មជ្ឈមណ្ឌលប្រជាពលរដ្ឋដើម្បីការអភិវឌ្ឍ និងអង្គការយុវជនក្នុងខេត្តកំពង់ចាម បានរៀបចំកិច្ចពិភាក្សាមួយផ្ដោតទៅលើការយកចិត្តទុកដាក់របស់យុវជន លើយុទ្ធវិធីកំណែទម្រង់ប្រព័ន្ធបោះឆ្នោត ដើម្បីជៀសវាងនូវការមិនទុកចិត្តគ្នានិងជម្លោះផ្សេងៗនៅក្រោយពេលបោះឆ្នោត។ កិច្ចពិភាក្សានោះ គឺជំរុញឱ្យយុវជនចាប់ផ្ដើមគិតគូរអំពីសារសំខាន់នៃការបោះឆ្នោត និងស្វែងយល់កាន់តែស៊ីជម្រៅអំពីនីតិវិធីកំណែទម្រង់ប្រព័ន្ធបោះឆ្នោតប្រកបដោយឯករាជភាព។
វេទិកាជួបជុំយុវជននៅខេត្តកំពង់ចាម ប្រមាណជាង ១០០នាក់ បានធ្វើឡើងដើម្បីជំរុញឱ្យយុវជនកាន់តែចាប់អារម្មណ៍ចំពោះនីតិវិធីនៃការបោះឆ្នោត ធ្វើយ៉ាងណាឱ្យស្ថាប័នបោះឆ្នោតក្លាយទៅជាស្ថាប័នមួយដែលប្រជាពលរដ្ឋទាំងអស់ជឿទុកចិត្តបាន ពោលគឺមិនស្ថិតនៅក្រោមអំណាចគណបក្សនយោបាយណាមួយឡើយ។
ប្រធានមជ្ឈមណ្ឌលប្រជាពលរដ្ឋដើម្បីការអភិវឌ្ឍនិងសន្តិភាព លោក យង់ គីមអេង មានប្រសាសន៍ថា គោលបំណងសំខាន់ក្នុងការរៀបចំកម្មវិធីការចូលរួមរបស់យុវជននៅក្នុងដំណើរការនៃកំណែទម្រង់ការបោះឆ្នោត គឺដើម្បីជំរុញឱ្យយុវជនកាន់តែយកចិត្តទុកដាក់ចំពោះបញ្ហាបោះឆ្នោត បញ្ហានយោបាយ ពីព្រោះយុវជនបច្ចុប្បន្នមានចំនួនច្រើនជាងគេ ហើយកំពុងតែដើរតួនាទីយ៉ាងសំខាន់ក្នុងសង្គមកម្ពុជា។
លោកបន្តថា កន្លងមកយុវជនមួយចំនួនហាក់មិនបានចាប់អារម្មណ៍ចំពោះបញ្ហានេះឡើយ ដែលធ្វើឱ្យអ្នកទទួលរងផលប៉ះពាល់ច្រើនជាងគេនោះ គឺជាយុវជន ហើយអ្នកបាត់បង់សិទ្ធិបោះឆ្នោតច្រើនជាងគេនោះក៏ជាយុវជនដែរ៖ «ហើយបើប្រជាពលរដ្ឋភាគច្រើនបំផុតនៅក្នុងសង្គមហើយខ្លួនឯងមិនបានយល់ដឹងពីកម្រិតនៃកំណែទម្រង់ ហើយអត់ដឹងថា កំណែទម្រង់នោះជាស្អីផង។ តើនឹងអាចធ្វើឱ្យបញ្ហាប្រទេសជាតិបានប្រសើរដូចម្ដេចនឹងទៅកើត? អាហ្នឹងជាកត្តាសំខាន់។ ហើយរឿងបញ្ហាមួយវិញទៀត គឺយើងបានរៀបចំវេទិកានេះដោយផ្តោតទៅលើយុវជន គឺចង់ឱ្យយុវជនហ្នឹងបានចូលរួមចំណែកភ្ជាប់ខ្លួនរបស់គេ ភ្ជាប់គំនិតរបស់គេជាមួយបញ្ហានយោបាយ ជាមួយការបោះឆ្នោត ជាមួយអ្វីជាដើម ពីព្រោះបញ្ហានយោបាយ បញ្ហាបោះឆ្នោត គឺវាផ្សារភ្ជាប់នឹងបញ្ហាជីវភាពរបស់គេដែរ»។
លោកបន្ថែមទៀតថា ក្នុងវេទិកាក៏បានលើកពីបញ្ហាជាច្រើនបង្ហាញទៅយុវជនដែលបានចូលរួមទាំងអស់ រួមមានបញ្ហាប្រឈមរបស់យុវជននៅពេលចុះឈ្មោះបោះឆ្នោត ដំណើរការបោះឆ្នោត បញ្ហាវិវាទដែលកើតឡើងមុននិងក្រោយពេលបោះឆ្នោត មធ្យោបាយដោះស្រាយបញ្ហាបោះឆ្នោត និងបញ្ហាអព្យាក្រឹតភាពរបស់មន្ត្រីរាជការជាដើម។
និស្សិតឆ្នាំទី២ ផ្នែកគណនេយ្យនៃសាកលវិទ្យាល័យវេសស្ទើន (Western) សាខាខេត្តកំពង់ចាម កញ្ញា លឿង ច័ន្ទសុភា យល់ថា វេទិកានេះមានសារសំខាន់សម្រាប់យុវជនក្នុងការចូលរួមយល់ដឹងជុំវិញដំណើរការកែទម្រង់ការបោះឆ្នោតនេះ ពីព្រោះប្រសិនបើមានការបោះឆ្នោតមួយដ៏ត្រឹមត្រូវនោះ នឹងអាចធ្វើប្រទេសជាតិទាំងមូលមានការរីកចម្រើន។
កញ្ញាបន្តថា កន្លងមកបញ្ហាដែលកើតឡើងជុំវិញការបោះឆ្នោតនៅតែមានហើយភាគច្រើននៃបញ្ហាទាំងនោះ គឺកើតចេញស្ថាប័នបោះឆ្នោត ពីព្រោះស្ថាប័នមួយនេះហាក់មិនបានបំពេញការងាររបស់ខ្លួនឱ្យបានត្រឹមត្រូវទាំងស្រុងនោះឡើយ៖ «ក្នុងមានខ្ញុំជាយុវជន ខ្ញុំចង់ឱ្យគណៈកម្មាធិការរៀបចំការបោះឆ្នោតមានកំណែទម្រង់អព្យាក្រឹត ហើយមិនលម្អៀងទៅកាន់គណបក្សណាមួយ គឺត្រូវធ្វើការរៀបចំការបោះឆ្នោតហ្នឹងដោយភាពអព្យាក្រឹត គឺធ្វើឱ្យប្រជាជនទូទាំងប្រទេសហ្នឹង គាត់យល់ស្របតាម»។
ចំណែកឯនិស្សិតផ្នែកគណនេយ្យនៃសាកលវិទ្យាល័យគ្រប់គ្រងនិងសេដ្ឋកិច្ច លោក ម៉ាច ប៊ុនឡុង បញ្ជាក់ថា គោលបំណងសំខាន់របស់ខ្លួនក្នុងការចូលរួមយល់សិក្ខាសាលានេះ គឺដើម្បីយល់ឱ្យកាន់តែច្បាស់ចំពោះនីតិវិធីកែទម្រង់ការបោះឆ្នោត ការវិវត្តន៍ពីស្ថានការណ៍ និងការដោះស្រាយភាពជាប់គាំងនយោបាយនៅកម្ពុជាបច្ចុប្បន្ន។
លោក ម៉ាច ប៊ុនឡុង៖ «ខ្ញុំគិតថា ដើម្បីឱ្យការកែទម្រង់បានល្អលុះត្រាតែមានការចូលរួមគ្នារវាងគណបក្សនយោបាយទាំងពីរ។ ទីមួយយើងត្រូវរកឱ្យឃើញពីមូលហេតុ ហេតុអ្វីបានជាគណបក្សនយោបាយមួយចំនួនមិនចូលរួមប្រជុំ ហើយចង់ឱ្យគណបក្សទាំងនោះចរចាគ្នាដើម្បីឱ្យពួកគាត់រកដំណោះស្រាយដើម្បីឱ្យមានភាពងាយស្រួលក្នុងការបង្កើតនូវការកែទម្រង់ដ៏ល្អមួយ»។
ដោយឡែកលោក យង់ គឹមអេង បញ្ជាក់ថា ការកែទម្រង់ការបោះឆ្នោតបានល្អប្រៀបដូចជាការកែទម្រង់អនាគតរបស់ប្រជាពលរដ្ឋ ពិសេសអនាគតរបស់យុវជនក៏បានល្អប្រសើរដែរ។ វេទិកានេះគឺបានរៀបចំឡើងតាមបណ្ដាខេត្តមួយចំនួននៅប្រទេសកម្ពុជា ហើយនៅថ្ងៃ២៣ មិថុនា នឹងរៀបចំសិក្ខាសាលាស្ដីពីការធ្វើកំណែទម្រង់ការបោះឆ្នោតនេះបន្តទៀតនៅពេលរសៀលនៅសាកលវិទ្យាល័យអាស៊ីអឺរ៉ុប រាជធានីភ្នំពេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។