ប្រជាពលរដ្ឋមួយចំនួនដែលរស់នៅក្នុងខេត្ត-រាជធានី បានសម្ដែងមតិប្រហាក់ប្រហែលគ្នាជុំវិញរឿងលោក សម រង្ស៊ី លាលែងពីតំណែងប្រធានគណបក្សសង្គ្រោះជាតិ។ ប្រជាពលរដ្ឋភាគច្រើនថាពួកគាត់សោកស្ដាយចំពោះការលាលែងនេះ ប៉ុន្តែពួកគាត់ចាត់ទុកការលាលែងពីប្រធានបក្សនេះ គឺជាជម្រើសត្រឹមត្រូវដើម្បីបន្តជីវិតនយោបាយគណបក្សប្រឆាំង។
ប្រជាពលរដ្ឋមួយចំនួនហាក់មិនសូវភ្ញាក់ផ្អើលប៉ុន្មានទេចំពោះរឿងរ៉ាវលោក សម រង្ស៊ី លាឈប់ពីប្រធានគណបក្សសង្គ្រោះជាតិ ខណៈស្ថានភាពនយោបាយកំពុងតានតឹង និងបក្សកាន់អំណាចកំពុងរៀបចំគម្រោងបង្កើតច្បាប់ដោយចង់យកគំរូតាមប្រទេសថៃ ដែលកំណត់ថា បើប្រធានគណបក្សណាមានទោសធ្ងន់ធ្ងរ ត្រូវរំលាយគណបក្សចោល។
កំពុងអង្គុយចិតត្រយូងចេកលក់នំបញ្ចុកនៅក្រោយផ្សារអូឡាំពិក ជីដូនចាស់ម្នាក់រៀបរាប់ថា ការលាលែងពីប្រធានគណបក្សរបស់លោក សម រង្ស៊ី នៅពេលនេះ គឺជាជម្រើសត្រឹមត្រូវ ព្រោះបើលោក សម រង្ស៊ី មិនលាឈប់ទេ គឺគូបដិបក្ខដែលមានអំណាច នៅតែតាមរុកកួនធ្វើបាបដដែល៖ «»។
រីឯបុរសសម្បុរស្រអែម កំពុងអង្គុយលើម៉ូតូអានកាសែត លោក អៀម សំអូន មានមុខរបរជាអ្នករត់ម៉ូតូឌុប មានប្រសាសន៍ថា រូបគាត់ពិតជាសោកស្ដាយចំពោះការលាលែងរបស់លោក សម រង្ស៊ី ព្រោះលោកយល់ថា លោក សម រង្ស៊ី ជាអ្នកនយោបាយស្នេហាជាតិម្នាក់។ ទោះយ៉ាងណា លោកបន្ថែមថា បើទោះបីជាលោក សម រង្ស៊ី នៅធ្វើជាប្រធានបក្សក្តី ក៏គាត់មិនអាចធ្វើអ្វីបានទេ ដោយសារត្រូវបានគេគាបសង្កត់គ្រប់ពេល ដូច្នេះការចាកចេញនេះ គឺជាជម្រើសល្អ៖ «»។
មិនខុសគ្នាប៉ុន្មានឡើយ ព្រះតេជព្រះគុណមួយអង្គដែលគង់នៅវត្តមហាមន្ត្រី មានថេរដីកាថា ការលាលែងពីប្រធានបក្សនេះ គឺជាគំរូ និងជាយុទ្ធសាស្ត្រល្អមួយដើម្បីជួយស្រោចស្រង់គណបក្សសង្គ្រោះជាតិ។ ព្រះតេជព្រះគុណបន្ថែមថា ទោះបីជាគ្មានវត្តមានលោក សម រង្ស៊ី ក៏ប្រជាពលរដ្ឋនៅតែស្រឡាញ់ និងបោះឆ្នោតគាំទ្រគណបក្សសង្គ្រោះជាតិ ដដែល៖ «»។
ប្រជាពលរដ្ឋនៅភ្នំពេញមួយចំនួនទៀត បានផ្តល់បទសម្ភាសន៍ដល់អាស៊ីសេរីទាំងមានអារម្មណ៍ភ័យខ្លាចពីសុវត្ថិភាពថា ការលាលែងរបស់លោក សម រង្ស៊ី នេះ គឺជារឿងមិននឹកស្មានដល់៖ «»។
ចំពោះទស្សនៈរបស់ប្រជាពលរដ្ឋខេត្តសៀមរាប វិញយល់ថា ការលាលែងរបស់លោក សម រង្ស៊ី នេះ គឺដោយសាររដ្ឋាភិបាលគ្រោងធ្វើវិសោធនកម្មច្បាប់ស្ដីពីគណបក្សនយោបាយ ដែលអាចនឹងរាំងខ្ទប់មិនឲ្យលោក សម រង្ស៊ី បន្តធ្វើជាប្រធានគណបក្សសង្គ្រោះជាតិ ពីព្រោះលោក សម រង្ស៊ី ត្រូវបានតុលាការផ្ដន្ទាទោសជាបន្តបន្ទាប់ ក្នុងសំណុំរឿងផ្សេងគ្នាដែលប្ដឹងដោយមន្ត្រីរដ្ឋាភិបាល និងលោកនាយករដ្ឋមន្ត្រី ហ៊ុន សែន នោះ។ លោកមានការសោកស្ដាយខ្លាំងណាស់ ដែលអ្នកនយោបាយខ្មែរមិនចេះរួបរួមគ្នាដើម្បីប្រទេសជាតិ៖ «»។
ដោយឡែកលោក រស់ លីន ជាប្រជាពលរដ្ឋជនជាតិដើមភាគតិចនៅភូមិបង្កើនផល ឃុំរមទម ស្រុករវៀង ខេត្តព្រះវិហារ មានប្រសាសន៍ថា ទោះបីជាគ្មានវត្តមានលោក សម រង្ស៊ី ប៉ុន្តែបក្សប្រឆាំងត្រូវតែមានតទៀត៖ «»។
ប្រជាពលរដ្ឋនៅខេត្តក្រចេះ វិញ ក៏បង្ហាញទស្សនៈមិនខុសគ្នាប៉ុន្មានឡើយ៖ «»។
មតិពលរដ្ឋមួយចំនួនទៀតមិនចង់ឲ្យគណបក្សនយោបាយដែលមានអាសនៈក្នុងរដ្ឋសភាឈ្លោះប្រកែកគ្នា ភ្លេចគិតដោះស្រាយបញ្ហាជាតិនោះទេ។ ពួកគាត់ថា បើទោះបីជាគណបក្សសង្គ្រោះជាតិ ត្រូវបានគេគាបសង្កាត់គ្រប់ពេលក៏ដោយចុះ ប៉ុន្តែប្រជាប្រិយភាពបក្សនេះមិនថមថយឡើយ ហើយការបោះឆ្នោតខាងមុខនេះ នឹងបង្ហាញឲ្យឃើញថា បក្សណាដែលធ្វើបាបគេ និងមិនសូវយកចិត្តទុកដាក់លើរាស្ត្រនោះ នឹងទទួលទណ្ឌកម្មពីប្រជាពលរដ្ឋយ៉ាងណាខ្លះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។