មន្ត្រីជាន់ខ្ពស់គណបក្សជាប់ឆ្នោតទាំងពីរអះអាងថា ការចូលស្បថដើម្បីចូលកាន់តំណាងជាតំណាងរាស្ត្ររបស់គណបក្សសង្គ្រោះជាតិទាំង ៥៥រូប ជាការផ្សះផ្សាជាតិ និងធ្វើឲ្យប្រសើរនូវលទ្ធិប្រជាធិបតេយ្យនៅកម្ពុជា។
ទោះបីជាយ៉ាងណាក៏ដោយ អ្នកវិភាគឯករាជ្យមួយចំនួនបានអះអាងផ្ទុយវិញថា ការចូលស្បថរបស់គណបក្សសង្គ្រោះជាតិ នៅពេលនេះ បណ្តាលឲ្យគណបក្សប្រឆាំងបាត់បង់ឱកាសជាច្រើនដើម្បីជំរុញឲ្យគណបក្សកាន់អំណាចយល់ព្រមកែទម្រង់ចំណុចសំខាន់ៗមួយចំនួន។
តំណាងរាស្ត្រ និងជាមន្ត្រីជាន់ខ្ពស់គណបក្សប្រជាជនកម្ពុជា លោក ឈាង វុន ស្វាគមន៍ការស្បថចូលកាន់តំណែងជាអ្នកតំណាងរាស្ត្ររបស់តំណាងរាស្ត្រគណបក្សសង្គ្រោះជាតិទាំង ៥៥រូប។ លោកបញ្ជាក់ថា គណបក្សសង្គ្រោះជាតិ នឹងមានដៃគូក្នុងរដ្ឋសភាដើម្បីធ្វើការអភិវឌ្ឍជាតិ៖ «គឺជាជោគជ័យរបស់ប្រជាពលរដ្ឋ ជោគជ័យធំណាស់របស់ប្រជាពលរដ្ឋ លោកនឹងបានការឯកភាពជាតិនិងសន្តិភាព»។
តំណាងរាស្ត្រគណបក្សសង្គ្រោះជាតិ ៥៥រូប រួមមានបុរសចំនួន ៤៨រូប និងស្ត្រី ៧រូប បានចូលស្បថនៅព្រះបរមរាជវាំង កាលពីថ្ងៃទី៥ សីហា ហើយគ្រោងទៅចូលរួមកិច្ចប្រជុំរដ្ឋសភានៅថ្ងៃទី៨ សីហា។
ប្រធានតំណាងរាស្ត្រគណបក្សសង្គ្រោះជាតិ លោក សុន ឆ័យ ប្រាប់អ្នកសារព័ត៌មានក្នុងពេលចូលស្បថនៅព្រះបរមរាជវាំងថា តំណាងរាស្ត្រគណបក្សសង្គ្រោះជាតិ បានបំពេញតួនាទីដែលបានប្រគល់ជូនដោយម្ចាស់ឆ្នោត៖ «ក្រោយពីយើងទទួលបាននូវគោលការណ៍នៃកិច្ចព្រមព្រៀងមួយចំនួនដើម្បីធានាសិទ្ធិទាំងឡាយរបស់ប្រជាពលរដ្ឋ។ យើងយល់ថា វាជាផលប្រយោជន៍សម្រាប់ប្រទេសជាតិផងដែរ»។
លោកបន្តទៀតថា កិច្ចសន្យាកំណែទម្រង់ស៊ីជម្រៅរវាងគណបក្សសង្គ្រោះជាតិ និងគណបក្សប្រជាជនកម្ពុជា នឹងបន្តដោះស្រាយបញ្ហាសេសសល់មួយចំនួនទៀតជាបន្តបន្ទាប់។ ទោះបីជាយ៉ាងក៏ដោយ អគ្គលេខាធិការដ្ឋានរដ្ឋសភា បានជូនដំណឹងថា គម្រោងនៃកិច្ចប្រជុំនៃក្រុមចរចាគណបក្សប្រជាជនកម្ពុជា និងគណបក្សសង្គ្រោះជាតិ សម្រាប់ធ្វើវិសោធនកម្មបទបញ្ជាផ្ទៃក្នុងរដ្ឋសភាដែលគ្រោងនឹងបន្តការពិភាក្សាលើបញ្ហាសេសសល់បន្តទៀតនៅវិមានរដ្ឋសភា នៅព្រឹកថ្ងៃពុធ ទី៦ ខែសីហា នោះត្រូវបានលើកពេល។ ប៉ុន្តែលោក ឈាង វុន អះអាងថា ការពន្យារពេលនេះដោយសារបញ្ហាពេលវេលា ហើយតំណាងគណបក្សទាំងពីរនឹងជួបគ្នានៅពេលឆាប់ដើម្បី ពិភាក្សាវិសោធនកម្មបទបញ្ជាផ្ទៃក្នុងរដ្ឋសភា។
លោកបន្ថែមទៀតថា គណបក្សប្រជាជនកម្ពុជា និងគណបក្សសង្គ្រោះជាតិ មិនមានបញ្ហាចម្រូងចម្រាសជាដុំកំភួនឡើយ។
ទោះបីជាយ៉ាងណាក៏ដោយ អ្នកវិភាគសង្គម លោក កែម ឡី បញ្ជាក់ថា ការចូលស្បថទទួលតំណែងរបស់តំណាងរាស្ត្រគណបក្សសង្គ្រោះជាតិនៅពេលនេះ មានផលវិជ្ជមាន និងអវិជ្ជមានរួមគ្នា៖ «ចំណុចអវិជ្ជមាន គឺគាត់បាត់បង់នូវឱកាសច្រើនក្នុងការតស៊ូដើម្បីធ្វើឲ្យចំណុចលំអិតក្នុងគណៈកម្មការបោះឆ្នោតឲ្យឯករាជ្យ និងនីតិវិធីឲ្យមានស្តង់ដារ គាត់បាត់បង់ឱកាសហើយ»។
ចំណែកបញ្ហាដែលអង្គការសង្គមស៊ីវិល ចង់ឃើញក្រោយវិបត្តិនយោបាយនោះ រួមមានការបើកទីលានប្រជាធិបតេយ្យឡើងវិញ និងការដោះលែងសកម្មជនគណបក្សសង្គ្រោះជាតិចំនួនបីនាក់ដែលកំពុងជាប់ឃុំនៅពន្ធនាគារព្រៃស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។