ព្រះមហាក្សត្រព្រះករុណាព្រះបាទសម្ដេចព្រះបរមនាថ នរោត្តម សីហមុនី បានប្រថាប់ព្រះរាជលញ្ឆករ ឬពាក្យសាមញ្ញថា បោះត្រា ប្រោសព្រះរាជទានគោរមងារជូនអ្នកស្រី ប៊ុន រ៉ានី ដែលជាភរិយារបស់លោកនាយករដ្ឋមន្ត្រី ហ៊ុន សែន ជា «សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន»។
ព្រះរាជក្រឹត្យប្រទានគោរមងាររបស់ព្រះមហាក្សត្រជូនអ្នកស្រី ប៊ុន រ៉ានី ជាសម្ដេចនេះ គឺបន្ថែមលើគោរមងារអ្នកស្រីចាស់ដែលមានស្រាប់ហៅថា «កិត្តិព្រឹទ្ធបណ្ឌិត ប៊ុន រ៉ានី»។ ការតែងតាំងនេះ បានធ្វើឡើងចំថ្ងៃដែលកាកបាទក្រហមកម្ពុជា បានប្រារព្ធទិវាកាកបាទក្រហម អឌ្ឍចន្ទក្រហម ខួបលើកទី១៥០ នៅព្រឹកថ្ងៃទី៨ ខែឧសភា ឆ្នាំ២០១៣។
ព្រះមហាក្សត្រ បានបញ្ជាក់ក្នុងព្រះរាជក្រឹត្យថា ការប្រោសព្រះរាជទានគោរមងារ ជាសម្ដេចកិត្តិព្រឹទ្ធបណ្ឌិតជូនអ្នកស្រី ប៊ុន រ៉ានី ដោយព្រះអង្គយល់ថា អ្នកស្រី ប៊ុន រ៉ានី បានគាំទ្រលោកនាយករដ្ឋមន្ត្រី ហ៊ុន សែន យ៉ាងអង់អាច និងដោយស្វាមីភក្តិ ជាអ្នករំដោះប្រទេសជាតិ ស្នេហាជាតិ ការពារជាតិ និងសាសនា។ បានគាំពារឥតល្អៀងតាមមាគ៌ានយោបាយបង្រួបបង្រួមជាតិ ផ្សះផ្សាជាតិរបស់ព្រះករុណា ព្រះបាទសម្ដេចព្រះនរោត្តម សីហនុ ដើម្បីជាតិមាតុភូមិកម្ពុជា។
ទាក់ទិនការផ្ដល់គោរមងារនេះ លោក កែម ឡី អ្នកស្រាវជ្រាវការអភិវឌ្ឍសង្គម មិនជំទាស់ចំពោះការផ្ដល់គោរមងារជាសម្ដេចជូនអ្នកស្រី ប៊ុន រ៉ានី របស់ព្រះមហាក្សត្រទេ។ ប៉ុន្តែលោកថា នៅក្នុងប្រទេសកម្ពុជា មានមនុស្សជាច្រើនដែលគួរទទួលបានគោរមងារជាវីរជនឆ្នើម តែងតាំងដោយព្រះមហាក្សត្រដែរ។ អ្នកទាំងនោះមានដូចជាលោក ម៉ម សូណង់ដូ ប្រធានសមាគមអ្នកប្រជាធិបតេយ្យ អ្នកស្រី ទេព វន្នី សកម្មជនដីធ្លីតំបន់បឹងកក់ លោក ឈុត វុទ្ធី អតីតប្រធានអង្គការការពារធនធានធម្មជាតិ និងលោក ជា វិជ្ជា អតីតប្រធានសហជីពសេរីកម្មករកម្ពុជា ជាដើម ដែលកំពុងត្រូវបានគេគំរាមកំហែង និងសម្លាប់ ដោយសារខំប្រឹងការពារផលប្រយោជន៍រួម។
លោក កែម ឡី៖ «មនុស្សយើងបើកាលណាផ្ដល់គោរមងារអ៊ីចឹងជួនជាការប្រសើរ។ បើយើងមិនទាន់គ្រប់លក្ខណៈនៃការទទួល ក៏យើងខំប្រឹងដែរ នៅពេលដែលយើងទទួល។ ក៏ប៉ុន្តែខ្ញុំគ្រាន់តែផ្ដល់អនុសាសន៍ថា ឲ្យមានការរៀបចំជាច្បាប់ជាទម្លាប់ថា តើអ្នកអនុវត្តបានប៉ុណ្ណា ស្នាដៃប៉ុណ្ណា យើងត្រូវរៀបចំគោរមងារយ៉ាងដូចម្ដេច។ ឲ្យមានជាច្បាប់តែម្ដង ឲ្យមានជាលក្ខខណ្ឌត្រឹមត្រូវតែម្ដងជាការប្រសើរ»។
ដូចគ្នាដែរ លោក កឹម សុខា អនុប្រធានគណបក្សសង្គ្រោះជាតិ យល់ថា សង្គមខ្មែរបច្ចុប្បន្ន បើថ្នាក់ដឹកនាំប្រទេស គេចង់បានអ្វីគឺព្រះមហាក្សត្រ ព្រះអង្គមិនហ៊ានជំទាស់ទេ៖ «ធម្មតាទេ កាលណាគណបក្សប្រជាជន មេដឹកនាំសព្វថ្ងៃហ្នឹងគេចង់បានអី ព្រះមហាក្សត្រតែងតែប្រទានឲ្យគេហើយ ដើម្បីធ្វើយ៉ាងណាឲ្យគេហ្នឹងសប្បាយចិត្ត កុំធ្វើបាបរាស្ត្រតទៅទៀត។ ប៉ុន្តែកន្លងមកគេនៅតែធ្វើបាបរាស្ត្រអ៊ីចឹងៗ ចេះតែខំឲ្យទៅគេទៅ ក្រែងលោគេដូរគំនិត ដូរមារយាទអីខ្លះ លើកទឹកចិត្តខ្លះ។ ដូច្នេះហើយខ្ញុំមិនមានការចាប់អារម្មណ៍អីទៅលើការផ្ដល់គោរមងារនេះទេ។ ទិតៀន ក៏ខ្ញុំមិនទិតៀន រិះគន់ខ្ញុំក៏មិនរិះគន់ ហើយសរសើរក៏ខ្ញុំមិនសរសើរដែរ»។
ទោះយ៉ាងណា ព្រះរាជក្រឹត្យរបស់ព្រះមហាក្សត្រ ព្រះអង្គទ្រង់ស្វែងយល់ថា ការផ្ដល់គោរមងារជាសម្ដេច ជូនអ្នកស្រី ប៊ុន រ៉ានី ដោយសារតែអ្នកស្រី ប៊ុន រ៉ានី ជាអគ្គមគ្គុទ្ទេសក៍ដ៏ល្អឆ្នើម ជាទីគោរពស្រឡាញ់របស់ប្រជារាស្ត្រ បានដឹកនាំកសាង និងគោរពព្រះពុទ្ធសាសនា ឲ្យប្រទេសមានការអភិវឌ្ឍរីកចំរើន។ ក្រៅពីនេះ គឺអ្នកស្រី ប៊ុន រ៉ានី ក៏ជាអគ្គមគ្គុទ្ទេសក៍ដ៏ឆ្នើម និងមានស្វាមីភក្ដិចំពោះព្រះរាជបល័្លង្ក និងបានចូលរួមដង្ហែព្រះករុណាព្រះមហាវីរក្សត្រ តាំងពីដើមរហូតដល់ព្រះអង្គយាងសោយព្រះទិវង្គត។
ព្រះរាជសារបន្តថា ជាងនេះទៀត អ្នកស្រី ប៊ុន រ៉ានី ក៏ជាអ្នកដឹកនាំកាកបាទក្រហមកម្ពុជា ដែលទទួលបានការគាំទ្រ ទាំងក្នុងសង្គមជាតិ និងអន្តរជាតិ ដោយមានសមត្ថភាពជួយជនរងគ្រោះពីគ្រោះមហន្តរាយនានា នៅកម្ពុជា បានទាន់ពេលវេលា។
កន្លងមកព្រះរាជក្រឹត្យរបស់ព្រះមហាក្សត្រខ្មែរ បានផ្ដល់ងារជាសម្ដេចជូនឥស្សរជនខ្មែរជាន់ខ្ពស់មួយចំនួន ដែលជាមន្ត្រីគណបក្សប្រជាជនកាន់អំណាចយូរមកហើយ មានដូចជា៖ លោកនាយករដ្ឋមន្ត្រី ហ៊ុន សែន និងជាអនុប្រធានគណបក្សប្រជាជនកម្ពុជា ជា សម្ដេចអគ្គមហាសេនាបតីតេជោ។ លោក ជា ស៊ីម ប្រធានគណបក្សប្រជាជនកម្ពុជា ជា សម្ដេចអគ្គមហាធម្មពោធិសាល និងលោក ហេង សំរិន ប្រធានកិត្តិយសគណបក្សប្រជាជនកម្ពុជា ជា សម្ដេចអគ្គមហាពញាចក្រី។
ទាក់ទិនសកម្មភាពរបស់កាកបាទក្រហមកម្ពុជា នេះដែរ លោកនាយករដ្ឋមន្ត្រី ហ៊ុន សែន បានឲ្យដឹងក្នុងពិធីប្រារព្ធទិវាកាកបាទក្រហម អឌ្ឍចន្ទក្រហម ខួបលើកទី១៥០ ថា កាកបាទក្រហមកម្ពុជា បានសម្រេចសមិទ្ធផល និងទទួលជោគជ័យជាបន្តបន្ទាប់។
លោកបញ្ជាក់ថា ឆ្នាំ២០១២ កន្លងទៅ កាកបាទក្រហមកម្ពុជា បានអនុវត្តការងារជួយសង្គ្រោះជនរងគ្រោះ និងក្រុមគ្រួសារពីគ្រោះធម្មជាតិនានា ដូចជាខ្យល់ព្យុះ រាំងស្ងួត ទឹកជំនន់ និងគ្រោះមហន្តរាយដោយប្រការផ្សេងៗ បានចំនួន ២៨.៤៥៨គ្រួសារ។ លោកបន្តថា នៅដើមឆ្នាំ២០១៣ នៅគ្រាប្រទេសកម្ពុជា បានជួបប្រទះនូវខ្យល់កន្ត្រាក់ ធ្វើឲ្យផ្ទះរបស់ប្រជាពលរដ្ឋចំនួន ២.៧១៤ខ្នង ត្រូវខូចខាត និងមានមនុស្សស្លាប់ ១២នាក់នោះ កាកបាទក្រហមកម្ពុជា បានផ្ដល់អំណោយជួយសង្គ្រោះបន្ទាន់ដល់គ្រួសារជនរងគ្រោះបានទាន់ពេលវេលា។
ទិវាកាកបាទក្រហម អឌ្ឍចន្ទក្រហម ខួបលើកទី១៥០ នៅព្រឹកថ្ងៃទី៨ ខែឧសភា នេះ កាកបាទក្រហមកម្ពុជា ប្រមូលបានថវិកាជិត ១៥លានដុល្លារសហរដ្ឋអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។