លោកនាយករដ្ឋមន្ត្រី ហ៊ុន សែន ថ្លែងក្នុងពិធីចែកសញ្ញាបត្រដល់និស្សិតនៅកោះពេជ្រ នៅថ្ងៃទី២ ខែកុម្ភៈ ថា លោកនឹងមិនឲ្យរដ្ឋមន្ត្រី ៣រូបរបស់លោកចូលបំភ្លឺក្នុងរដ្ឋសភា តាមការកោះហៅរបស់តំណាងរាស្ត្រគណបក្សប្រឆាំងជាដាច់ខាត បើគណបក្សនេះមិនចូលប្រជុំសភាជាមុនទេ។
លោក ហ៊ុន សែន ដាក់លក្ខខណ្ឌចំនួនពីរទៅបក្សប្រឆាំងដើម្បីឲ្យប្រធានរដ្ឋសភាអនុញ្ញាតឲ្យរដ្ឋមន្ត្រីរបស់លោកទៅឆ្លើយបំភ្លឺតាមការកោះហៅរបស់តំណាងរាស្ត្រគណបក្សប្រឆាំង។លក្ខខណ្ឌទាំងពីរនោះគឺ ទី១ តំណាងរាស្ត្របក្សប្រឆាំងត្រូវតែធ្វើការក្នុងសភា ពោលគឺត្រូវចូលប្រជុំសភានៅរៀងរាល់សភាបើកអង្គប្រជុំមិនមែនទៅធ្វើវេទិកាអ្នកកាសែតនៅទីស្នាក់ការបក្សទេ។ ទី២ មិនត្រូវផ្ដល់ព័ត៌មានឲ្យអ្នកកាសែតថា ការឆ្លើយបំភ្លឺរបស់រដ្ឋមន្ត្រីដែលខ្លួនបានឆ្លើយនោះថា អត់បានការទេ នៅពេលដែលខ្លួនបានសួរ ហើយចម្លើយរបស់រដ្ឋមន្ត្រីនៅក្នុងអង្គប្រជុំថា ល្អ តែចេញពីប្រជុំថា មិនល្អនោះ។
កាលពីថ្ងៃទី៣១ មករា មន្ត្រីជាន់ខ្ពស់គណបក្សប្រឆាំងលោក សុន ឆ័យ ថា តំណាងរាស្ត្រគណបក្សប្រឆាំងនឹងកោះហៅរដ្ឋមន្ត្រី ៣រូប មកសួរនាំនៅរដ្ឋសភា គឺមានលោក ទៀ បាញ់ រដ្ឋមន្ត្រីក្រសួងការពារជាតិ លោក វេង សុខុន រដ្ឋមន្ត្រីក្រសួងកសិកម្ម និងលោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃខាងមុខ។
ជុំវិញការលើកឡើងរបស់លោក ហ៊ុន សែន នៅពេលនេះ អ្នកវិភាគឯករាជ្យ លោកបណ្ឌិត ឡៅ ម៉ុងហៃ បានលើកឡើងថា ការហាមមិនឲ្យរដ្ឋមន្ត្រីទៅឆ្លើយបំភ្លឺនៅសភានេះ គឺលោក ហ៊ុន សែន កំពុងរំលោភរដ្ឋធម្មនុញ្ញ និងបទបញ្ជាផ្ទៃក្នុងរដ្ឋសភា។
ក្រោយការលើកឡើងរបស់លោក ហ៊ុន សែន អគ្គលេខាធិការដ្ឋានរដ្ឋសភា ក៏ចេញសេចក្ដីប្រកាសភ្លាមៗ ថា រដ្ឋសភាសម្រេចផ្អាកបញ្ជូនសំណើកោះហៅរដ្ឋមន្ត្រីមកបំភ្លឺចំពោះគណៈកម្មការនានានៃរដ្ឋសភារបស់បក្សក្រៅរដ្ឋាភិបាលជាបណ្ដោះអាសន្ន ក្នុងករណីតំណាងរាស្ត្រទាំងនោះមិនមកធ្វើការក្នុងសភាជាប្រក្រតីនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។