កម្លាំងប្រដាប់អាវុធចម្រុះ មានប៉ូលិស ទាហាន និងកងរាជអាវុធហត្ថជាដើម ត្រូវបានគេដាក់ពង្រាយនៅតាមផ្លូវបំបែក ឬផ្លូវសាធារណៈនានា ទាំងក្នុងនិងជាយរាជធានីភ្នំពេញ នៅថ្ងៃពុធ ទី១៤ ខែសីហា ឆ្នាំ២០១៣។
បញ្ហានេះ ទាំងសង្គមស៊ីវិលនិងប្រជាពលរដ្ឋបានស្នើដល់រដ្ឋាភិបាលឲ្យបញ្ឈប់សកម្មភាពចល័តទ័ពជាបន្ទាន់ ព្រោះសកម្មភាពនេះអាចជាដើមហេតុនាំឲ្យតម្លៃទំនិញសព្វសារពើបន្តឡើងថ្លៃជាបន្តបន្ទាប់។សកម្មភាពនេះនាំឲ្យប្រជាពលរដ្ឋ ឬអាជីវករ មិនថាតែអ្នករស់នៅរាជធានីភ្នំពេញទេ មានការភ័យខ្លាច សូម្បីកសិកររស់នៅតាមបណ្ដាខេត្តនានា ក៏ព្រួយបារម្ភនិងភ័យខ្លាចរហូតដល់មានអាណាព្យាបាលខ្លះបានទូរស័ព្ទហៅកូនៗ ដែលធ្វើការនៅភ្នំពេញ ឲ្យវិលទៅស្រុកកំណើតវិញទៀតផង។
អាជីវករលក់គ្រឿងអលង្ការនៅផ្សារចាស់ក្នុងរាជធានីភ្នំពេញ លោក សៀន ស៊ុនហ៊ួ បានឲ្យដឹងនៅថ្ងៃពុធ ទី១៤ ខែសីហា ថា រូបគាត់បានឃើញសកម្មភាពចល័តកម្លាំងប្រដាប់អាវុធតាមរថយន្ត មានទាហាន និងកងរាជអាវុធហត្ថជាដើម។ លោកថា សកម្មភាពនេះសម្រាប់ពួកគាត់ជាអាជីវករលក់ដូរ រឿងអលង្ការមានការព្រួយបារម្ភពីសុវត្ថិភាពជាទីបំផុត។
លោកមិនយល់ចំពោះរាល់សកម្មភាពរបស់រដ្ឋាភិបាលក្នុងការចល័តកម្លាំងទ័ព និងសព្វាវុធនៅក្រោយការបោះឆ្នោតជាតិ អាណត្តិទី៥ កើតមានបញ្ហាអ្វីកើតឡើងទេ ហើយស្នើឲ្យរដ្ឋាភិបាលបញ្ឈប់សកម្មភាពចល័តទ័ពនាំឲ្យពលរដ្ឋភ័យខ្លាចនេះ។
ដូចគ្នាដែរ ស្ត្រីជាអាជីវករលក់គ្រឿងអលង្ការមានមាស ឬផ្លាកទីននៅផ្សារកណ្ដាល និងផ្សារធំថ្មី បានរៀបរាប់ក្នុងលក្ខខណ្ឌមិនបញ្ចេញឈ្មោះ និងសំឡេងនៅស្តង់លក់ដូររបស់ខ្លួនថា ពួកគេព្រួយបារម្ភចំពោះសកម្មភាពចល័តកម្លាំងទ័ព និងសព្វាវុធរបស់រដ្ឋាភិបាលប៉ុន្មានថ្ងៃមកនេះ។
ក្រុមអាជីវករបានត្អូញត្អែរថា ក្រោយការបោះឆ្នោតជាតិ កាលពីថ្ងៃទី២៨ ខែកក្កដា របរលក់ដូរគ្រឿងតុបតែងខ្លួនរបស់ពួកគាត់មិនសូវមានអតិថិជនមករកទិញច្រើនដូចមុនបោះឆ្នោតទេ។ ក្រុមអាជីវករបានចាត់ទុកការចល័តកម្លាំងប្រដាប់អាវុធចម្រុះចូលមកទីក្រុងភ្នំពេញ របស់រដ្ឋាភិបាល ថាជាសកម្មភាពគំរាមកំហែង និងបំភិតបំភ័យដល់ប្រជាពលរដ្ឋ និងការរករបរទទួលទានរបស់ពួកគេ។
ចំណែកអ្នកជួសជុលយានយន្តនិងលក់គ្រឿងបន្លាស់ម្ដុំផ្លូវភ្លោះ មន្ទីរពេទ្យព្រះអង្គឌួង លោក ជួន វិសុទ្ធ ក៏មិនពេញចិត្តសកម្មភាពពង្រាយកម្លាំងប្រដាប់អាវុធ ក្នុងរាជធានីភ្នំពេញ របស់រដ្ឋាភិបាលនេះដែរ។ លោកស្នើឲ្យរដ្ឋាភិបាលត្រូវបញ្ឈប់រូបភាពបំភិតបំភ័យតាមរយៈការបង្ហាញកម្លាំងទ័ព និងសព្វាវុធនេះតទៅទៀត។ លោកថា ភាពមិនប្រក្រតី ឬបញ្ហាដែលកើតមានក្នុងពេលបោះឆ្នោត គួរតែរដ្ឋាភិបាល ឬគណបក្សនយោបាយដែលទទួលបានការគាំទ្រពីម្ចាស់ឆ្នោតជួបពិភាក្សារកដំណោះស្រាយដោយសន្តិវិធីជាជាងបង្ហាញសាច់ដុំដាក់គ្នា។ដោយឡែកមន្ត្រីរាជការ យុវជន និងអ្នកប្រកបរបរសេវាដឹកជញ្ជូនជាលក្ខណៈគ្រួសារ ក៏បានចាត់ទុកសកម្មភាពចល័តកងទ័ព និងសព្វាវុធពីតាមខេត្តចូលក្នុងរាជធានីភ្នំពេញ ថាជាដើមហេតុនាំឲ្យតម្លៃទំនិញកើនតម្លៃខ្ពស់ ហើយរដ្ឋាភិបាលត្រូវបញ្ឈប់សកម្មភាពចល័តទ័ពនេះជាបន្ទាន់។
មិនមែនមានតែប្រជាពលរដ្ឋទេដែលព្រួយបារម្ភពេលឃើញសកម្មភាពចល័តកម្លាំងទ័ព និងគ្រឿងសព្វាវុធចូលទីក្រុងភ្នំពេញ។ ក្រុមអង្គការសង្គមស៊ីវិល ដែលធ្វើការពាក់ព័ន្ធការងារបោះឆ្នោត និងសិទ្ធិមនុស្សក៏មានការព្រួយបារម្ភដូចគ្នាដែរ។
កាលពីថ្ងៃទី៩ ខែសីហា ឆ្នាំ២០១៣ មានអង្គការសង្គមស៊ីវិលចំនួន ១០ បានស្នើជួបជាមួយលោក ស ខេង រដ្ឋមន្ត្រីក្រសួងមហាផ្ទៃ ដើម្បីស្នើបំភ្លឺពីសកម្មភាពចល័តកងទ័ពចូលទីក្រុងភ្នំពេញ ក្រោយការបោះឆ្នោតជាតិ។
បញ្ហានេះ មន្ត្រីសង្គមស៊ីវិលព្រួយបារម្ភអាចកើតមានអំពើហិង្សា និងអំពាវនាវឲ្យគណបក្សឈ្នះអាសនៈក្នុងរដ្ឋសភាអង្គុយដោះស្រាយបញ្ហាជាមួយគ្នាដោយសន្តិវិធីដើម្បីបញ្ចៀសអំពើហិង្សានានា ដែលអាចកើតឡើងចំពោះលទ្ធផលបោះឆ្នោត។
ឆ្លើយតបបញ្ហានេះ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានឲ្យដឹងនៅថ្ងៃទី៩ ខែសីហា ឆ្នាំ២០១៣ ថា ការចល័តទ័ពប៉ុន្មានថ្ងៃមកនេះ គឺជាការត្រៀមការពារសន្តិសុខ និងស្ថិរភាពសង្គមក្រោយការបោះឆ្នោត។
បន្ថែមលើនេះ លោកឧត្ដមសេនីយ៍ឯក ណឹម សុវត្ថិ អគ្គនាយកអគ្គនាយកដ្ឋាននយោបាយកិច្ចការបរទេសនៃក្រសួងការពារជាតិកម្ពុជា បានឲ្យដឹងនៅថ្ងៃទី១៣ ខែសីហា ឆ្នាំ២០១៣ ថា គ្មានអ្វីពលរដ្ឋត្រូវព្រួយបារម្ភចំពោះសកម្មភាពពង្រាយកម្លាំងទ័ពរបស់រដ្ឋាភិបាលនេះទេ។ លោកថា សកម្មភាពនេះជាការរក្សាសន្តិសុខនិងសុវត្ថិភាពសង្គម។
កម្លាំងរាជអាវុធហត្ថ និងសមត្ថកិច្ចផ្សេងទៀត ដែលកំពុងឈរជើងនៅតាមផ្លូវសាធារណៈនានាទាំងក្នុង និងជាយរាជធានីភ្នំពេញ នៅថ្ងៃទី១៤ ខែសីហា ឆ្នាំ២០១៣ ពួកគេមានការរារែក មិនចង់ឆ្លើយតបចំពោះវត្តមានរបស់ពួកគេទេ។ ប៉ុន្តែក្រោយមកនិយាយក្នុងលក្ខខណ្ឌមិនបញ្ហាអត្តសញ្ញាណថា វត្តមានពួកគេគឺធ្វើតាមបញ្ហាថ្នាក់លើ និងត្រូវគេឲ្យមកយាមកាមដើម្បីការពារសណ្ដាប់ធ្នាប់សង្គម។
លោក កឹម សុខា អនុប្រធានគណបក្សសង្គ្រោះជាតិ ក៏បានអំពាវនាវដល់រដ្ឋាភិបាលត្រូវបញ្ឈប់សកម្មភាពនេះជាបន្ទាន់។ មេបក្សប្រឆាំងរូបនេះបានចាត់ទុកការពង្រាយកម្លាំងទ័ព ថាជាការគំរាមកំហែងនិងបំភិតបំភ័យប្រជាពលរដ្ឋឲ្យខ្លបខ្លាច។ សកម្មភាពពង្រាយកម្លាំងទ័ព និងសព្វាវុធរបស់រដ្ឋាភិបាលបានកើតមានក្រោយពេលគណបក្សប្រឆាំង គឺគណបក្សសង្គ្រោះជាតិ បានទាមទារឲ្យរដ្ឋាភិបាលបង្កើតគណៈកម្មការចម្រុះឯករាជ្យមួយដើម្បីអង្កេតពីភាពមិនប្រក្រតីក្នុងការបោះឆ្នោតសភាអាណត្តិទី៥ ដែលបក្សប្រឆាំងអះអាងថា កើតមានភាពមិនប្រក្រតី ឬមានការលួចបន្លំសន្លឹកឆ្នោត។
ការទាមទារនេះ គណបក្សប្រឆាំងបានព្រមានដឹកនាំប្រជាពលរដ្ឋធ្វើមហាបាតុកម្មប្រឆាំងលទ្ធផលបោះឆ្នោតនេះ បើគ្មានការស៊ើបអង្កេតឲ្យបានត្រឹមត្រូវទេនោះ។
បញ្ហានេះដែរ អង្គការសង្គមស៊ីវិលចំនួន ១៥ស្ថាប័នដែលធ្វើការងារពាក់ព័ន្ធសិទ្ធិមនុស្ស ការបោះឆ្នោត និងកម្មករនៅថ្ងៃទី១៣ ខែសីហា ឆ្នាំ២០១៣ បានរួមគ្នាចេញសេចក្ដីថ្លែងការណ៍ថ្កោលទោស និងរិះគន់ចំពោះការពង្រាយកងកម្លាំងប្រដាប់អាវុធរបស់រដ្ឋាភិបាលក្នុងទីក្រុងភ្នំពេញ ជាពិសេសការផ្ដល់ និងការទទួលយកគ្រឿងសព្វាវុធពីប្រទេសចិន កាលពីថ្ងៃទី៣០ ខែកក្កដា។
ក្រុមអង្គការសង្គមស៊ីវិលបានអំពាវនាវដល់កងកម្លាំងប្រដាប់អាវុធទាំងអស់ឲ្យវិលទៅមូលដ្ឋានដើមរៀងៗខ្លួនវិញ និងបញ្ចប់ជាបន្ទាន់នូវរាល់ទម្រង់នៃការគំរាមកំហែងនានា ដែលនាំឲ្យមានការភ័យខ្លាចដល់ប្រជាពលរដ្ឋ។
ជាងនេះ សម្ព័ន្ធសហជីពក៏បានទាមទារឲ្យមានការស៊ើបអង្កេតដ៏ឯករាជ្យ និងមានតម្លាភាពមួយទៅលើភាពមិនប្រក្រតីទាំងឡាយនៃការបោះឆ្នោតជាតិអាណត្តិទី៥ ដែលអាចជឿទុកចិត្តបាន ដើម្បីធានាឲ្យមានស្ថិរភាពសង្គម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។