊ី និងគណបក្ស សិទ្ធិមនុស្ស មានកម្មវិធីចុះសំណេះសំណាលជាមួយប្រជាពលរដ្ឋនៅតំបន់មួយចំនួនក្នុងខេត្តនេះ។ ប៉ុន្តែ អាជ្ញាធរខេត្តបានចេញលិខិតហាមមិនឲ្យប្រារព្ធពិធីសំណេះសំណាលនេះទេ។
លោក ដួង ចិន្ត្រា៖ «ការចុះជួបជាមួយប្រជាពលរដ្ឋរបស់អ្នកតំណាងរាស្ត្រ មិនមែនជាការឃោសនាទេ តែគឺជាភារកិច្ចរបស់អ្នកតំណាងរាស្ត្រត្រូវធ្វើ។ ប៉ុន្តែជាអកុសល ដែលអាជ្ញាធរខេត្តកំពង់ឆ្នាំង បែរជាហាមឃាត់តំណាងរាស្ត្រមិនឲ្យជួបប្រជាពលរដ្ឋទៅវិញ»។
ប៉ុន្តែ អភិបាលរងខេត្តកំពង់ឆ្នាំង គឺលោក ចេង ញ៉ាន់ បានពន្យល់ចំពោះការហាមឃាត់នេះថា ដោយពេលនេះមិនទាន់ដល់ដំណាក់កាលឃោសនាបោះឆ្នោត ដូច្នេះគណបក្សសង្គ្រោះជាតិ មិនអាចធ្វើការឃោសនាបានទេ។ ឯការជួបសំណេះសំណាលជាមួយប្រជាពលរដ្ឋនោះ ក៏មិនអាចធ្វើបានដែរ ព្រោះគណបក្សនេះមិនទាន់មានអ្នកតំណាងរាស្ត្រនៅឡើយ។
លោកថា គណបក្សសង្គ្រោះជាតិ អាចប្រារព្ធពិធីសំណេះសំណាលក្នុងទីស្នាក់ការគណបក្សបាន តែមិនអាចធ្វើនៅទីសាធារណៈបានទេ ក្នុងដំណាក់កាលបច្ចុប្បន្ន៖ «គាត់សុំក្នុងនាមគណបក្សសង្គ្រោះជាតិ ហើយគណបក្សនេះមិនទាន់មានអ្នកតំណាងរាស្ត្រទេ។ ប៉ុន្តែ បើសិនជាគាត់សុំក្នុងនាមអ្នកតំណាងរាស្ត្រនោះ អាជ្ញាធរមិនហាមឃាត់ទេ។ ម្យ៉ាង បើគាត់ធ្វើក្នុងស្នាក់ការគណបក្ស ក៏គ្មាននរណាហាមឃាត់ដែរ តែនេះគាត់សុំធ្វើនៅទីសាធារណៈ គឺមិនបានទេ ព្រោះមិនទាន់ដល់ដំណាក់កាលឃោសនាបោះឆ្នោតនៅឡើយ»។
មន្ត្រីសម្របសម្រួលសមាគមអាដហុក (Adhoc) ការពារសិទ្ធិមនុស្សប្រចាំខេត្តកំពង់ឆ្នាំង គឺលោក សំ ច័ន្ទគា មានប្រសាសន៍ថា យោងលើកត្តាច្បាប់ គណបក្សសង្គ្រោះជាតិ មិនទាន់មានអ្នកតំណាងរាស្ត្រ ដូច្នេះ ការចុះទៅជួបសំណេះសំណាលជាមួយប្រជាពលរដ្ឋជាសាធារណៈ គឺមិនស្របច្បាប់ទេ។ យ៉ាងនេះក្ដី លោកថាធាតុពិត គណបក្សសង្គ្រោះជាតិ ជាគណបក្សបង្រួបបង្រួមគ្នារវាងគណបក្ស សម រង្ស៊ី និងគណបក្ស សិទ្ធិមនុស្ស ដូច្នេះអាជ្ញាធរគួរតែអនុគ្រោះចំពោះភាពចន្លោះប្រហោងនេះ ដោយផ្ដល់ការអនុញ្ញាតចំពោះសំណើសុំរបស់គណបក្សក្រៅរដ្ឋាភិបាលទាំង២នេះ ទើបជាការប្រសើរ ដើម្បីឲ្យសាធារណមតិជាតិ និងអន្តរជាតិមើលឃើញថា លំហប្រជាធិបតេយ្យ និងសេរីភាពនៃការបញ្ចេញមតិនៅកម្ពុជា មានលក្ខណៈធំទូលាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។