ការប្រកាសលទ្ធផលសន្លឹកឆ្នោតបណ្ដោះអាសន្នតាមទូរទស្សន៍ឯកជន បានធ្វើឲ្យអ្នកបោះឆ្នោតនៅខេត្តតាកែវ និងខេត្តកំពត សម្ដែងការខកចិត្ត។
កសិករភូមិវត្តពោធិ៍ ឃុំថ្មី ស្រុកទឹកឈូ ខេត្តកំពត ឈ្មោះ មាន ឡុង ថ្លែងថា បោះឆ្នោតរួចគាត់ចង់ដឹងលទ្ធផលសន្លឹកឆ្នោតឈ្នះចាញ់ដែរ តែនៅតែប្រឹងប្រែងធ្វើស្រែចម្ការ។ គាត់បានរំឭកថា អ្នកតំណាងរាស្ត្រជាប់ឆ្នោតកន្លងមក មិនដែលមកស្តាប់មតិម្ចាស់ឆ្នោត ឬដឹងពីសុខទុក្ខអ្នកផ្តល់សំឡេងឆ្នោតឲ្យទេ។
កសិករវ័យចំណាស់ឈ្មោះ ស្វាយ ឆែក នៅឃុំថ្មី ដែរ ថ្លែងថា បោះឆ្នោតរួចគាត់សុំឲ្យតែអ្នកដឹកនាំរដ្ឋាភិបាលថ្មីបញ្ចុះតម្លៃជីគីមី បង្កើនតម្លៃលក់ស្រូវ ទើបជាអ្នកដឹកនាំល្អ។
យុវជននៅខេត្តតាកែវ សុំមិនបញ្ចេញឈ្មោះ ឲ្យដឹងថា គាត់មិនទទួលយកការប្រកាសលទ្ធផលបណ្ដោះអាសន្ននេះទេ ព្រោះគាត់ចង់ឲ្យគណបក្សដែលគាត់គាំទ្រឈ្នះដាច់គេ។
កសិករ តុង ខេង នៅស្រុកត្រាំកក់ ថ្លែងថា លទ្ធផលសន្លឹកឆ្នោតប្រកាសខុសពីការពិត ដែលប្រជាពលរដ្ឋទៅបោះឆ្នោត និងការរាប់សន្លឹកឆ្នោតតាមការិយាល័យនីមួយៗ។ វាគួរតែមានគណបក្សណាមួយឈ្នះដាច់ មិនគួរគណបក្សប្រជាជនកម្ពុជា និងគណបក្សសង្គ្រោះជាតិ ទទួលអាសនៈ ៤ ស្មើគ្នាទេ នៅខេត្តតាកែវ។
កសិករ នាង ង៉ែត ឲ្យដឹងថា គាត់អាយុ ៧៧ឆ្នាំ សុខចិត្តបោះចោលធ្វើស្រែសិន ដើម្បីទៅបោះឆ្នោត ប៉ុន្តែ ជាលទ្ធផល សន្លឹកឆ្នោតមិនទទួលបានដូចបំណង។
កសិករឈ្មោះ ទឹម ផេង ថ្លែងថា សមាជិកសភាអាណត្តិថ្មីឆ្នាំ២០១៣ ត្រូវគោរពគោលនយោបាយរបស់គណបក្សខ្លួនបានសន្យាមុនបោះឆ្នោត។ បើមិនធ្វើឲ្យអ្នកបោះឆ្នោតជឿទេ សន្លឹកឆ្នោតចេះតែដូររហូត ឬឃោសនាគោលនយោបាយសម្លាប់ខ្លួនឯងប៉ុណ្ណោះ។
អ្នករកស៊ីប៉ះម៉ូតូ និងលក់សាំងដប នៅស្រុកទឹកឈូ ខេត្តកំពត លោក ហ៊ុន សួន ថ្លែងថា យុទ្ធនាការឃោសនាបោះឆ្នោតបានធ្វើឲ្យអាជីវកម្មគាត់ទទួលចំណូលក្រែល។ លោកថា ១អាទិត្យ គាត់លក់សាំងដាច់ ៣០កាន។ នៅក្រោយបោះឆ្នោត អ្នកបោះឆ្នោតត្រឡប់ទៅកន្លែងគេវិញ របរប៉ះម៉ូតូ និងលក់សាំង នៅតែបានចំណូលដដែល។ លោកបន្តថា មិនខ្វល់ពីសន្លឹកឆ្នោតប្រកាសឈ្នះចាញ់ទេ។
អាជីវករឈ្មោះ អ៊ី ម៉ូវ លក់គ្រឿងទេសនៅភូមិត្រពាំងច្រាប ស្រុកទឹកឈូ ថ្លែងថា អ្នកបោះឆ្នោតតែងតែមកទិញស្រាបៀផឹក ក្រោយបោះឆ្នោតរួច។ លោកស្រីថា ពេលបោះឆ្នោតដូចគ្នា គាត់លក់គ្រឿងស្រវឹងនៅឆ្នាំ២០១៣ ដាច់ជាងឆ្នាំ២០១២ បោះឆ្នោតឃុំសង្កាត់។ លោកស្រីបន្តថា នៅក្នុងស្រុកទឹកឈូ មិនមានសកម្មភាពផ្អើលឈូឆរខ្លាចមានបញ្ហាអសន្តិសុខ មនុស្សផ្អើលទិញគ្រឿងទេស អង្ករ ខ្ទឹម ម្រេច ប៊ីចេង ទុកខ្លាចខ្វះដូចនៅភ្នំពេញ គឺគ្មានទេ។
ប្រធានគណៈកម្មការខេត្តរៀបចំការបោះឆ្នោត ខេត្តតាកែវ លោក នួន សារ៉ែម ថ្លែងនៅថ្ងៃទី៣០ ខែកក្កដា ថា មិនទាន់បូកសរុបសន្លឹកឆ្នោតតាមមណ្ឌលបោះឆ្នោតចប់នៅឡើយ។ ដូច្នេះ ការប្រកាសលទ្ធផលបោះឆ្នោតខេត្តតាកែវ នៅតាមស្ថានីយទូរទស្សន៍នានា មិនប្រាកដថាត្រឹមត្រូវឡើយ។
ស្របពេលដែលរង់ចាំលទ្ធផលបោះឆ្នោតជាផ្លូវការ នៅក្នុងខេត្តតាកែវ និងខេត្តកំពត ក្រោយថ្ងៃបោះឆ្នោត កសិករសម្រុកធ្វើស្រែយ៉ាងសកម្ម ខណៈទឹកភ្លៀងធ្លាក់ជោគជាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។