បន្ទាប់ពីកិច្ចប្រជុំរវាង លោក ហ៊ុន សែន និងលោក សុរិយា ស៊ូប៊ែឌី អស់រយៈពេលប្រមាណ ៣ម៉ោងមក លោក ឱម យ៉ិនទៀង ក្នុងនាមជាប្រធានគណៈកម្មាធិការសិទ្ធិមនុស្សកម្ពុជា និងជាប្រធានអង្គភាពប្រឆាំងអំពើពុករលួយ ថ្លែងប្រាប់អ្នកកាសែតអំពីលទ្ធផលនៃកិច្ចប្រជុំនោះថា ភាគីទាំងពីរបានពិភាក្សាលើ ៥ចំណុច។
លោក ឱម យ៉ិនទៀង បន្តថា ក្នុងចំណោមចំណុចទាំង៥ នោះ លោក ហ៊ុន សែន ក៏បានសុំឱ្យ លោក សុរិយា ស៊ូប៊ែឌី ជួយអន្តរាគមន៍ឱ្យមេបក្សសង្គ្រោះជាតិ ចូលរួមសភាជាមួយបក្សប្រជាជនកម្ពុជា របស់លោក៖ «សម្ដេច ហ៊ុន សែន ផ្ដាំតែប៉ុណ្ណឹងទេ ថាឱ្យ លោក សុរិយា ស៊ូប៊ែឌី ប្រាប់ទៅគណបក្សសង្គ្រោះជាតិ ចុះថា សុំឱ្យចូលក្នុងសភាមក បាននឹងមានការ ហើយការកែទម្រង់រដ្ឋសភា គឺជ្រៅជ្រះដែលមានផលប្រយោជន៍ដល់គណបក្សប្រឆាំងច្រើនណាស់។ ហេតុអីគេមិនយកចំណុចហ្នឹងសម្រេចគោលដៅរបស់គេ? ឧទាហរណ៍ តំណាងរាស្ត្រ ៣០នាក់ មានសិទ្ធិហៅរដ្ឋមន្ត្រីមកហើយ។ ពីមុន គាត់ ២៩នាក់ ឥឡូវគាត់ ៥៥នាក់ហើយ។ នេះហើយចំណុចដែលគាត់អាចធ្វើបាន អ្វីៗដែលគាត់ចង់ធ្វើ។ ក្នុងនាមជាបក្សប្រឆាំងនោះ មិនមែនទាល់តែកាន់រដ្ឋាភិបាលទេ គាត់អាចធ្វើបាន ហេតុអីគាត់មិនចូលមក»។
ឆ្លើយតបទៅនឹងការផ្ដាំផ្ញើរបស់ លោក ហ៊ុន សែន តាមរយៈ លោក សុរិយា ស៊ូប៊ែឌី នេះ លោក កឹម សុខា មានប្រសាសន៍ថា មិនអាចធ្វើទៅបានទេ លុះត្រាតែលទ្ធផលបោះឆ្នោតត្រូវបានដោះស្រាយដោយយុត្តិធម៌ជូនម្ចាស់ឆ្នោតជាមុនសិន៖ «ខ្ញុំគិតថាមិនមែនរឿងជំរុញមិនជំរុញទេ រឿងសំខាន់យើងដោះស្រាយនយោបាយ យើងដោះស្រាយភាពយុត្តិធម៌ជូនប្រជាពលរដ្ឋហើយឬនៅ ពីព្រោះគណបក្សសង្គ្រោះជាតិ ខ្ញុំក្ដី លោក សម រង្ស៊ី ក្ដី គឺយើងការពារនូវយុត្តិធម៌ម្ចាស់ឆ្នោត ហើយបើយើងអត់ដោះស្រាយភាពមិនប្រក្រតីជុំវិញការបោះឆ្នោតហ្នឹង បានយើងទៅប្រជុំសភាម៉េចកើត»។
ចំណែកឯការពិភាក្សាទាក់ទងនឹងចំណុចសំខាន់ៗប្រាំ ត្រូវបាន លោក ឱម យ៉ិនទៀង បញ្ជាក់ឱ្យដឹងថា មានដូចជា ទី១ អំពីការពិនិត្យមើលស្ថានភាពសិទ្ធិមនុស្សនៅកម្ពុជា តាមអាណត្តិអ្នករាយការណ៍ពិសេស។ ទី២ ការទទួលយករបស់រដ្ឋាភិបាលកម្ពុជា ចំពោះអនុសាសន៍របស់អ្នករាយការណ៍ពិសេស។ ទី៣ អំពីការកែទម្រង់ធំៗរបស់រដ្ឋាភិបាលកម្ពុជា ទាំងការកែទម្រង់រដ្ឋ តុលាការ និងរដ្ឋសភា។ ទី៤ ការស្វែងយល់របស់ លោក សុរិយា ស៊ូប៊ែឌី អំពីជំហររបស់រដ្ឋាភិបាលទៅអនាគត ពាក់ព័ន្ធនឹងការបង្កើតស្ថាប័នថ្នាក់ជាតិទទួលបន្ទុកសិទ្ធិមនុស្សកម្ពុជា។ ការបារម្ភរបស់ លោក សុរិយា ស៊ូប៊ែឌី អំពីព្រឹត្តិការណ៍អាជ្ញាធរបង្ក្រាបដោយបង្ហូរឈាមលើក្រុមកម្មករធ្វើបាតុកម្ម កាលពីពេលថ្មីៗនេះ និងទី៥ អំពីថា តើរដ្ឋាភិបាលត្រូវការអ្វីខ្លះពីអ្នករាយការណ៍ពិសេសរបស់អង្គការសហប្រជាជាតិ ពីបញ្ហាសិទ្ធិមនុស្ស និងបញ្ហានយោបាយជាប់គាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។