ព្រះរាជពិធីបុណ្យដង្ហែព្រះបរមអដ្ឋិ យកទៅតម្កល់នៅវិហារព្រះកែវមរកត ក្នុងព្រះបរមរាជវាំង នឹងប្រព្រឹត្តទៅបីថ្ងៃ គឺនៅថ្ងៃទី១០ ទី១១ និងទី១២ ខែកក្កដា។
ក្នុងរយៈពេលនៃការរៀបចំព្រះរាជពិធីនេះ ព្រះបរមរាជវាំង ក៏នឹងអនុញ្ញាតឲ្យនាម៉ឺនសព្វមុខមន្ត្រី និងពលរដ្ឋចូលរួមគោរពព្រះវិញ្ញាណក្ខន្ធសម្ដេចព្រះបរមរតនកោដ្ឋផងដែរ។ ដោយឡែកគណបក្សសង្គ្រោះជាតិ ដែលជាបក្សប្រឆាំងធំជាងគេក្នុងប្រទេសកម្ពុជា នោះ នៅមិនទាន់ដឹងថាត្រូវរៀបចំខ្លួនបែបណា ក្នុងថ្ងៃគោរពព្រះវិញ្ញាណក្ខន្ធអតីតព្រះមហាក្សត្រនោះឡើយ។
មន្ត្រីអ្នកនាំពាក្យគណបក្សសង្គ្រោះជាតិ លោក យឹម សុវណ្ណ នៅថ្ងៃទី៨ ខែកក្កដា មានប្រសាសន៍ថា គណបក្សមិនទាន់សម្រេចថានឹងចូលរួមគោរពព្រះវិញ្ញាណក្ខន្ធនៅក្នុងព្រះបរមរាជវាំង ឬរៀបចំនៅស្នាក់ការគណបក្សនោះទេ ដោយមន្ត្រីទាំងអស់នឹងជួបប្រជុំគ្នាជាមុនសិន៖ «ប្រជុំគ្នាដើម្បីសម្រេចកិច្ចការអ្វីមួយ ចឹងថ្នាក់ដឹកនាំគណបក្សសង្គ្រោះជាតិ នឹងជួបប្រជុំគ្នាឆាប់ៗ ដើម្បីសម្រេចកិច្ចការទាំងអស់ហ្នឹង»។
មិនត្រឹមតែមិនដឹងថា គណបក្សប្រឆាំងនឹងរៀបចំខ្លួនបែបណាក្នុងព្រះរាជពិធីដង្ហែព្រះបរមអដ្ឋិនោះទេ សូម្បីតែប្រធានគណបក្ស លោក សម រង្ស៉ី ក៏មិនប្រាកដថា នឹងត្រឡប់ពីបរទេសមកទាន់ថ្ងៃបុណ្យ ឬក៏អត់នោះដែរ។ មន្ត្រីជាន់ខ្ពស់គណបក្សសង្គ្រោះជាតិ បញ្ជាក់ថា លោក សម រង្ស៉ី បានលុបគម្រោងដែលគ្រោងត្រឡប់មកប្រទេសវិញនៅថ្ងៃទី៧ ខែកក្កដា ហើយមិនបញ្ជាក់ថា នឹងត្រឡប់មកវិញនៅថ្ងៃណានោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។