អ្នកគាំទ្រគណបក្សប្រជាជនកម្ពុជា នៅខេត្តមណ្ឌលគិរី ព្រមានថ្នាក់ដឹកនាំគណបក្សឲ្យចាត់វិធានការក្ដៅចំពោះមន្ត្រីនៅក្រោមឱវាទពីបញ្ហាពុករលួយនិងបក្សពួកនិយម។ ការព្រមាននេះ ស្របពេលដែលសំឡេងឆ្នោតគាំទ្រគណបក្សប្រឆាំងមានកើនឡើង និងបន្ទាប់ពីគណបក្សប្រជាជនកម្ពុជា ផ្សាយថា គណបក្សដែលកាន់អំណាចជាង ៣០ឆ្នាំមកហើយនេះ បានទទួលសំឡេងឆ្នោត ៦៨អាសនៈ គឺទាបជាងអាណត្តិទី៤ ចំនួន ២២អាសនៈ។
បន្ទាប់ពីការបោះឆ្នោតចប់មួយថ្ងៃ ប្រជាពលរដ្ឋរស់នៅក្នុងខេត្តមណ្ឌលគិរី ចាប់ផ្ដើមពិភាក្សាតាមហាងកាហ្វេ ហាងគុយទាវ និងកន្លែងជួបជុំនានាដើម្បីវែកញែកពីមូលហេតុដែលនាំឲ្យគណបក្សកាន់អំណាចបាត់បង់ការគាំទ្រយ៉ាងច្រើននៅអាណត្តិនេះ។
ប្រជាពលរដ្ឋជនជាតិដើមភាគតិចដែលធ្លាប់គាំទ្រគណបក្សប្រជាជនកម្ពុជា បានបន្ទោសថា មកពីបញ្ហាពុករលួយ និងបក្សពួកនិយមក្នុងជួរមន្ត្រីថ្នាក់ក្រោមច្រើនពេក ទើបបង្កឲ្យពលរដ្ឋខឹងសម្បា ហើយបោះឆ្នោតទម្លាក់។
ប្រជាពលរដ្ឋរស់នៅឃុំម៉េម៉ង់ ស្រុកកែវសីមា លោក ហ៊ឺយ ម៉ីវ នៅថ្ងៃទី២៩ ខែកក្កដា មានប្រសាសន៍ថា លោកបានបោះឆ្នោតឲ្យបក្សកាន់អំណាចជាច្រើនអាណត្តិមកហើយ រួមទាំងអាណត្តិទី៥នេះ ដោយសារតែលោកនឹកឃើញគុណសម្បត្តិរបស់លោក ហ៊ុន សែន។ លោកបន្តថា គណបក្សប្រជាជនកម្ពុជា ប្រហែលជាមិនអាចឈ្នះឆ្នោតនៅអាណត្តិទី៦ បានទៀតទេ បើសិនជាមន្ត្រីថ្នាក់ក្រោមនៅរកស៊ីឈើខុសច្បាប់ និងរឹបអូសដីធ្លីពលរដ្ឋក្រីក្រតទៅទៀតនោះ។
ទន្ទឹមនឹងនេះ ជនជាតិដើមភាគតិចព្នង និងជាអនុប្រធានសហគមន៍ ពូលុ ឃុំប៊ូស្រា ស្រុកពេជ្រាដា លោក គុច ចាន់រ៉ា ឲ្យដឹងថា ពលរដ្ឋសហគមន៍ពូលុ មានក្ដីរីករាយពេលដឹងថា លោក ហ៊ុន សែន ជាប់ឆ្នោតជាថ្មី ប៉ុន្តែពលរដ្ឋដដែលបែរជាព្រួយបារម្ភថា តើដីធ្លីជនជាតិដើមនឹងត្រូវគំរាមកំហែងទៀត ឬទេ? ចុះចំណែកការកាប់បំផ្លាញព្រៃឈើវិញនោះ នឹងអាចបញ្ឈប់បានទេ?
លោកបន្តថា តំណាងរាស្ត្រជាប់ឆ្នោតថ្មីត្រូវតែយកចិត្តទុកដាក់ចំពោះសុខុមាលភាពពលរដ្ឋ ពិសេសគឺបំបាត់អំពើពុករលួយ បក្សពួកនិយមដើម្បីការពារការចាញ់ឆ្នោតនៅអាណត្តិបន្ទាប់។ លោកបញ្ជាក់ទៀតថា លោកសង្ឃឹមថា គណបក្សកាន់អំណាចអនុវត្តតាមគោលនយោបាយទាំង ១១.ខ ដែលបានដាក់ចេញដែលបម្រើដល់ជីវភាពរស់នៅរបស់ពលរដ្ឋ។
ទោះជាបែបណាក្តី មន្ត្រីគណបក្សប្រជាជនកម្ពុជា ខេត្តមណ្ឌលគិរី បង្ហើបឲ្យដឹងថា គណបក្សកាន់អំណាចនៅខេត្តនេះមិនភ័យនឹងការចាញ់ឆ្នោតនៅអាណត្តិក្រោយទេ ហើយមន្ត្រីគណបក្សម្នាក់ៗត្រូវបានចៅហ្វាយខេត្តតម្រូវឲ្យចេញស្រាបៀមួយកេស ឬលុយចំនួន ៥០.០០០រៀល ដើម្បីជប់លៀងអបអរជ័យជំនះនៅថ្ងៃទី៣១ ខែកក្កដា ខាងមុខ។
លទ្ធផលបោះឆ្នោតបណ្ដោះអាសន្ននៅខេត្តមណ្ឌលគិរី បង្ហាញថា គណបក្សប្រជាជនកម្ពុជា បានឈ្នះឆ្នោត ប៉ុន្តែសំឡេងឆ្នោតគាំទ្របក្សប្រឆាំងកើនឡើងគួរកត់សម្គាល់។ ការបោះឆ្នោតនៅខេត្តនេះ ក៏លេចចេញភាពមិនប្រក្រតីជាច្រើនដែរ ដូចជាពលរដ្ឋបាត់ឈ្មោះ ឈ្មោះខុស ការអនុញ្ញាតឲ្យកាន់ប័ណ្ណព័ត៌មានចូលបោះឆ្នោត មន្ត្រីអាជ្ញាធរឈរចាំប្រាប់ឲ្យពលរដ្ឋបោះឆ្នោតនៅតាមកន្លែងបោះឆ្នោតជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។