អាជ្ញាធរមានសមត្ថកិច្ច និងកងសន្តិសុខរាប់រយនាក់ ប្រដាប់ដោយដំបងឆក់ ខែល បានរារាំង និងវាយបង្ក្រាបទៅលើក្រុមយុវជន ព្រះសង្ឃ និងប្រជាពលរដ្ឋដែលព្យាយាមប្រមូលផ្តុំគ្នាធ្វើបាតុកម្មអហិង្សានៅពីមុខស្ថានទូតវៀតណាម នារាជធានីភ្នំពេញ នៅព្រឹកថ្ងៃទី៨ ខែកក្កដា។ សកម្មភាពបង្ក្រាបនេះបណ្តាលឲ្យប្រជាពលរដ្ឋមួយចំនួនរងរបួស ដោយសមត្ថកិច្ចវាយសំពងនឹងដំបងឆក់។
កាប្រមូលផ្តុំគ្នាតវ៉ានៅពីមុខស្ថានទូតវៀតណាម របស់សហព័ន្ធនិស្សិតបញ្ញវន្តកម្ពុជា ដឹកនាំដោយលោក ម៉ៅ ពិសេស រួមជាមួយសិស្ស និស្សិត ព្រះសង្ឃ ប្រជាពលរដ្ឋខ្មែរ និងមន្ត្រីគណបក្សសង្គ្រោះជាតិ ត្រូវបរាជ័យ ព្រោះត្រូវកម្លាំងបង្ក្រាបបាតុករ និងកងសន្តិសុខរុញច្រាន និងវាយសំពងដោយហិង្សា។
មានពលរដ្ឋមួយចំនួនរងរបួសនៅក្នុងសកម្មភាពវាយបង្ក្រាបរបស់កម្លាំងសមត្ថកិច្ច ហើយក្រុមបាតុករក៏បានគប់ ឬចោលដុំថ្មប៉ុន្មានដុំសំដៅមកសមត្ថកិច្ចវិញ មុនដកថយពីមុខស្ថានទូតវៀតណាម ទៅប្រមូលផ្តុំគ្នានៅជ្រុងម្ខាងនៃស្ថានទូតនេះ។
ក្រោយកម្លាំងសមត្ថកិច្ចរុញច្រាន ក្រុមប្រជាពលរដ្ឋ និងយុវជន បានទៅឈរនៅជ្រុងម្ខាងនៃស្ថានទូតវៀតណាម មានទីតាំងតាមបណ្ដោយផ្លូវព្រះមុនីវង្ស។ បន្ទាប់មកសមត្ថកិច្ចក៏បានអនុញ្ញាតឲ្យតំណាងពលរដ្ឋ និងមន្ត្រីគណបក្សប្រឆាំងមួយចំនួនយកញត្តិចូលទៅដាក់នៅស្ថានទូតវៀតណាម ប៉ុន្តែមន្ត្រីបក្សបក្សសង្គ្រោះជាតិ និងពលរដ្ឋគ្មានញត្តិក្នុងដៃ ដើម្បីដាក់ជូនស្ថានទូតវៀតណាម ទេ ដោយថ្លែងថា ញត្តិទាំងនោះត្រូវកម្លាំងសមត្ថកិច្ចរឹបអូសយក។
ការប្រមូលផ្តុំគ្នានេះ ក្រុមបាតុករបានស្រែកទាមទារឲ្យអ្នកនាំពាក្យស្ថានទូតវៀតណាម ប្រចាំកម្ពុជា ចេញមុខមកសុំទោសជាសាធារណៈចំពោះកំហុសឆ្គងដែលពលរដ្ឋខ្មែរកម្ពុជាក្រោម ចោទថា បានប្រើពាក្យប្រមាថដល់ពលរដ្ឋខ្មែរកម្ពុជាក្រោម និងមានបំណងបំភ្លៃប្រវត្តិសាស្ត្រនៃទឹកដីខ្មែរកម្ពុជាក្រោម។
លោក ម៉ៅ ពិសេស ប្រធានសហព័ន្ធនិស្សិតបញ្ញវន្តកម្ពុជា រួមជាមួយប្រជាពលរដ្ឋនិងសិស្សនិស្សិតថ្លែងថា ទឹកដីខ្មែរកម្ពុជាក្រោម ត្រូវប្រទេសបារាំង កាត់ប្រគល់ឲ្យគ្រប់គ្រងនៅឆ្នាំ១៩៤៩ មិនមែនដូចមន្ត្រីទូតវៀតណាម បានលើកឡើងថ្មីៗនេះថា ជាទឹកដីវៀតណាម ពីយូរលង់មកហើយនោះទេ។
តំណាងរាស្ត្រគណបក្សសង្គ្រោះជាតិ លោក រៀល ខេមរិន្ទ ដែលបានចូលរួមក្នុងបាតុកម្មនេះ បានទាមទារឲ្យមន្ត្រីស្ថានទូតវៀតណាម ចេញមុខមកសុំទោសជាសាធារណៈចំពោះមុខប្រជាពលរដ្ឋខ្មែរ។ ប៉ុន្តែមិនឃើញមានមន្ត្រីទូតវៀតណាម ចេញមកជួបពលរដ្ឋ ឬក៏សុំទោសតាមការទាមទារទេ។
លោកប្រដូចការដឹកនាំរបស់រដ្ឋាភិបាលកម្ពុជា ចំពោះប្រទេសវៀតណាម សព្វថ្ងៃ ដូចគ្នាអណ្ដើកក្នុងស្នូក ទោះត្រូវគេប្រមាថក្តី៖ «ឥឡូវនេះ យើងឃើញហើយថា សូម្បីតែយើងមកសុំឲ្យស្ថានទូតយួន សារភាពទទួលកំហុស សុំទោសប្រជាពលរដ្ឋខ្មែរដែលថា ដីកម្ពុជា ក្រោមជារបស់យួន។ ឥឡូវបងប្អូនឃើញហើយ ទង់ជាតិខ្មែរត្រូវបានគេហែកចោល។ តើបងប្អូនមានការឈឺចាប់ទេ? ឈឺចាប់ទេ?»។
ចំណែកលោក ម៉ម សូណង់ដូ នាយកវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ ដែលបានចូលរួមក្នុងពិធីជួបជុំនោះដែរ ក៏បានរិះគន់រដ្ឋាភិបាលដែលបញ្ជូនកម្លាំងច្រើនសន្ធឹកសន្ធាប់មកបង្ក្រាបការប្រមូលផ្តុំអហិង្សារបស់ប្រជាពលរដ្ឋ៖ «រឿងហ្នឹងមិនមែនជារឿងនយោបាយទេ គឺជាកិត្តិយសរបស់ជាតិខ្មែរ ទឹកដីខ្មែរ ហើយដើម្បីកូនចៅខ្មែរទៅថ្ងៃខាងមុខ ហើយបើខ្មែរមិនអើពើទេ យើងមិនបាច់ធ្វើជាជាតិខ្មែរទេ វានាំឲ្យខ្មាសសត្រូវ។ ហើយសព្វថ្ងៃហ្នឹង ដែលគេធ្វើបាបយើងបាន គឺដោយគេដឹងថា ហ៊ុន សែន សម្លុតយើងបានស្រេចតែចិត្ត ហើយអ្នកដឹកនាំគណបក្សប្រឆាំងនោះ ក៏កំសាកទៀត។ មូលហេតុហ្នឹងហើយបានជាយួន ចេះតែឡើងដៃឡើងៗ។ ហើយបើវាតិះដៀលយើងសព្វគ្រប់បែបយ៉ាង បើយើងមិនហ៊ានប្រឈមមុខ អាហ្នឹងយើងមិនបាច់ធ្វើជាជាតិខ្មែរទេ»។
ទាក់ទិនបញ្ហានេះ លោក ណៃ វង្សដា មន្ត្រីសិទ្ធិមនុស្សសមាគមអាដហុក ដែលតាមឃ្លាំមើលការប្រមូលផ្តុំ របស់ប្រជាពលរដ្ឋ និងសិស្សនិស្សិត នៅមុខស្ថានទូតវៀតណាម ថ្លែងថា មន្ត្រីស្ថានទូតវៀតណាម គួរមានភាពក្លាហាន និងហ៊ានទទួលខុសត្រូវចំពោះកំហុសឆ្គងរបស់ខ្លួនទាក់ទងប្រវត្តិសាស្ត្រទឹកដីខ្មែរកម្ពុជាក្រោម៖ «ដូចជាមិនឃើញមានចេញមកសុំទោសសុំអីទេ? ប៉ុន្តែ ឃើញមានចេតនាពីខាងស្ថានទូតហ្នឹងចំនួន ២ដង ដើម្បីមកទទួលយកញត្តិ។ លើកទី១ ដោយសារតែអត់មានញត្តិ ព្រោះញត្តិហ្នឹងត្រូវសមត្ថកិច្ចចាប់ហែកចោលអស់ទៅ អ៊ីចឹងអត់បានដាក់។ ហើយលើកទី២ ខាងក្រុមនិស្សិតហ្នឹង គេទៅយកសេចក្ដីថ្លែងការណ៍យកទៅដាក់ តែខាងស្ថានទូតគេបដិសេធ គេថា គេចង់ឲ្យមានពាក្យថាញត្តិ អត់ចង់បានពាក្យថាសេចក្ដីថ្លែងការណ៍ទេ។ ហើយខាងក្រុមយុវជនហ្នឹងគេអត់ព្រម។ គាត់ថា គាត់រៀបចំមកអ៊ីចឹង ឯកភាពគ្នាមកថាអ៊ីចឹង ឲ្យគាត់ទៅប្ដូរថាញត្តិម៉េចនឹងកើត? ដល់អ៊ីចឹងទៅខាងស្ថានទូតវៀតណាម ក៏មិនព្រមខាងយុវជនហ្នឹងក៏មិនព្រម អ៊ីចឹងក៏អត់បានដាក់ដូចគ្នាទៅ»។
ទោះយ៉ាងណា មន្ត្រីស្ថានទូតវៀតណាម មិនបានចេញមកជួប ឬសុំទោសជាសាធារណៈនៅចំពោះមុខប្រជាពលរដ្ឋនោះទេ នៅព្រឹកថ្ងៃទី៨ ខែកក្កដា។
វិទ្យុអាស៊ីសេរី មិនអាចទាក់ទងមន្ត្រីនាំពាក្យស្ថានទូតវៀតណាម ប្រចាំកម្ពុជា លោក ត្រឹង វ៉ាន់ថុង បានទេ តាមទូរស័ព្ទ នៅថ្ងៃទី៨ ខែកក្កដា។ ប៉ុន្តែកាលពីថ្ងៃទី៦ ខែមិថុនា លោកអះអាងថា បារាំងមិនបានកាត់ទឹកដីខ្មែរកម្ពុជាក្រោម ទៅឲ្យវៀតណាមទេ គឺដីកម្ពុជាក្រោមជាទឹកដីរបស់វៀតណាម តាំងពីយូរយារមកហើយ។
ចំណែកប្រជាពលរដ្ឋ សិស្ស និស្សិត និងព្រះសង្ឃខ្មែរកម្ពុជាក្រមរាប់រយនាក់និងអង្គ ក៏បានរំសាយការប្រមូលផ្តុំ និងបើកផ្លូវព្រះមុនីវង្ស នៅមុនម៉ោង ១២ថ្ងៃត្រង់។ ប៉ុន្តែពួកគេចិញ្ចឹមចិត្តក្នុងការប្រមូលផ្តុំជាបន្តបន្ទាប់ ដើម្បីទាមទារឲ្យមន្ត្រីស្ថានទូតវៀតណាម សុំទោសជាសាធារណៈចំពោះកំហុសឆ្គងក្នុងការបំភ្លៃប្រវត្តិសាស្ត្រទឹកដីខ្មែរកម្ពុជាក្រោមនៅថ្ងៃខាងមុខទៀត។
សមត្ថកិច្ចមិនបានចាប់ខ្លួនពលរដ្ឋណាម្នាក់ទេ នៅក្នុងការប្រមូលផ្តុំនិងសកម្មភាពប៉ះទង្គិចគ្នារវាងប្រជាពលរដ្ឋជាមួយកម្លាំងសមត្ថកិច្ចនៅពីមុខស្ថានទូតវៀតណាមនោះ។
អង្គការសិទ្ធិមនុស្សថ្កោលទោសការបង្ក្រាបរបស់សមត្ថកិច្ច
ទាក់ទិនបញ្ហានេះដែរ សមាគមអាដហុក ក៏បានចេញសេចក្ដីថ្លែងការណ៍ចុះថ្ងៃទី៨ ខែកក្កដា ដោយថ្កោលទោសចំពោះការប្រើប្រាស់កម្លាំងខុសច្បាប់ម្ដងហើយម្ដងទៀត របស់អាជ្ញាធរក្រុងភ្នំពេញ ដើម្បីបំផ្លាញសេរីភាពបញ្ចេញមតិរបស់ប្រជាពលរដ្ឋដែលធានាដោយរដ្ឋធម្មនុញ្ញនៃប្រទេសកម្ពុជា។
សមាគមអាដហុកបានចាត់ទុកសកម្មភាពបង្ក្រាបរបស់អាជ្ញាធរក្រុងភ្នំពេញ ឬអាជ្ញាធរតាមខណ្ឌមួយចំនួនមានដូចជា អាជ្ញាធរខណ្ឌចំការមន ខណ្ឌពោធិ៍សែនជ័យ និងខណ្ឌទួលគោក ដែលប្រើកម្លាំងសន្តិសុខខុសច្បាប់ដើម្បីវាយបង្ក្រាបទៅលើក្រុមបាតុករអហិង្សានិងរារាំងមិនឲ្យក្រុមបាតុករដាក់ញត្តិជូនស្ថានទូតវៀតណាមថាជាទង្វើខុសច្បាប់និងរំលោភសិទ្ធិមនុស្សធ្ងន់ធ្ងរនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។