ទូរទស្សន៍ព្រះអាទិត្យ នឹងចាប់ផ្ដើមដំណើរការនៅដើមឆ្នាំ២០១៦ ដូចការគ្រោងទុក ពីព្រោះថា បច្ចុប្បន្ននេះ ក្រុមហ៊ុនឯកជនមួយឈ្មោះថា ខេមបូឌា អ៊ីនឌីផេនឌិន មេឌា (Cambodia Independent Media) ដែលទទួលសិទ្ធិវិនិយោគពីគណបក្សសង្គ្រោះជាតិ ក្នុងការបង្កើតទូរទស្សន៍ព្រះអាទិត្យកំពុងតែដំណើរការរត់ឯកសារទៅស្ថាប័នពាក់ព័ន្ធ ដើម្បីដំឡើងអង់តែនក្នុងពេលឆាប់ៗនេះ។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ឲ្យដឹងនៅថ្ងៃទី២៣ ខែធ្នូ ថា ក្រុមហ៊ុនទទួលសិទ្ធិវិនិយោគទូរទស្សន៍ព្រះអាទិត្យនឹងដាក់លិខិតស្នើសុំដំឡើងអង់តែនជាផ្លូវការទៅក្រសួងដែនដី នគរូបនីយកម្ម និងសំណង់ និងរដ្ឋលេខាធិការអាកាសចរណ៍ស៊ីវិលក្នុងពេលឆាប់ៗនេះ។
លោក យឹម សុវណ្ណ បញ្ជាក់ថា ឥឡូវនេះ នៅរង់ចាំតែឯកសារផ្ទេរប្លង់ដីកម្មសិទ្ធិដែលក្រុមហ៊ុនបានទិញនៅខែត្រកណ្ដាល សម្រាប់ជាទីតាំងដំឡើងអង់តែនទូរទស្សន៍ព្រះអាទិត្យ។ លោកបញ្ជាក់ថា ការផ្ទេរឯកសារនេះជិតរួចរាល់ហើយ បន្ទាប់មកនឹងដាក់ពាក្យស្នើសុំដំឡើងអង់តែនតែម្ដង៖ «កម្មសិទ្ធិនេះជិតបានហើយ អាទិត្យ ឬអាទិត្យក្រោយនេះ គឺយកលុយទៅបង់ទៅបានកម្មសិទ្ធិមកហើយ នៅពេលបានប្លង់កម្មសិទ្ធិដីហើយ យើងនឹងភ្ជាប់ឯកសារពាក់ព័ន្ធនានាដាក់ទៅក្រសួងដែនដី និងរដ្ឋលេខាធិការអាកាសចរស៊ីវិល ព្រោះឥឡូវនេះរួចរាល់ហើយ វាអាស្រ័យលើសមត្ថកិច្ចរបស់រដ្ឋាភិបាល»។
លោក យឹម សុវណ្ណ បន្ថែមថា មូលនិធិទូរទស្សន៍ព្រះអាទិត្យមកទល់ពេលនេះប្រមូលបានទឹកប្រាក់ប្រមាណ ៧០ម៉ឺនដុល្លារសហរដ្ឋអាមេរិក។ លោកបញ្ជាក់ថា ចំនួនទឹកប្រាក់នេះ ទោះបីជាមិនទាន់គ្រប់តាមចំនួនដែលគណបក្សសង្គ្រោះជាតិ ចង់បានក្ដី ប៉ុន្តែចំនួននេះ អាចដំណើរការបង្កើតទូរទស្សន៍ព្រះអាទិត្យបាន។ លោកអះអាងថា អ្វីដែលធ្វើឲ្យរាំងស្ទះយូរមិនទាន់អាចដំឡើងអង់តែនទូរទស្សន៍បាននោះ ដោយសារតែនីតិវិធីរត់ឯកសារផ្ទេរកម្មសិទ្ធិនៅខែត្រកណ្ដាល ដែលមានទំហំប្រមាណ ១ពាន់ម៉ែត្រការ៉េនោះ មានរយៈពេលយូរ គឺប្រមាណ ៤៥ថ្ងៃ។
គម្រោងបង្កើតស្ថានីយទូរទស្សន៍ព្រះអាទិត្យនេះ នៅក្រោយពេលមានកិច្ចព្រមព្រៀងបញ្ចប់ជម្លោះនយោបាយកាលពីថ្ងៃទី២២ ខែកក្កដា ឆ្នាំ២០១៤ រវាងគណបក្សជាប់ឆ្នោតទាំងពីរ គឺគណបក្សសង្គ្រោះជាតិ និងគណបក្សប្រជាជនកម្ពុជា។ រយៈពេល១ឆ្នាំក្រោយមកហើយ ដែលគណបក្សទាំងពីរបានចាប់ដៃគ្នាដើរចូលប្រជុំសភា និងបានប្រើប្រាស់វប្បធម៌សន្ទនាជាគោលក្នុងការអភិវឌ្ឍប្រទេសជាតិនោះ បែរជាប្រេះស្រាំទៅវិញ។
ស្ថានភាពនយោបាយចុងក្រោយ ធ្វើឲ្យមេដឹកនាំគណបក្សជាប់ឆ្នោតទាំងពីរ គឺលោក ហ៊ុន សែន និងលោក សម រង្ស៊ី មិនអាចអង្គុយធ្វើការជាមួយគ្នាដោយប្រើប្រាស់យន្តការសន្ទនានេះបាន ទោះបីជាលោក ហ៊ុន សែន បានថ្លែងនៅក្នុងសភាកាលពីខែមេសា ឆ្នាំ២០១៥ ក្រោយពីអង្គសភាបានអនុម័តជ្រើសរើសសមាសភាពថ្នាក់ដឹកនាំកំពូល គ.ជ.ប ចំនួន ៩រូបថា គណបក្សជាប់ឆ្នោតទាំងពីរជាអ្នកបង្កើតវប្បធម៌សន្ទនា ដើម្បីឲ្យមានការបង្រួបបង្រួមជាតិ ដែលជាប្រវត្តិសាស្ត្រសម្រាប់ប្រទេសជាតិក្ដី តែពេលនេះ ភាគីទាំងពីរបែរជាមិនអាចរក្សាទំនាក់ទំនង និងវប្បធម៌សន្ទនាបានដដែល។ នៅទីបំផុត លោក សម រង្ស៊ី គ្មានជម្រើសអ្វីក្រៅពីរត់ចោលស្រុកដើម្បីគេចវេះពីដីកាតាមចាប់ខ្លួនរបស់តុលាការនោះទេ។
ទាក់ទងនឹងការប្រះឆាវប្បធម៌សន្ទនារវាងគណបក្សទាំងពីរនេះ តើនឹងអាចប៉ះពាល់ដល់ដំណើរការបង្កើតទូរទស្សន៍ព្រះអាទិត្យដែរ ឬទេ? លោក យឹម សុវណ្ណ អ្នកនាំពាក្យគណបក្សសង្គ្រោះជាតិ ឆ្លើយថា បញ្ហានេះអាស្រ័យលើឆន្ទៈរបស់គណបក្សប្រជាជនកម្ពុជា ឬរដ្ឋាភិបាល៖ «យើងខំប្រឹង តែឥឡូវហ្នឹងវាហួសពីសមត្ថកិច្ចយើងហើយ អ្វីៗនៅលើគណបក្សកាន់អំណាចជាអ្នកមានសមត្ថកិច្ចហ្នឹង បើគាត់យូរប៉ុណ្ណា គឺវាស្ទះការងារយើងតែប៉ុណ្ណឹង»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានឆ្លើយតបថា ការប្រេះឆាគ្នាខ្លះរវាងគណបក្សទាំងពីរ គឺមិនទាក់ទងនឹងគម្រោងបង្កើតស្ថានីយទូរទស្សន៍ព្រះអាទិត្យឡើយ។ លោក សុខ ឥសាន ស្វាគមន៍ទូរទស្សន៍ព្រះអាទិត្យ បើសិនជាទូរទស្សន៍នេះ ដំណើរការបានឆាប់ៗ៖ «សប្បុរសជនណាជាសេដ្ឋី គេមានលុយរាប់លានដុល្លារ គេជួយឧបត្ថម្ភអីជាការល្អហើយ វាដំណើរការវាល្អ តែគ្រាន់តែដំឡើងស្ថានីយហើយ គ្រាន់តែផ្សព្វផ្សាយពាណិជ្ជកម្មអីវាជួបការលំបាក ដល់ពេលនោះ កុំបន្ទោសអ្នកណា»។
មន្ត្រីជាន់ខ្ពស់គណបក្សសង្គ្រោះជាតិ លើកឡើងថា គណបក្សសង្គ្រោះជាតិ ចង់ឲ្យទូរទស្សន៍ព្រះអាទិត្យដំណើរការនៅដើមឆ្នាំ២០១៦ នេះ ព្រោះថា ពេលនេះគេមានអ្នកបច្ចេកទេស និងមានថវិកាល្មមអាចដំណើរការផ្សាយបាននៅក្នុងរាជធានីភ្នំពេញ ហើយគណបក្សនឹងស្វែងរកថវិកាបន្ថែមទៀតដើម្បីពង្រីកការផ្សាយជាបន្តបន្ទាប់ទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។