មន្ត្រីចាត់ចែងរបស់ធនាគារពិភពលោកនៅប្រទេសកម្ពុជា (World Bank's Country Manager in Cambodia) លោក អាឡាសាន សូ (Alassane Sow) បានមានប្រសាសន៍ថា ការពង្រឹងយន្តការ និងតម្លាភាពលើការចំណាយថវិកាជាតិ ធ្វើឲ្យប្រសើរឡើងនូវអភិបាលកិច្ចល្អរបស់រដ្ឋាភិបាល គឺជាការចាំបាច់ណាស់ដើម្បីធានាឲ្យមានតម្លាភាព។ ការធ្វើដូច្នេះគឺជៀសវាងអំពើពុករលួយក្នុងការចំណាយថវិកាជាតិ។
ការដាស់តឿននេះ នៅគ្រាដែលសភាជាតិកម្ពុជា បានរៀបចំកិច្ចប្រជុំរួមគ្នាមួយលើកទី៤ ស្ដីពីតួនាទីរបស់សភាជាតិក្នុងការរៀបចំថវិកាជាតិ និងត្រួតពិនិត្យលើការចំណាយថវិកាជាតិតាមរយៈការពង្រឹងអភិបាលកិច្ចល្អ។
កិច្ចប្រជុំនេះ បានចូលរួមដោយមន្ត្រីជាន់ខ្ពស់មកពីគណៈកម្មាធិការស្ដីពីហិរញ្ញវត្ថុ និងសេដ្ឋកិច្ចនៃសភាជាតិកម្ពុជា សភាជាតិវៀតណាម និងសភាជាតិឡាវ ដែលជាប្រទេសក្នុងសហព័ន្ធនៅឥណ្ឌូចិន។
ប្រធានសភាជាតិកម្ពុជា លោក ហេង សំរិន បានមានប្រសាសន៍ថា ប្រទេសទាំងបីបានដាក់ចេញនូវគោលនយោបាយ និងយុទ្ធសាស្រ្ត ព្រមទាំងការកែទម្រង់សំខាន់ៗកន្លងមក ស្របតាមស្ថានភាពនៃប្រទេសរៀងៗខ្លួនក្នុងការចំណាយថវិកាជាតិនោះ៖ «ជាក់ស្ដែងរាជរដ្ឋាភិបាលកម្ពុជា បានចាត់ទុកអភិបាលកិច្ចល្អជាស្នូលនៃយុទ្ធសាស្ត្រចតុកោណ ទាំងដំណាក់កាលទី១ និងទី២ និងផែនការយុទ្ធសាស្ត្រអភិវឌ្ឍន៍ជាតិ ៥ឆ្នាំ ឆ្នាំ២០១៤ ដល់ឆ្នាំ២០១៨ ដោយផ្ដោតលើការកែទម្រង់នៃការគ្រប់គ្រងហិរញ្ញវត្ថុសាធារណៈចាប់ពីឆ្នាំ២០០១។ មកដល់ពេលបច្ចុប្បន្ននេះ ការអនុវត្តកម្មវិធីកែទម្រង់នេះ ជាបណ្តើរៗឈានទៅរកស្តង់ដារអន្តរជាតិ ដែលមានលក្ខណៈគ្រប់ជ្រុងជ្រោយមានរយៈពេលវែង»។
ទាក់ទងនឹងការលើកឡើងនេះ ប្រធានក្រុមតំណាងរាស្ត្រគណបក្ស សម រង្ស៊ី លោក សុន ឆ័យ បានមានប្រសាសន៍ប្រតិកម្មថា ការចំណាយថវិកាជាតិកន្លងមក មិនត្រូវបានគេលាតត្រដាងឲ្យគណបក្សប្រឆាំងបានដឹងទេរហូតដល់មូលដ្ឋាន។ លោកព្រួយបារម្ភយ៉ាងខ្លាំងអំពីអំពើពុករលួយ ដោយសារខ្វះតម្លាភាព។
លោក សុន ឆ័យ៖ «បញ្ជាក់អំពីអ្នកឯកទេសអន្តរជាតិ និងអ្នកស្រាវជ្រាវក្នុងស្រុក រួមទាំងការប្រកាសដោយស្ថានទូតសហរដ្ឋអាមេរិកកាលពីប៉ុន្មាន ៦ឆ្នាំមុន ហើយថា មានការលួចបំបាត់ ពុករលួយយ៉ាងតិចណាស់ ៥០០លានដុល្លារអាមេរិកកាលពី ៦ឆ្នាំមុន។ ការស្រាវជ្រាវចុងក្រោយនេះថា ការបំបាត់លុយជាតិហ្នឹងយ៉ាងតិចណាស់ ១.០០០លានដុល្លារអាមេរិក។ ការដែលរដ្ឋាភិបាលត្រូវធ្វើចាំបាច់មានឆន្ទៈនយោបាយពិតប្រាកដ ពីព្រោះអ្នកធំៗដែលមានអំណាច គឺជាអ្នកលួចលុយជាតិច្រើនណាស់»។
សភាជាតិកម្ពុជា កាលពីថ្ងៃទី៧ ខែធ្នូ ឆ្នាំ២០១២ កន្លងទៅនេះ បានអនុម័តលើសេចក្ដីព្រាងច្បាប់ស្ដីពីថវិកាជាតិចំនួនជាង ៣ពាន់លានដុល្លារអាមេរិក សម្រាប់ចំណាយនៅឆ្នាំ២០១៣ បើទោះបីជាគណបក្សប្រឆាំងបានជំទាស់ និងរិះគន់ថា រដ្ឋាភិបាលខ្ចីលុយបរទេសជិត ១ពាន់លានដុល្លារអាមេរិកសម្រាប់ការចំណាយនានានៅឆ្នាំ២០ ១៣។
ប្រធានសភាជាតិកម្ពុជា លោក ហេង សំរិន នៅថ្ងៃទី៤ ខែមីនា បានមានប្រសាសន៍បញ្ជាក់ថា កំណើនសេដ្ឋកិច្ចកម្ពុជា ជាមធ្យមចំនួន ៧%។ កម្ពុជាបានកាត់បន្ថយភាពក្រីក្រពីចំនួន ២០% នៅឆ្នាំ២០១២ មកចំនួន ១៩% នៅឆ្នាំ២០១៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។