ពាក់ព័ន្ធបញ្ហានេះ បើទោះជាលោក ហ៊ុន សែន មិនបញ្ចេញឈ្មោះដោយត្រង់អ្នកនយោបាយណាមួយក្ដី ប៉ុន្តែគេដឹងថា ការលើកឡើងនេះ ទំនងជាសំដៅដល់ប្រធានគណបក្ស សម រង្ស៊ី គឺលោក គង់ គាំ។
លោកនាយករដ្ឋមន្ត្រី ហ៊ុន សែន អះអាងថា ព្រះមហាក្សត្រី នរោត្តម មុនីនាថ សីហុន ព្រះអង្គចង់តតាំងដោយផ្ទាល់ជាមួយអ្នកដែលរិះគន់ដល់ព្រះនាម ព្រះមហាវីរក្សត្រ ព្រះបាទសម្ដេចព្រះ នរោត្តម សីហនុ ថា ព្រះអង្គបានបង្គាប់បញ្ជា និងរៀបចំគម្រោងការឲ្យលោកសេនាប្រមុខ លន់ នល់ ធ្វើរដ្ឋប្រហារទម្លាក់ព្រះអង្គដោយផ្ទាល់ កាលពីថ្ងៃ១៨ មីនា ឆ្នាំ១៩៧០។
ការថ្លែងរបស់លោក ហ៊ុន សែន នេះធ្វើឡើងនៅគ្រាលោកចូលរួមសម្ពោធដាក់ឲ្យប្រើប្រាស់សមិទ្ធផលនានា នៅស្រុកក្រូចឆ្មារ ខេត្តកំពង់ចាម កាលថ្ងៃទី១៥ មិថុនា។
បើទោះជាលោក ហ៊ុន សែន មិនបញ្ចេញឈ្មោះអ្នកនយោបាយណាមួយក្ដី ក៏ប៉ុន្តែគេដឹងថា នោះគឺលោក ហ៊ុន សែន សំដៅដល់ប្រធានគណបក្ស សម រង្ស៊ី គឺលោក គង់ គាំ។ លោកនាយករដ្ឋមន្ត្រីអត្ថាធិប្បាយថា អ្នកដែលលើកឡើងបែបនេះ គឺបានបង្ហាញចេតនាកាន់តែច្បាស់ថា អ្នកនោះគឺមិនគោរពរបបរាជានិយមនោះទេ។
បើតាមលោក ហ៊ុន សែន នៅទីបំផុតសម្ដេចព្រះមហាក្សត្រី នរោត្តម មុនីនាថ សីហនុ ព្រះអង្គសម្រេចព្រះរាជហឫទ័យ មិនសវនាការដោយផ្ទាល់ទេ ព្រោះមានលោក ហ៊ុន សែន ចេញមុខការពាររបបរាជានិយមហើយនោះ។
ខ្សែអាត់សំឡេងរបស់លោក គង់ គាំ ប្រធានគណបក្ស សម រង្ស៊ី ដែលបាននិយាយកាលពីខែឧសភា នៅខេត្តតាកែវ ត្រូវបានមន្ត្រីរដ្ឋាភិបាលមកពីគណបក្សប្រជាជនកម្ពុជា បញ្ចេញជាសាធារណៈថា លោក លន់ នល់ ត្រូវបានព្រះមហាវីរក្សត្រ នរោត្តម សីហនុ ព្រះអង្គគឺជាអ្នកដែលស្ថិតនៅពីក្រោយរដ្ឋប្រហារ ឆ្នាំ១៩៧០ ពោលគឺពុំមែនជាគំនិតរបស់លោកសេនាប្រមុខ លន់ នល់ ទេ។
ក៏ប៉ុន្តែលោក គង់ គាំ វិញ បដិសេធការចោទប្រកាន់នេះ ដោយចាត់ទុកថា នេះគឺជាល្បិចនយោបាយរបស់លោក ហ៊ុន សែន រៀបចំទុក ដើម្បីធ្វើឲ្យលោក និងលោក កឹម សុខា ត្រូវបញ្ចប់ជីវិតនយោបាយ និងចុះខ្សោយនៅមុនការបោះឆ្នោតប៉ុណ្ណោះ។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា គិតថា ប្រសិនបើរឿងរ៉ាវវិវត្តន៍ដល់ការចង់តតាំងដោយផ្ទាល់នូវអ្វីដែលគេគិតថា ជាវិវាទនេះ នោះមានន័យថា គឺជាមធ្យោបាយដ៏ប្រសើរ។
លោក អ៊ូ វីរៈ អះអាងថា ទោះជាបែបណា នេះនឹងមិនធ្វើឲ្យប៉ះពាល់ដល់ព្រះនាមព្រះមហាក្សត្រ និងក៏ពុំមានកំណត់ក្នុងច្បាប់ឡើយ ប្រសិនអ្នកនយោបាយគ្រាន់តែលើកឡើងពីប្រវត្តិសាស្ត្រនោះ។
បើទោះជាយ៉ាងណា មាត្រា ៧ នៃរដ្ឋធម្មនុញ្ញកំណត់ថា ព្រះមហាវីរក្សត្រកម្ពុជា ទ្រង់គ្រងរាជ្យសម្បត្តិ ប៉ុន្តែទ្រង់មិនកាន់អំណាចឡើយ។ ព្រះមហាក្សត្រទ្រង់ជាព្រះប្រមុខរដ្ឋមួយជីវិត ហើយអង្គព្រះមហាក្សត្រ មិនអាចនរណារំលោភបំពានបានឡើយ។
ចំណែកអង្គការសង្គមស៊ីវិលដែលធ្វើការពាក់ព័ន្ធការបោះឆ្នោតចាត់ទុកថា នេះជារបៀបរបស់អ្នកនយោបាយដែលតែងអនុវត្តនៅមុនការបោះឆ្នោតម្ដងៗ និងដើម្បីរកចំណុចខ្សោយពីគូប្រកួតរបស់ខ្លួន ដើម្បីកេងចំណេញផ្នែកនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។