នៅព្រឹកថ្ងៃសៅរ៍ ទី១៤ ខែកញ្ញា នាទីលានប្រជាធិបតេយ្យ មានយុវជនមួយក្រុម និងមានកងសន្តិសុខខណ្ឌដូនពេញ បានមករារាំង និងមានបំណងរុះរើរោង ឬដំបូលតង់ ដែលគណបក្សសង្គ្រោះជាតិ សង់ទុកសម្រាប់ជ្រកកម្ដៅថ្ងៃ ឬភ្លៀង ជូនបាតុករដែលមកចូលរួមធ្វើមហាបាតុកម្មអហិង្សា នៅថ្ងៃអាទិត្យ ទី១៥ កញ្ញា ស្អែកនេះ។
ទោះជាយ៉ាងណា សកម្មភាពរារាំងរបស់យុវជន១ក្រុមដឹកនាំដោយមន្ត្រីខណ្ឌដូនពេញ មិនបានសម្រេចទេ ដោយសារប្រជាពលរដ្ឋគាំទ្រគណបក្សសង្គ្រោះ បញ្ចេញប្រតិកម្មតបត មិនអនុញ្ញាតឲ្យរុះរើ។ យ៉ាងណាក៏ដោយ ពុំមានការប៉ះទង្គិចគ្នាណាមួយកើតឡើងទេ។
លោក ជាម ចន្នី សមាជិកគណៈអចិន្ត្រៃយ៍គណបក្សសង្គ្រោះជាតិ និងជាបេក្ខជនជាប់ឆ្នោតតំណាងរាស្ត្រមណ្ឌលកំពង់ធំ ឲ្យដឹងថា ក្រុមយុវជនជាង ១០នាក់ត្រូវបានអាជ្ញាធរខណ្ឌដូនពេញ ជួលឲ្យមករុះរើរោងដែលគណបក្សសង្គ្រោះជាតិ បានសាងសង់។ តែបំណងពួកគេមិនបានសម្រេចទេ ព្រោះមានអ្នកគាំទ្រគណបក្សរាប់រយនាក់ប្រតិកម្មមិនឲ្យរុះរើ។
រោងដែលគណបក្សសង្គ្រោះជាតិ ជួលមកសាងសង់សម្រាប់ឲ្យបាតុករស្នាក់នៅធ្វើមហាបាតុកម្មអហិង្សា នៅថ្ងៃអាទិត្យ ស្អែកនេះ មានទទឹងជិត ១០ម៉ែត្រ និងបណ្ដោយប្រមាណ ១៥០ម៉ែត្រ សាងសង់នៅទីលានប្រជាធិបតេយ្យផ្នែកខាងជើង។ សំណង់នេះធ្វើពីដែក ប្រក់ដំបូលប៉ាតង់ និងមានរាងដូចរោងបុណ្យ ឬរោងពិធីមង្គលការ។
លោក មឿន តុលា ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ ដែលបានចុះផ្ទាល់ដល់ទីលានប្រជាធិបតេយ្យ បានចាត់ទុកទង្វើរបស់អាជ្ញាធរដែលបានជួលយុវជនមួយក្រុមមានបំណងរុះរើរោងជាជម្រករបស់បាតុករ ថាជាសកម្មភាពខុសច្បាប់ និងស្នើសុំឲ្យបញ្ឈប់សកម្មភាពរបៀបនេះនៅថ្ងៃអនាគត។
ទាក់ទិនដល់ការធ្វើមហាបាតុកម្មរបស់គណបក្សសង្គ្រោះជាតិ នេះ សាលារាជធានីភ្នំពេញ បានជូនដំណឹងថា អាជ្ញាធរអនុញ្ញាតអោយគណបក្សនេះធ្វើបាតុកម្មក្នុងរយៈពេលតែមួយថ្ងៃ គឺថ្ងៃទី១៥ ខែកញ្ញា ដែលខុសពីការគ្រោងទុករបស់គណបក្សនេះ ថានឹងធ្វើក្នុងរយៈពេល ៣យប់ ៣ថ្ងៃ ចាប់ពីថ្ងៃ១៥ ដល់ថ្ងៃទី១៧ ខែកញ្ញា។ ទោះជាយ៉ាងណាក៏ដោយ គណបក្សសង្គ្រោះជាតិនៅតែអះអាងថា គេនឹងនៅតែធ្វើបាតុកម្មដូចការគ្រោងទុកដដែល បើទោះជាគ្មានការអនុញ្ញាតក៏ដោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។