នៅពេលដែលគណៈកម្មាធិការជាតិរៀបចំការបោះឆ្នោត (គ.ជ.ប) ប្រកាសលទ្ធផលឆ្នោតផ្លូវការ មានន័យថា គណៈកម្មាធិការនេះលែងមានតួនាទីពាក់ព័ន្ធនឹងការបោះឆ្នោតជ្រើសតាំងតំណាងរាស្ត្រនីតិកាលទី៥ នេះទៀតហើយ។ តទៅទៀតគឺជាព្រះរាជតួនាទីរបស់ព្រះមហាក្សត្រក្នុងការសម្រេចអោយមានកិច្ចប្រជុំសភាលើកដំបូង និងការផ្ដល់សុពលភាពដល់អ្នកតំណាងរាស្ត្រដើម្បីចូលបំពេញតួនាទី។
កិច្ចប្រជុំសភាលើកដំបូង និងការស្បថចូលកាន់តំណែងរបស់សមាជិកសភា គឺជាជំហានបន្ទាប់ដែលនឹងចូលមកដល់ក្នុងពេលខាងមុខដ៏ខ្លី ទៅតាមការកោះអញ្ជើញរបស់ព្រះមហាក្សត្រ។
មាត្រា ៨២ថ្មីនៃរដ្ឋធម្មនុញ្ញបានចែងថា កិច្ចប្រជុំសភាលើកដំបូងនឹងធ្វើឡើងក្នុងរយៈពេល ៦០ថ្ងៃក្រោយការបោះឆ្នោត ទៅតាមការកោះអញ្ជើញរបស់ព្រះមហាក្សត្រ។ មានន័យថា គឺក្នុងរយៈពេល ៣សប្ដាហ៍ទៀត។
សមាជិកព្រឹទ្ធសភាគណបក្ស សម រង្ស៊ី លោក គង់ គាំ មានប្រសាសន៍កាលពីថ្ងៃអាទិត្យ ទី៨ ខែកញ្ញា ថា តាមការអនុវត្តជាធម្មតានៅអាណត្តិមុនៗ នៅពេលដែលព្រះមហាក្សត្រកោះអោយចូលប្រជុំ នោះសមាជិកសភាទាំងអស់នឹងមានវត្តមាន ដើម្បីទទួលយកអាសនៈរបស់ខ្លួន។ លោក គង់ គាំ បន្តថា ការផ្ដល់សុពលភាពអ្នកតំណាងរាស្ត្រអាចនឹងរអាក់រអួលដែរ ប្រសិនបើសមាជិកសភាគណបក្សដែលមានសំឡេងប្រកៀកប្រកិតគ្នាណាមួយចាប់ផ្ដើមជំទាស់ដំណើរការនេះ។
មិនខុសពីការលើកឡើងរបស់លោក គង់ គាំ ទេ គណបក្សសង្គ្រោះជាតិ ដែល គ.ជ.ប ប្រកាសថា ទទួលបានអាសនៈសភាចំនួន ៥៥ បានប្រកាសថា នឹងធ្វើមហាបាតុកម្មជាថ្មីទៀត ជំទាស់លទ្ធផលឆ្នោត។ ប្រជាពលរដ្ឋមួយចំនួនរំពឹងថា ព្រះមហាក្សត្រនឹងមានព្រះតម្រិះដោយផ្ដល់ឱកាសអោយគណបក្សដែលតវ៉ាបានទទួលយុត្តិធម៌ និងចាញ់ដោយអស់ចិត្ត។
អ្នកតំណាងរាស្ត្រគណបក្សប្រជាជនកម្ពុជា លោក ឈាង វុន មានប្រសាសន៍ថា នឹងពុំមានបញ្ហាអ្វីដែលនាំអោយមានការរាំងស្ទះឡើយ បើទោះជាគណបក្សប្រឆាំងមិនចូលរួមក៏ដោយ។
បើតាមលោក ឈាង វុន គណបក្សសង្គ្រោះជាតិ នឹងបាត់បង់អាសនៈរបស់ខ្លួនប្រសិនបើមិនព្រមចូលរួមបង្កើតសភាទៅតាមការកោះហៅរបស់ព្រះមហាក្សត្រទៅតាមច្បាប់។
នាយកប្រតិបត្តិនៃគណៈកម្មាធិការអព្យាក្រឹត និងយុត្តិធម៌ដើម្បីបោះឆ្នោតដោយសេរី និងត្រឹមត្រូវនៅកម្ពុជា ឬ និកហ្វិច លោក ហង្ស ពុទ្ធា មានប្រសាសន៍ថា ការតវ៉ារបស់គណបក្សណាមួយនៅក្នុងពេលនេះ គឺអាចមានឥទ្ធិពលក្នុងការដាក់សម្ពាធទៅលើគណបក្សនយោបាយដែលជាដៃគូ។ លោក ហង្ស ពុទ្ធា បន្តថា ព្រះមហាក្សត្រមានព្រះរាជតួនាទីសំខាន់ក្នុងការដោះស្រាយបញ្ហាក្នុងដំណាក់កាលនេះ។
ក្នុងលិខិតចុះថ្ងៃទី២ ខែកញ្ញា របស់គណបក្សសង្គ្រោះជាតិ បានលើកឡើងសុំព្រះមហាក្សត្រព្រះរាជអន្តរាគមន៍ និងធ្វើជាព្រះរាជអាជ្ញាកណ្ដាល ដោះស្រាយចំពោះភាពមិនប្រក្រតីក្នុងការបោះឆ្នោតប្រកបដោយតម្លាភាព និងយុត្តិធម៌ ដែលពលរដ្ឋម្ចាស់ឆ្នោតចង់បានស្របតាមស្មារតីនៃច្បាប់រដ្ឋធម្មនុញ្ញត្រង់មាត្រ ៨ និងមាត្រា ៩។ ប៉ុន្តែរហូតមកដល់ពេលនេះសំណូមពរនេះនៅពុំទាន់មានលទ្ធផលនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។