ការសម្រេចនេះធ្វើឡើងបន្ទាប់ពីមន្ត្រីជាន់ខ្ពស់រូបនេះ និងអតីតមេធាវីឈ្មោះ ដេវីដ ឆាយណាវ៉ា ព្រមទាំងគូកន ផឹកស៊ីស្រវឹង រួចបានបើកឡានប្រណាំងគ្នាលេង បង្កគ្រោះថ្នាក់ចរាចរណ៍កាលពីយប់ថ្ងៃទី១៨ មីនា និងបានប្រើប្រាស់កណ្ដាប់ដៃដើម្បីវាយទៅលើអ្នកសារព័ត៌មានដែលចុះយកព័ត៌មាននៅទីតាំងកើតហេតុ។
លោកនាយករដ្ឋមន្ត្រី ហ៊ុន សែន ប្រកាសជាសាធារណៈថា នឹងយកសំណាញ់ច្បាប់ចាត់ការអនុរដ្ឋលេខាធិការក្រសួងយុត្តិធម៌ និងគូកន ដែលបានបង្កគ្រោះថ្នាក់ចរាចរណ៍ និងប្រើហិង្សាទៅលើក្រុមអ្នកកាសែត។ ការថ្លែងបែបនេះ ធ្វើឡើងក្នុងសន្និសីទបូកសរុបការងារប្រចាំឆ្នាំរបស់ក្រសួងអប់រំយុវជន និងកីឡា នៅល្ងាចថ្ងៃទី២០ ខែមីនា ឆ្នាំ២០១៣។
លោក ហ៊ុន សែន មានប្រសាសន៍ថា អនុរដ្ឋលេខាធិការក្រសួងយុត្តិធម៌ លោក យាន ស៊ីណា និងមេធាវី ដេវីដ ឆាយណាវ៉ា ជាចាស់ទំនើងដែលបង្កភាពអសកម្មក្នុងសង្គម និងវាយទៅលើក្រុមអ្នកកាសែត។
លោកបន្តថា រាជរដ្ឋាភិបាលបានសម្រេចដកតំណែងលោក យាន ស៊ីណា ដើម្បីបើកផ្លូវឲ្យតុលាការចាត់ការតាមច្បាប់រួចហើយ ប៉ុន្តែលោកលើកចម្ងល់ថា ហេតុអ្វីបានជាសំណុំរឿងតែមួយមានអ្នកជាប់ឃុំ និងមានអ្នករួចខ្លួន៖ «ខ្ញុំមិនយល់សំណុំរឿងវាតែមួយ មានអ្នកជាប់ឃុំមានអ្នកក្នុងឃុំ ខ្ញុំមិនយល់។ ព្រហ្មទណ្ឌជាក់ស្ដែង វាត្រូវនៅក្នុងកញ្ចប់ជាមួយគ្នា។ សួរទៅគេថា វារត់រួច រួចវាទៅត្រង់ណាវា តាមយកឲ្យបាន។ ធ្វើដល់អនុរដ្ឋលេខា ធ្វើអ៊ីចឹងៗ អនុរដ្ឋលេខាធិការក្រសួងយុត្តិធម៌ សុទ្ធតែអ្នកចេះច្បាប់»។
លោកបន្តថា អនុរដ្ឋលេខាធិការរូបនោះជាបេក្ខជនមកពីគណបក្សហ្វ៊ុនស៊ិនប៉ិច ហើយលោក ញឹក ប៊ុនឆៃ ក៏បានឯកភាពចាត់ការរឿងដកតំណែងនេះដែរ។
សំណុំរឿងបើកឡានបង្កគ្រោះថ្នាក់ចរាចរណ៍នេះ ត្រូវបានតុលាការសម្រេចឃុំខ្លួនមនុស្សពីរនាក់រួចហើយ ក្នុងនោះមានមេធាវី ដេវីដ ឆាយណាវ៉ា និងក្មួយប្រុសឈ្មោះ អ៊ូ ពី បន្ទាប់ពីសាលាដំបូងរាជធានីភ្នំពេញ សាកសួរអស់រយៈពេលពីរថ្ងៃរួចមក។
ទាក់ទងនឹងបញ្ហានេះ ក្លឹបអ្នកកាសែតកម្ពុជា បានចេញសេចក្ដីថ្លែងការណ៍ថ្កោលទោស ហើយជំរុញឲ្យសមត្ថកិច្ចចាត់វិធានការយ៉ាងតឹងរ៉ឹងតាមច្បាប់ ប្រឆាំងនឹងក្រុមអ្នកដែលបានវាយលើក្រុមអ្នកកាសែតទាំងនោះ។ ចំណែកឯក្រុមប្រឹក្សាអ្នកសារព័ត៌មាន ក៏បានចេញសេចក្ដីថ្លែងការណ៍ឲ្យចាត់ការចំពោះជនសង្ស័យទាំងនោះដែរ។
អនុរដ្ឋលេខាធិការក្រសួងយុត្តិធម៌ លោក យាន ស៊ីណា មិនទាន់ត្រូវបានឃុំខ្លួននោះទេ ដោយសមត្ថកិច្ចអះអាងថា ជននេះរត់រួច។ តាមវីដេអូ ដែលបង្ហោះតាមប្រព័ន្ធអ៊ិនធឺណិត (internet) បង្ហាញថា ជននេះត្រូវបានសមត្ថកិច្ចចាប់រួចហើយ តែមិនមានសមត្ថកិច្ចណាម្នាក់ចេញមុខបញ្ជាក់ថា គាត់គេចខ្លួនបានដោយវិធីណានោះទេ។
ក្នុងមួយសប្ដាហ៍ចុងក្រោយនេះ លោកនាយករដ្ឋមន្ត្រី ហ៊ុន សែន បានប្រកាសចាត់ការចំពោះមនុស្សមានលុយ និងមានអំណាចពីរនាក់ទៅហើយ។ ម្នាក់គឺឧកញ៉ា ជៀម ផែន អគ្គនាយកក្រុមហ៊ុនស្រាបៀលីអូ (Leo Beer) ដែលបញ្ជាកម្លាំងរុះរើផ្ទះពលរដ្ឋនៅតំបន់កែវផុស ខេត្តព្រះសីហនុ និងម្នាក់ទៀត គឺអនុរដ្ឋលេខាធិការក្រសួងយុត្តិធម៌ លោក យាន ស៊ីណា ដែលបានវាយអ្នកកាសែតនេះឯង។
ទោះយ៉ាងណាក្ដី រាជរដ្ឋាភិបាលកម្ពុជា បែរជាបានដំឡើងតំណែងអគ្គនាយកប្រៃសណីយ៍ និងទូរគមនាគមន៍កម្ពុជា លោក ឡៅ សារឿន ដែលសំបូររឿងអាស្រូវពុករលួយរហូតដល់បុគ្គលិកធ្វើការតវ៉ា ឲ្យឡើងកាន់តំណែងជាអនុរដ្ឋលេខាធិការក្រសួងនេះទៅវិញ។ ការដំឡើងតំណែងនេះ ក៏ត្រូវបានសង្គមស៊ីវិលរិះគន់ និងស្នើស៊ើបអង្កេតបន្តដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។