អ្នកនយោបាយ និងអ្នកវិភាគសង្គម បានរិះគន់សារនយោបាយរបស់លោក ហ៊ុន សែន ដែលលោកអះអាងពីការសោកស្ដាយមិនបានកម្ចាត់ក្រុមប្រឆាំងក្នុងពេលធ្វើបាតុកម្មកាលពីឆ្នាំ២០១៣ អោយអស់ ហើយបែរជាបន្តទុកអោយមកដល់ពេលនេះ។
ប្រតិកម្មនេះ ក្រោយពេលមួយថ្ងៃប៉ុណ្ណោះ ដែលលោកនាយករដ្ឋមន្ត្រីបង្ហាញពីវិប្បដិសារីរបស់លោកដែលបន្តទុកឲ្យក្រុមប្រឆាំងអាចមានឱកាសរស់រានមានជីវិតមកដល់ពេលនេះ។
ថ្លែងនៅក្នុងពិធីជួបជុំជាមួយកម្មកររោងចក្រកាត់ដេរ ប្រមាណ ៥ពាន់នាក់នៅកោះពេជ្រ កាលពីថ្ងៃទី១៩ ខែវិច្ឆិកា លោក ហ៊ុន សែន បានបង្ហាញអារម្មណ៍ហាក់តក់ស្លុត ដោយចោទថា ក្រោយលោកដឹងថា ក្រុមគណបក្សប្រឆាំងរៀបចំផែនការក្រោមការចាត់តាំងដ៏ត្រឹមត្រូវ ផ្ដួលរំលំរដ្ឋាភិបាលរបស់លោក។
ប្រធានគណបក្សប្រជាជនកម្ពុជា និងជានាយករដ្ឋមន្ត្រីផងនោះ លោក ហ៊ុន សែន អះអាងថា ប្រសិនបើលោកដឹងផែនការទាន់តាំងពីពេលនោះ ម្ល៉េះនៅថ្ងៃនេះគឺជាខួបបុណ្យសពរបស់ក្រុមអ្នកប្រឆាំងបាត់ទៅហើយ៖ «ខ្ញុំភ្ញាក់ផ្អើលដែរ ទើបតែនឹងមើលឃើញ។ បើខ្ញុំដឹងរឿងហ្នឹងតាំងពីហ្នឹង ប្រហែលជាចុងឆ្នាំ២០១៣ និងដើមឆ្នាំ២០១៤ ពួកនេះងាប់អស់ហើយ។ ល្ងាចថ្ងៃទី១៥ ទើបខ្ញុំបានមើលឃើញ គេកំណត់យកថ្ងៃទី២៩ ខែធ្នូ ឆ្នាំ២០១៣ ជាថ្ងៃផ្ដាច់ព្រ័ត្រផ្ដួលរំលំយើង។ បើខ្ញុំដឹងពីពេលហ្នឹង អ្នកទាំងនេះ ងាប់តាំងពីពេលនោះ។ ថ្ងៃនេះជាថ្ងៃបុណ្យខ្មោចទាំងអ្នកនេះទៀត»។
ការលើកឡើងបែបនេះរបស់លោក ហ៊ុន សែន គឺលោកសំដៅដល់ព្រឹត្តិការណ៍បាញ់បង្ក្រាបបាតុកម្មនៅតាមបណ្ដោយផ្លូវវ៉េងស្រេង កាលពីចុងឆ្នាំ២០១៣ និងដើមឆ្នាំ២០១៤។
ប្រតិកម្មនឹងសារនយោបាយរបស់លោក ហ៊ុន សែន នេះ ទាំងអ្នកនយោបាយ និងអ្នកវិភាគសង្គមចាត់ទុកថា នេះជាការប្រមាថដែលមិនអាចទទួលយកបានឡើយ ហើយជារឿងដែលធ្ងន់ធ្ងរបំផុតថែមទៀត។ ម្យ៉ាងលោក ហ៊ុន សែន ក្នុងតួនាទីជាមេដឹកនាំផង ការប្រើភាសាមិនគប្បីបែបនេះ គឺបានរួមចំណែកប្រព្រឹត្តបទឧក្រិដ្ឋធ្ងន់ធ្ងរបំផុត។
លោកបណ្ឌិត ឡៅ ម៉ុងហៃ អ្នកវិភាគសង្គម និងនយោបាយ ហៅការថ្លែងរបស់លោក ហ៊ុន សែន នេះថាជាបទល្មើសដែលមិនអាចអត់ឱនឲ្យបានទេ។ លោកបន្តថា សម្ដីរបស់មេដឹកនាំមួយ វាគួរតែមានសេចក្ដីថ្លៃថ្នូរ និងមានសីលធម៌ខ្ពស់ជាងនេះ។
អ្នកវិភាគនយោបាយជើងចាសរូបនេះ ចាត់ទុកថា ទង្វើរបស់លោកនាយករដ្ឋមន្ត្រីនេះ គឺបានទុកច្បាប់ដែលធានាពីសិទ្ធិ និងកាតព្វកិច្ចការពារពលរដ្ឋទៅជារឿងឥតប្រយោជន៍ទៅវិញ។ មិនតែប៉ុណ្ណោះ ទាំងច្បាប់ និងបទដ្ឋាននានា ដែលបានបញ្ញត្តិរួចហើយ វាទៅជារឿងដែលបម្រើឲ្យក្រុមរបស់លោក ហ៊ុន សែន ប៉ុណ្ណោះ ម្យ៉ាងនេះជាការប្រមាថយ៉ាងធ្ងន់បំផុត៖ «ប្រសាសន៍នេះដូចជាឃោរឃៅបន្តិច ក្នុងនាមជាមេដឹកនាំ វាដូចជាមិនត្រឹមត្រូវទេ ហើយមួយទៀត វាមិនត្រូវនឹងវិន័យរបស់កងទ័ពទៅទៀត។ ខុសនឹងរដ្ឋធម្មនុញ្ញយើងដែលថា ប្រជាពលរដ្ឋពុំមានទោសប្រហារជីវិតទេ»។
បើទោះជាបែបណា លោកនាយករដ្ឋមន្ត្រីក៏បានឌឺដងឲ្យអតីតមេបក្សប្រឆាំងគឺលោក សម រង្ស៊ី ដែរ។លោក ហ៊ុន សែន ដែលថ្លែងមិនបញ្ចេញឈ្មោះបានបបួលឲ្យលោក សម រង្ស៊ី ដែលបានតែអួតថា មិនចាំបាច់រង់ចាំដល់ឆ្នាំ២០១៨ ចាំវិលចូលស្រុកទេ គឺមកពេលនេះតែម្ដង វាឆាប់បានដឹងសខ្មៅ។ម្យ៉ាងវិញទៀត ការប្រកាសរក្សារចនាសម្ព័ន្ធបក្សក្រោយរំលាយនេះ លោក ហ៊ុន សែន ចំអកឲ្យថា នេះហើយជាឥទ្ធិពលនៃសាលដីការបស់តុលាការ ត្រូវចាំផង។
យ៉ាងនេះក្ដី អ្នកនយោបាយគណបក្សប្រជាធិបតេយ្យមូលដ្ឋានយល់ឃើញថា ចាប់ពីពេលនេះទៅ អ្នកនយោបាយនៅកម្ពុជា ជាពិសេសទាំងលោក ហ៊ុន សែន និងមេបក្សប្រឆាំង គួរមានភាពចាស់ទៅជាងមុន។
លោក សាម អ៊ីន អ្នកនាំពាក្យគណបក្សប្រជាធិបតេយ្យមូលដ្ឋាន បដិសេធថា លោកពុំបានដឹងពីសារនយោបាយរបស់លោក ហ៊ុន សែន នេះទេ។ ប៉ុន្តែអ្នកនយោបាយរូបនេះ យល់ឃើញថា ពលរដ្ឋកម្ពុជា អភ័ព្វណាស់ដែលកើតមកសម្បូរតែអ្នកនយោបាយលាបពណ៌ឲ្យគ្នាដើម្បីចង់ឈ្នះចាញ់។
លោកបន្តថា អ្នកនយោបាយខ្មែរនៅតែប្រកាន់ខ្លួន ចាញ់ហើយមិនព្រមទទួលស្គាល់ថាចាញ់ នេះជាគ្រោះថ្នាក់បំផុតសម្រាប់ជាតិ៖ «ការប្រើភាសាចោទប្រកាន់គ្នាទៅវិញទៅមកអ្នកនេះក្បត់ជាតិ អ្នកនោះក្បត់ជាតិ ជាភាសាមួយដែលនឹងធ្វើឲ្យជនជាតិខ្មែរយើងត្រូវអាប់ឱន ហើយនិងបន្តឈ្លោះប្រកែកគ្នា។ ការចង់ចាញ់ឈ្នះ ស៊ីសាច់ហុតឈាម និងជេរប្រមាថគ្នា យើងគិតថា ជាគំរូមិនល្អសម្រាប់ក្មេងជំនាន់ក្រោយ»។
មកដល់ពេលនេះ លោក ហ៊ុន សែន នៅតែទម្លាក់កាទទួលខុសត្រូវ ប្រឆាំងនឹងអំពើបាញ់ប្រហារប្រឆាំងកម្មករនៅផ្លូវវ៉េងស្រេង នោះថា គណបក្សសង្គ្រោះជាតិ គឺជាអ្នកអុជអាល និងនាំភ្លើង។
រំលឹកពីមេដឹកនាំយោធាផ្ដាច់ការ និងកាន់អំណាចជិត ៤០ឆ្នាំ មូហ្គាបេ នៅប្រទេសហ្ស៊ីមបាវ៉េ ដូចរូបលោកដែរនោះ លោក ហ៊ុន សែន ប្រៀបធៀបថា កម្ពុជាគឺខុសពីប្រទេសអាហ្វ្រិកមួយនេះនៅត្រង់ថា កម្ពុជាពុំមានវិបត្តិនយោបាយទេ គឺមានតែអ្នកនយោបាយជួបវិបត្តិ។ ជាងនេះទៀត ការគ្រប់គ្រងរបស់លោកគឺអនុវត្តច្បាប់ និងគោរពគោលការណ៍ប្រជាធិបតេយ្យទៀតផង ស្របពេលសហគមន៍ជាតិ និងអន្តរជាតិ កំពុងថ្កោលទោសថា លោកនាយករដ្ឋមន្ត្រី ហ៊ុន សែន កំពុងនាំកម្ពុជា ទៅរបបផ្ដាច់ការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។