ការទទួលបានប័ណ្ណព័ត៌មានអ្នកបោះឆ្នោត គឺមានសារសំខាន់ណាស់សម្រាប់ជួយដល់អ្នកបោះឆ្នោត ឲ្យបានយល់ដឹង និងស្គាល់ការិយាល័យបោះឆ្នោត ប៉ុន្តែការចែកប័ណ្ណព័ត៌មានអ្នកបោះឆ្នោតតែងតែកើតមានបញ្ហាស្ទើររាល់អាណត្តិនៃការបោះឆ្នោត។ ជាក់ស្ដែងករណីនេះកំពុងកើតមានឡើងនៅក្នុងខេត្តបាត់ដំបង។
ដំណើរការចែកប័ណ្ណព័ត៌មានអ្នកបោះឆ្នោតទៅឲ្យប្រជាពលរដ្ឋបានកើតមានភាពមិនប្រក្រតី ដូចជាការប្រកាន់បក្សពួក ការរើសអើងដោយសារតែប្រជាពលរដ្ឋនៅតាមមូលដ្ឋានភូមិ ឃុំទាំងនោះ ត្រូវគេដឹងថា មាននិន្នាការគណបក្សនយោបាយខុសគ្នា។ បញ្ហានេះបង្កឲ្យមានប្រតិកម្មរិះគន់ និងមានការចោទប្រកាន់ពីមន្ត្រីគណបក្សប្រឆាំង។
ប្រធានគណបក្សសង្គ្រោះជាតិ ប្រចាំឃុំបួរ ស្រុកភ្នំព្រឹក ខេត្តបាត់ដំបង លោក អែម ច័ន្ទ។ លោកថ្លែងថា ការចែកប័ណ្ណព័ត៌មានអ្នកបោះឆ្នោតឲ្យប្រជាពលរដ្ឋបានយល់ដឹងជុំវិញព័ត៌មាននៃការបោះឆ្នោតនោះ បានចាប់ផ្ដើមអស់រយៈពេលជាង ១០ថ្ងៃមកហើយ ប៉ុន្តែមានអ្នកភូមិច្រើននាក់ណាស់នៅពុំទាន់ទទួលបានប័ណ្ណព័ត៌មានអ្នកបោះឆ្នោតនោះទេ។
បញ្ហានេះលោកចោទថា ដោយសារតែមានការរើសអើងពីអាជ្ញាធរភូមិ៖ «គេមិនផ្សព្វផ្សាយឲ្យប្រជាពលរដ្ឋដឹង ហើយគេចែកតាមក្រុមស្ងាត់ អ៊ីចឹងខ្ញុំទៅប្រជុំខាងសិច (CEC) ហ្នឹង ក៏គេប្រាប់ឲ្យផ្សព្វផ្សាយដែរ ប៉ុន្តែមេភូមិគេហ្នឹងគេអត់ផ្សព្វផ្សាយទេ គេចែកស្ងាត់ ព្រោះប្រជាពលរដ្ឋខ្លះគាត់អត់ដឹងទេ ហើយប្រជាពលរដ្ឋខ្លះទៀត ក៏បានទទួលតាមក្រុមខ្សែខាងបក្សគេអ៊ីចឹងទៅ គេយកឲ្យគ្នាគេអ៊ីចឹងទៅ ដូចថាខាងបក្សប្រជាពលរដ្ឋខ្លះក៏អត់បានទៅធ្វើដូចចូលលក្ខណៈរើសអើងហើយ»។
សមាជិកក្រុមប្រឹក្សាឃុំបួរ និងជាសកម្មជនរបស់គណបក្សសង្គ្រោះជាតិ លោក សឹង ហៀង ថ្លែងថា នៅក្នុងកិច្ចប្រជុំរបស់គណៈកម្មការរៀបចំការបោះឆ្នោតឃុំបួរ កន្លងទៅថ្មីៗនេះ។ សកម្មជនគណបក្សសង្គ្រោះជាតិ ស្នើសុំឲ្យគណៈកម្មការរៀបចំការបោះឆ្នោតឃុំចាក់មេក្រូ ដើម្បីប្រកាសឲ្យប្រជាពលរដ្ឋបានដឹង និងនាំគ្នាទៅទទួលប័ណ្ណព័ត៌មានអ្នកបោះឆ្នោត។ ប៉ុន្តែខាងសិច ពុំបានធ្វើតាមការស្នើសុំនោះទេ បញ្ហានេះបានធ្វើឲ្យមានប្រតិកម្មពីគណបក្សសង្គ្រោះជាតិ។
លោក សឹង ហៀង៖ «គេឲ្យខាងមេភូមិជាអ្នកដើរប្រាប់ អ៊ីចឹងវាមានការឆករវែងមិនបានទូទៅធ្វើឲ្យមិនមានភាពប្រក្រតីទេ ការចែកប័ណ្ណហ្នឹង ខាងតំណាងគណបក្សសង្គ្រោះជាតិ គាត់ចង់ឲ្យមានការប្រកាសជាមេក្រូ ដើម្បីឲ្យប្រជាពលរដ្ឋនៅតំបន់ហ្នឹងបានឮគ្រប់គ្នា ដើម្បីមកទទួលប័ណ្ណព័ត៌មាន មិនដឹងថា ខ្វះថវិកា ឬយ៉ាងណាទេ»។
លោកបន្តថា រឿងប័ណ្ណព័ត៌មានអ្នកបោះឆ្នោតនេះ បានធ្វើឲ្យប្រជាពលរដ្ឋមួយចំនួនមានការយល់ច្រឡំ។ យល់ច្រឡំត្រង់ថា ពួកគាត់មិនមានប័ណ្ណព័ត៌មានបោះឆ្នោតនោះមិនអាចទៅបោះឆ្នោតបាននោះទេ។ ប្រជាពលរដ្ឋច្រើនណាស់យល់ច្រឡំបញ្ហានេះ។ កន្លងទៅនេះ លោកបានដើរពន្យល់ប្រាប់ ឲ្យប្រជាពលរដ្ឋកុំឲ្យមានការភាន់ច្រឡំ។ ការមិនទទួលបានប័ណ្ណព័ត៌មានអ្នកបោះឆ្នោតអាចធ្វើឲ្យមានការលំបាក ដូចជាការរកឈ្មោះទីតាំងការិយាល័យបោះឆ្នោតជាដើម។ អ្នកខ្លះទៀតពុំមានប័ណ្ណព័ត៌មានអ្នកបោះឆ្នោត គាត់យល់ថា មិនចាំបាច់ទៅបោះឆ្នោតនោះទេ។
ទាក់ទិនបញ្ហានេះ ប្រធានលេខាធិការដ្ឋានរៀបចំការបោះឆ្នោតខេត្តបាត់ដំបង លោក វន ពន ថ្លែងថា ការពុំទទួលបានប័ណ្ណព័ត៌មានអ្នកបោះឆ្នោតនេះ ប្រជាពលរដ្ឋអាចទៅបោះឆ្នោតបាន ប៉ុន្តែ សារសំខាន់នៃប័ណ្ណនេះ បើអ្នកបោះឆ្នោតមានប័ណ្ណនេះកាន់តែប្រសើរ ព្រោះងាយស្រួលក្នុងការស្រាវជ្រាវរកទីតាំង និងរកឈ្មោះរបស់គាត់បានរហ័ស។
ការចែកប័ណ្ណព័ត៌មានអ្នកបោះឆ្នោតនៅតាមផ្ទះ កើតមានបញ្ហា ហើយបញ្ហានោះមានការលើកឡើងនៅក្នុងកិច្ចប្រជុំប្រចាំសប្ដាហ៍ដែរ៖ «បើសិនណាជាយើងរកមិនឃើញយើងណាត់ថា ទៅជួបកន្លែងណាតាមការណាត់របស់មេភូមិ ដើម្បីហៅប្រជុំ បើគាត់មិនបានទេ សល់ពេលវេលាយើងឯកភាពគ្នា សហការគ្នា ទាំងគណបក្សនយោបាយ ទាំងអង្គការក្រៅរដ្ឋាភិបាលទៅទាំងអស់គ្នាទៅដើម្បីទៅចែកតាមផ្ទះតាមការចង្អុលរបស់មេភូមិ ប៉ុន្តែយើងអត់ស្គាល់ទេ មានតែមេភូមិទេ ជាអ្នកស្គាល់អ៊ីចឹងទេ យើងបានលើកទឹកចិត្តឲ្យគាត់ធ្វើអ៊ីចឹង ដើម្បីឲ្យបានដល់ដៃអ្នកដែលត្រូវបោះឆ្នោតហ្នឹង»។
ក្នុងកិច្ចប្រជុំប្រចាំសប្ដាហ៍ ក្រុមការងាររបស់លេខាធិការដ្ឋានរៀបចំការបោះឆ្នោតនៅតាមមូលដ្ឋានបានលើកឡើងនូវបញ្ហាលំបាកមួយចំនួន ដូចជាការធ្វើចំណាកស្រុករបស់ប្រជាពលរដ្ឋ ហើយអ្នកទៅទទួលយកប័ណ្ណព័ត៌មានអ្នកបោះឆ្នោតមានចំនួនតិច។ ម្យ៉ាងវិញទៀត នៅរដូវនេះជារដូវភ្លៀង ផ្លូវធ្វើដំណើរនៅតាមមូលដ្ឋានក្នុងឃុំនានាជួបការលំបាក។ ដំណើរការផ្សព្វផ្សាយប័ណ្ណព័ត៌មានអ្នកបោះឆ្នោត បានចាប់ផ្ដើមកាលពីថ្ងៃទី១ នឹងត្រូវបញ្ចប់នៅថ្ងៃទី២៥ ខែមិថុនា ឆ្នាំ២០១៣។ ការងារនេះ ស្ថិតនៅក្រោមការរៀបចំរបស់ឃុំសង្កាត់នៅតាមមូលដ្ឋាន។
អ្នកសម្របសម្រួលសមាគមអាហដុក ប្រចាំខេត្តបាត់ដំបង លោក យិន ម៉េងលី ថ្លែងថា ការចែកប័ណ្ណព័ត៌មានអ្នកបោះឆ្នោត កើតមានបញ្ហារាល់អាណត្តិនៃការបោះឆ្នោត។ ក្នុងនោះ មានការរើសអើង ការប្រកាន់បក្សពួក ដោយសារតែប្រជាពលរដ្ឋប្រកាន់និន្នាការគណបក្សនយោបាយខុសគ្នា។ បញ្ហានេះ លោកស្នើឲ្យមេភូមិត្រូវបែងចែកតួនាទីរបស់ខ្លួនឲ្យបានច្បាស់ រវាងការងាររបស់គណបក្ស និងការងារជាសេនាធិការរបស់ឃុំសង្កាត់ក្នុងក្របខ័ណ្ឌរដ្ឋ។ ការចែកប័ណ្ណព័ត៌មានជូនប្រជាពលរដ្ឋ គឺមេភូមិធ្វើនៅក្នុងក្របខ័ណ្ឌជំនួយការរដ្ឋបាលរបស់ឃុំសង្កាត់។
លោក យិន ម៉េងលី៖ «អ៊ីចឹងលោកអត់ត្រូវឲ្យអ្នកនេះជាបក្សពួករបស់ខ្លួន អានោះក្រុមបក្សពួកអ្នកផ្សេង ព្រោះឥឡូវនេះគេអាចដឹងថា អ្នកណាជាមនុស្សរបស់គេ ហើយដើម្បីលុបលាងការចោទប្រកាន់ដែលចេះតែមាន នឹងដើម្បីធ្វើឲ្យប្រសើរនៅអាណត្តិក្រោយក្នុងការចែកប័ណ្ណព័ត៌មាននេះ គប្បីតែឃុំធ្វើការពង្រឹងបញ្ហានេះ ចំពោះអាជ្ញាធរភូមិធ្វើការងារនេះឲ្យកាន់តែសុក្រឹតឡើងដើម្បីឲ្យការបោះឆ្នោតនេះកាន់តែល្អឡើង»។
ទោះយ៉ាងនេះក្ដី ប្រធានលេខាធិការដ្ឋានរៀបចំការបោះឆ្នោតខេត្តបាត់ដំបង លោក វន ពន ពន្យល់ ថា មុនពេលចុះធ្វើសកម្មភាពចែកប័ណ្ណព័ត៌មានអ្នកបោះឆ្នោត ក្រុមការងារត្រូវធ្វើប្រតិទិន ដោយតម្រូវឲ្យមេភូមិជាអ្នកផ្សព្វផ្សាយទៅឲ្យប្រជាពលរដ្ឋបានយល់ដឹង។
កន្លងទៅនេះលេខាធិការដ្ឋានរៀបចំការបោះឆ្នោតខេត្តបានធ្វើការផ្សព្វផ្សាយតាមវិទ្យុ និងទូរទស្សន៍ ចំណែកនៅតាមឃុំសង្កាត់មានការលើកទឹកចិត្តឲ្យមានការផ្សព្វផ្សាយតាមមេក្រូ តាមលទ្ធភាពដែលអាចធ្វើទៅបាន។ លោកសង្កត់ធ្ងន់ថា ប័ណ្ណព័ត៌មានអ្នកបោះឆ្នោតនេះមានសារសំខាន់ណាស់ សម្រាប់អ្នកបោះឆ្នោតយល់ដឹងនូវព័ត៌មានផ្ទាល់ខ្លួន។
លោក វន ពន៖ «ប័ណ្ណព័ត៌មានគឺថា មានសារសំខាន់ណាស់ គេនិយាយអំពីឈ្មោះរបស់គាត់ ភេទ ថ្ងៃខែឆ្នាំកំណើតរបស់អ្នកបោះឆ្នោត ហើយនិងទិន្នន័យផ្សេងៗ ដូចជាអាសយដ្ឋាន កាលបរិច្ឆេទនៃការបោះឆ្នោត ហើយនិងទីតាំងការិយាល័យបោះឆ្នោត គឺមាននៅហ្នឹងទាំងអស់។ សំខាន់ទៅទៀត អ្នកបោះឆ្នោត ដើម្បីទៅបោះឆ្នោតបានទាល់តែឈ្មោះនៅក្នុងបញ្ជីបោះឆ្នោត ហើយនិងមានឯកសារបញ្ជាក់អត្តសញ្ញាណផ្លូវការណាមួយជននោះអាចទៅបោះឆ្នោតនៅក្នុងហ្នឹង គេបានបញ្ជាក់ពីឯកសារអត្តសញ្ញាណក្នុងហ្នឹងស្រេច ហើយអ្នកណាមានអីយកហ្នឹងទៅ ឲ្យតែត្រូវឈ្មោះរបស់ខ្លួន»។
លេខាធិការដ្ឋានរៀបចំការបោះឆ្នោតឲ្យដឹងថា នៅខេត្តបាត់ដំបង មានស្រុកក្រុងចំនួន ១៤ ឃុំ សង្កាត់ចំនួន ១០២។ ក្នុងនោះមានសង្កាត់ចំនួន ១០ និងឃុំចំនួន ៩២។ ការិយាល័យបោះឆ្នោតមាន១.៤០១។ ប្រជាពលរដ្ឋដែលមានឈ្មោះបោះឆ្នោតនៅទូទាំងខេត្តមានចំនួនជិត ៨ម៉ឺននាក់ (៧០៦.៨៧៤)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។