ពលរដ្ឋ​មួយ​ចំនួន​នៅ​រតនគិរី​បាត់​ឈ្មោះ​ពី​បញ្ជី​បោះឆ្នោត

មន្ត្រី​គណៈកម្មការ​ឃុំ​រៀបចំ​ការ​បោះឆ្នោត​នៅ​ខេត្ត​រតនគិរី អះអាង​ថា ប្រជាពលរដ្ឋ​ក្នុង​ឃុំ​មាន​ឈ្មោះ​ក្នុង​ប័ណ្ណ​ព័ត៌មាន​បោះឆ្នោត ប៉ុន្តែ​ពួក​គាត់​ខ្លះ​បាត់​ឈ្មោះ​ពី​បញ្ជី​បោះឆ្នោត។ មន្ត្រី​គណបក្ស​សង្គ្រោះ​ជាតិ នៅ​មូលដ្ឋាន​នោះ​កត់​សម្គាល់​ថា ប្រជាពលរដ្ឋ​ដែល​បាត់​ឈ្មោះ​ពី​បញ្ជី​បោះឆ្នោត​មួយ​ផ្នែក​ជា​សកម្មជន ឬ​ប្រជាពលរដ្ឋ​មិន​គាំទ្រ​គណបក្ស​ប្រជាជន​កម្ពុជា។

0:00 / 0:00

មន្ត្រី​គណបក្ស​សង្គ្រោះ​ជាតិ ប្រចាំ​ខេត្ត​រតនគិរី អំពាវនាវ​សុំ​ឲ្យ​គណៈកម្មការ​ខេត្ត​រៀបចំ​ការ​បោះឆ្នោត​ខេត្ត​រតនគិរី (គ.ខ.ប) ស៊ើប​អង្កេត​ករណី​បាត់​ឈ្មោះ​ប្រជាពលរដ្ឋ​ពី​បញ្ជី​បោះឆ្នោត​សម្រាប់​ការ​បោះឆ្នោត​ជ្រើស​រើស​តំណាង​រាស្ត្រ​អាណត្តិ​ទី៥​នេះ។

សេចក្ដី​អំពាវនាវ​នេះ​ធ្វើ​ឡើង​នៅ​ថ្ងៃ​អង្គារ ទី២៣ ខែ​កក្កដា ៥​ថ្ងៃ​មុន​ពេល​ការ​បោះឆ្នោត និង​បន្ទាប់​ពី​មន្ត្រី​គណៈកម្មការ​ឃុំ​រៀបចំ​ការ​បោះឆ្នោត​ឃុំ​ញ៉ាង ស្រុក​អណ្ដូងមាស អះអាង​ថា បាន​រក​ឃើញ​ប្រជាពលរដ្ឋ​ប្រមាណ ៦% ក្នុង​ឃុំ​មាន​ឈ្មោះ​ក្នុង​ប័ណ្ណ​ព័ត៌មាន​បោះឆ្នោត ប៉ុន្តែ​ពួក​គាត់​រក​មិន​ឃើញ​ឈ្មោះ​ក្នុង​បញ្ជី​បោះឆ្នោត។

ប្រធាន​គណៈកម្មការ​ប្រតិបត្តិ​គណបក្ស​សង្គ្រោះ​ជាតិ ស្រុក​អណ្ដូងមាស អ្នកស្រី សួន សុខាន់ មាន​ប្រសាសន៍​បញ្ជាក់​ថា សកម្មជន​គណបក្ស​សង្គ្រោះ​ជាតិ មួយ​ចំនួន​ខកខាន​ចូលរួម​ធ្វើ​ជា​អ្នក​សង្កេតការណ៍​តំណាង​គណបក្ស និង​បាត់បង់​សិទ្ធិ​បោះឆ្នោត ប្រសិន​ពលរដ្ឋ​ទាំង​នោះ​មិន​មាន​ឈ្មោះ​ក្នុង​បញ្ជី​ឈ្មោះ​បោះឆ្នោត។ អ្នកស្រី​កត់​សម្គាល់​ថា ទំនង​ជា​ចេតនា​បំបាត់​សំឡេង​ឆ្នោត​របស់​សកម្មជន​គាំទ្រ​គណបក្ស​ប្រឆាំង​នៅ​មូលដ្ឋាន ទើប​កើត​មាន​បញ្ហា​បែប​នេះ៖ «យក​ឈ្មោះ​ហ្នឹង​ថា​ដាក់​សង្កេតការណ៍​ទៅ​មើល​ក្នុង​បញ្ជី​អត់​មាន។ រដ្ឋបាល ស៊ិក ហ្នឹង ក៏​ជួយ​មើល​ដែរ អត់​ឃើញ បាន​គាត់​ប្រាប់​ខ្ញុំ​ថា អូ​មេ​ភូមិ​មក​ពិនិត្យ​សុទ្ធ​តែ​បាត់​អ៊ីចឹង​ទាំងអស់»

មន្ត្រី​រដ្ឋបាល​នៃ​គណៈកម្មការ​ឃុំ​រៀបចំ​ការ​បោះឆ្នោត​ឃុំ​ញ៉ាង លោក ប៊ុន ថន កាល​ពី​ថ្ងៃ​ច័ន្ទ មាន​ប្រសាសន៍​ថា នៅ​ក្នុង​ឃុំ​ញ៉ាង មាន​ប្រជាពលរដ្ឋ​ប្រមាណ ៧% រក​ឈ្មោះ​មិន​ឃើញ​ក្នុង​បញ្ជី​បោះឆ្នោត។ លោក​កត់​សម្គាល់​ថា ប្រជាពលរដ្ឋ​ដែល​រក​មិន​ឃើញ​ឈ្មោះ​ក្នុង​បញ្ជី​ឈ្មោះ​បោះឆ្នោត មួយ​ចំនួន​ធ្លាប់​មាន​ឈ្មោះ និង​បាន​បោះឆ្នោត​កាល​ពី​អាណត្តិ​បោះឆ្នោត​ជ្រើស​រើស​ក្រុម​ប្រឹក្សា​ឃុំ-សង្កាត់​កន្លង​ទៅ​នេះ៖ «បាត់​ឈ្មោះ​ដែល​គេ​រក​មិន​ឃើញ​ហ្នឹង ខ្លះ​ឈ្មោះ​ចាស់ តែ​គេ​មក​រក​មិន​ឃើញ​នៅ​បញ្ជី​ចុង​ក្រោយ​នេះ​ខ្លាច​គេ​វាយ​ឈ្មោះ​ផ្សេង ដល់​ប័ណ្ណ​ព័ត៌មាន​ឈ្មោះ​ផ្សេង»

ទាក់ទិន​ករណី​នេះ​ដែរ លេខា​គណៈកម្មការ​ដើម្បី​ការ​បោះឆ្នោត​ដោយ​សេរី និង​យុត្តិធម៌​នៅ​កម្ពុជា ខុមហ្វ្រែល (COMFREL) ខេត្ត​រតនគិរី លោក ជួន ភីនដារ៉ា មាន​ប្រសាសន៍​បញ្ជាក់​ថា ការ​បាត់​ឈ្មោះ​ប្រជាពលរដ្ឋ​មិន​មាន​ក្នុង​បញ្ជី​បោះឆ្នោត កើត​មាន​នៅ​ឃុំ​ដទៃ​ទៀត ជា​ពិសេស​ប្រជាពលរដ្ឋ​ដែល​បាត់​ឈ្មោះ​មួយ​ចំនួន​ជា​សកម្មជន​គណបក្ស​សង្គ្រោះ​ជាតិ។ លោក​បន្ត​ថា នេះ​គឺ​ជា​ភាព​មិន​ប្រក្រតី​មួយ​ដែល​ពាក់ព័ន្ធ​ទៅ​នឹង​សិទ្ធិ​បោះឆ្នោត​របស់​ប្រជាពលរដ្ឋ។ ដូច្នេះ ប្រជាពលរដ្ឋ​មិន​អាច​បោះឆ្នោត​បាន​ទេ ប្រសិន​ពួក​គេ​គ្មាន​ឈ្មោះ​ក្នុង​បញ្ជី​បោះឆ្នោត៖ «គឺ​ជា​ការ​ទទួល​ខុស​ត្រូវ​របស់​គណៈកម្មការ​ជាតិ​រៀបចំ​ការ​បោះឆ្នោត ដែល​គាត់​ធ្វើ​បញ្ជី​នេះ​ឡើង។ វា​អាច​ប៉ះពាល់​ដំណើរ​ការ​បោះឆ្នោត​ដែរ គាត់​មិន​បាន​បំពេញ​សិទ្ធិ​ជា​ពលរដ្ឋ​ទៅ​បោះឆ្នោត»

ទោះ​ជា​យ៉ាង​នេះ​ក៏ដោយ ប្រធាន​គណៈកម្មការ​ខេត្ត​រៀបចំ​ការ​បោះឆ្នោត​ខេត្ត​រតនគិរី លោក ប៉ែន ឈុនឌី មាន​ប្រសាសន៍​បញ្ជាក់​ថា តាម​លក្ខណៈ​បច្ចេកទេស ប្រសិន​ប្រជាពលរដ្ឋ​មាន​ឈ្មោះ​ក្នុង​ប័ណ្ណ​ព័ត៌មាន​បោះឆ្នោត​ហើយ ត្រូវ​តែ​មាន​ឈ្មោះ​ក្នុង​បញ្ជី​បោះឆ្នោត​ដូច​គ្នា។ លោក​បន្ត​ថា មន្ត្រី​ឃុំ​រៀបចំ​ការ​បោះឆ្នោត ត្រូវ​ផ្តល់​ឈ្មោះ​ប្រជាពលរដ្ឋ​ដែល​មាន​ប័ណ្ណ​ព័ត៌មាន​បោះឆ្នោត ហើយ​រក​ឈ្មោះ​មិន​ឃើញ​ក្នុង​បញ្ជី​បោះឆ្នោត​មក គ.ខ.ប ដើម្បី​ត្រួត​ពិនិត្យ​មើល​ក្នុង​បញ្ជី​បោះឆ្នោត​ឡើង​វិញ៖ «ជួន​កាល​គាត់​រក​មិន​អស់ មិន​មាន​ពេល​គ្រប់គ្រាន់​ឲ្យ​គេ​ជួយ​រក​ឲ្យ​វា​មិន​ឃើញ។ ខ្ញុំ​ឲ្យ ស៊ិក ស្រាវជ្រាវ​មើល ដែល​ថា​មាន​ប័ណ្ណ​ព័ត៌មាន​ហើយ អត់​មាន​ឈ្មោះ​ក្នុង​បញ្ជី​អ៊ីចឹង​ណា! ឲ្យ​ស្រង់​ឈ្មោះ​ហ្នឹង​មក​ដើម្បី​គេ​ឆែក​មើល​ឲ្យ​ស្រាវជ្រាវ​ឲ្យ»

តួលេខ​របស់ គ.ខ.ប ខេត្ត​រតនគិរី នៅ​ក្នុង​ការ​បោះឆ្នោត​ជ្រើស​រើស​តំណាង​រាស្ត្រ​អាណត្តិ​ទី៥ នៅ​ខេត្ត​នេះ មាន​ប្រជាពលរដ្ឋ​បាន​ចុះ​ឈ្មោះ​ក្នុង​បញ្ជី​បោះឆ្នោត​ជាង ៧០.០០០​ម៉ឺន​នាក់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។