លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត ឬ គ.ជ.ប បានឲ្យដឹងនៅថ្ងៃទី៣០ ខែមិថុនា ថា គិតរយៈពេល ៣ថ្ងៃ ដែលគណបក្សនយោបាយបើកយុទ្ធនាការឃោសនារកសំឡេងឆ្នោត ស្ថាប័ន គ.ជ.ប ទទួលបណ្ដឹងចំនួន ៩ករណី របស់គណបក្សនយោបាយ។ លោកថា បណ្ដឹងភាគច្រើនជាបណ្ដឹងគណបក្សប្រឆាំងទាក់ទងការរំខានក្បួនឃោសនា ឬការបំផ្លាញស្លាកសញ្ញាគណបក្ស។ លោកថា បណ្ដឹងចំនួន ៦ ក្នុងចំណោមបណ្ដឹងទាំង ៩ ស្ថាប័នរៀបចំការបោះឆ្នោតគ្រប់ជាន់ថ្នាក់ កំពុងរកដំណោះស្រាយ។
យុទ្ធនាការនេះ លោក យឹម សុវណ្ណ មន្ត្រីនាំពាក្យគណបក្សសង្គ្រោះជាតិ បានឲ្យដឹងថា មានភាពមិនប្រក្រតីជាច្រើនកើតមានក្នុងយុទ្ធនាការប៉ុន្មានថ្ងៃមកនេះ។ ក្នុងនោះមានករណីគណបក្សកាន់អំណាច បានប្រើសកម្មជនរបស់ខ្លួនមករំខានក្បួនឃោសនាគណបក្សសង្គ្រោះជាតិនៅតាមមូលដ្ឋាន។ ក្រៅពីនេះ លោក យឹម សុវណ្ណ អះអាងថា ក៏មានករណីបំផ្លាញស្លាកសញ្ញា និងហែកខិត្តប័ណ្ណគណបក្សសង្គ្រោះជាតិ ដែលបិទនៅតាមទីសាធារណៈថែមទៀត។
មន្ត្រីបក្សប្រឆាំងរូបនេះ បានស្នើឲ្យគ្រប់គណបក្សនយោបាយ ត្រូវមានសេចក្ដីថ្លៃថ្នូរ និងត្រូវធ្វើសកម្មភាពឃោសនាឲ្យស្របតាមបទបញ្ជា និងនីតិវិធីស្ដីពីការបោះឆ្នោត។ លោកចោទថា ករណីរំខានយុទ្ធនាការឃោសនាបោះឆ្នោតគណបក្សប្រឆាំងនៅតាមខេត្តក្រុងមួយចំនួន ភាគច្រើនបង្កឡើងដោយសកម្មជនបក្សប្រជាជនកម្ពុជា ហើយថា ករណីរំខាននេះ បក្សសង្គ្រោះជាតិ បានដាក់ពាក្យបណ្ដឹងជាបន្តបន្ទាប់ទៅកាន់គណៈកម្មការរាជធានី ខេត្ត រៀបចំការបោះឆ្នោត។
លោកបណ្ឌិត ហង្ស ពុទ្ធា ជានាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ដើម្បីការបោះឆ្នោតដោយសេរីនៅកម្ពុជា ហៅកាត់ថា និចហ្វិក (NICFEC) បានទទួលស្គាល់ថា ពិតជាមានករណីរំខានក្បួនឃោសនាគណបក្សប្រឆាំងផ្ដើមដោយសកម្មជនបក្សផ្សេងនៅតាមមូលដ្ឋានពិតមែន។
ទោះយ៉ាងណា លោកថា យុទ្ធនាការនេះមិនកើតមានអំពើហិង្សាធ្ងន់ធ្ងរគួរឲ្យកត់សម្គាល់កើតឡើងទេ នៅក្នុងប៉ុន្មានថ្ងៃមកនេះ។ យុទ្ធនាការនេះ លោក ហង្ស ពុទ្ធា បានស្នើឲ្យមេដឹកនាំគ្រប់គណបក្សនយោបាយ មានចរិតចាស់ទុំនយោបាយ ហើយមិនត្រូវបញ្ឆេះកំហឹងណាមួយដែលអាចនាំឲ្យសកម្មជនគាំទ្របក្សនីមួយៗ ឈានដល់ប្រើអំពើហិង្សាដាក់គ្នានោះទេ។
វិទ្យុអាស៊ីសេរី មិនអាចទាក់ទងមន្ត្រីគណបក្សប្រជាជនកម្ពុជា ដើម្បីបំភ្លឺជុំវិញភាពមិនប្រក្រតីនៃយុទ្ធនាការឃោសនាបោះឆ្នោតបានទេ នៅថ្ងៃទី៣០ ខែមិថុនា។ ប៉ុន្តែកន្លងមក លោក អ៊ក គីមហាន ប្រធាននាយកដ្ឋានបូកសរុបនៃខុទ្ទកាល័យគណៈកម្មាធិការកណ្ដាលគណបក្សប្រជាជនកម្ពុជា បានឲ្យដឹងថា បក្សខ្លួនគ្មាននយោបាយបញ្ជូនសកម្មជនទៅឆាឆៅ ឬអុកឡុកសកម្មភាពឃោសនាគណបក្សនយោបាយណាមួយទេ។
កាលបរិច្ឆេទនៃការបោះឆ្នោតជ្រើសរើសតំណាងរាស្ត្រអាណត្តិទី៥ នឹងធ្វើនៅថ្ងៃអាទិត្យ ទី២៨ ខែកក្កដា ឆ្នាំ២០១៣។ រីឯយុទ្ធនាការឃោសនាបោះឆ្នោតមានរយៈពេល ៣០ថ្ងៃ គឺចាប់ពីថ្ងៃទី២៧ ខែមិថុនា ដល់ថ្ងៃទី២៦ ខែកក្កដា ឆ្នាំ២០១៣។ មានគណបក្សចំនួន ៨ បានចុះឈ្មោះចូលរួមប្រកួតប្រជែង។
គណៈកម្មាធិការជាតិរៀបចំការបោះឆ្នោត បានកំណត់ថា សកម្មភាពឃោសនាដោយឧបករណ៍បំពងសំឡេង ត្រូវហាមឃាត់ចាប់ពីម៉ោង ១២ថ្ងៃត្រង់ ដល់ម៉ោង ២រសៀល ហើយថា គ្រប់សកម្មភាពឃោសនារបស់គណបក្សនយោបាយ ត្រូវឈប់សម្រាកនៅចន្លោះពីម៉ោង ១០យប់ ដល់ម៉ោង ៦ព្រឹក។ ការឃោសនាត្រូវចប់ ២៤ម៉ោង មុនថ្ងៃបោះឆ្នោតមកដល់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។