ក្រុមគ្រួសារ និងសាច់ញាតិរបស់អ្នកជាប់ពន្ធនាគារបាននាំគ្នាដើរដាក់ញត្តិទៅស្ថានទូតមហាអំណាចមួយចំនួន ឲ្យជួយអន្តរាគមន៍ដោះលែងព្រះសង្ឃ សកម្មជននយោបាយ និងសកម្មជនដីធ្លី ចំនួន ១៨នាក់ ដែលកំពុងជាប់ពន្ធនាគារ។ ពួកគេបានអំពាវនាវឲ្យមន្រ្តីស្ថានទូតនានា ជួយអន្តរាគមន៍ដោះលែងអ្នកទាំងនោះ ក្នុងគ្រាដែលពួកគេមានបញ្ហាជីវភាព និងគ្មានអ្នកថែទាំគ្រួសារ។ ជាងនេះទៅទៀត ស្ត្រីអ្នកបឹងកក់ ៨នាក់ នឹងធ្វើកូដកម្មអត់អាហារក្នុងពន្ធនាគារទាមទារឲ្យដោះលែងពួកគេ។
សំឡេងស្រែក៖ «សូមជួយផង! កុមាររងគ្រោះត្រូវកំព្រាបើសិនជាគ្មានយុត្តិធម៌ សម្រាប់ដោះលែងសកម្មជនដីធ្លីជាស្ត្រីនៅតំបន់បឹងកក់ទេ»។
ពលរដ្ឋមកពីសហគមន៍បឹងកក់ប្រមាណ ២០នាក់ បាននាំគ្នាស្រែកសុំឲ្យមន្ត្រីស្ថានទូតសហរដ្ឋអាមេរិក ជួយអន្តរាគមន៍ទៅរដ្ឋាភិបាលកម្ពុជា ឲ្យដោះលែងអ្នកជាប់ពន្ធនាគារព្រៃស។
នៅថ្ងៃទី៩ ខែធ្នូ អ្នកបឹងកក់បាននាំគ្នាដើរដាក់ញត្តិនៅតាមស្ថានទូតចំនួន៧ គឺស្ថានទូតសហរដ្ឋអាមេរិក ស្ថានទូតអង់គ្លេស និងស្ថានទូតបារាំង ស្ថានទូតអាល្លឺម៉ង់ ស្ថានទូតសហគមន៍អឺរ៉ុប ស្ថានទូតកូរ៉េខាងត្បូង និងស្ថានទូតជប៉ុន។
ស្វាមីរបស់លោកស្រី ទេព វន្នី គឺលោក អ៊ូ គង់ជា ថ្លែងថា ពួកគាត់មកស្ថានទូតនេះដើម្បីស្នើឲ្យដាក់សម្ពាធទៅរដ្ឋាភិបាលដោះលែងព្រះសង្ឃ សកម្មជននយោបាយ និងសកម្មជនដីធ្លី ចំនួន ១៨នាក់។ លោកថា ស្ត្រីអ្នកបឹងកក់ចំនួន ៨នាក់ ដែលកំពុងជាប់ពន្ធនាគារដោយការតវ៉ាដីធ្លីនឹងធ្វើកូដកម្មអត់អាហារក្នុងពន្ធនាគារនៅថ្ងៃទី១០ ធ្នូ ដែលចំថ្ងៃប្រារព្ធពិធីបុណ្យសិទ្ធិមនុស្សអន្តរជាតិ ១០ ធ្នូ ទៅរហូតដល់មានការដោះលែងពួកគេ។ លោកថា ពួកគេអត់មានកំហុសអីទេគ្រាន់តែសុំឲ្យអន្តរាគមន៍រំដោះទឹកចេញពីសហគមន៍ប៉ុណ្ណោះ។
ការជួបជុំគ្នារបស់អ្នកភូមិនេះ មានការដាក់កម្លាំងសន្តិសុខជាច្រើនតាមឃ្លាំមើល ប៉ុន្តែមិនមានការរារាំងពលរដ្ឋនោះទេ។ មន្ត្រីស្ថានទូតទាំង៧ បានចេញមកទទួលយកញត្តិពីតំណាងអ្នកបឹងកក់ ទាក់ទងនឹងការសុំអន្តរាគមន៍នេះ។
មន្ត្រីស្ថានទូតបារាំង ទទួលបន្ទុកការងារសន្តិសុខម្នាក់ បានចេញមកទទួលញត្តិពីពលរដ្ឋ ថ្លែងតាមរយៈអ្នកបកប្រែថា ពួកគេនឹងយកញត្តិពីពលរដ្ឋទៅបកប្រែ ហើយបន្ទាប់មកពួកគេនឹងដាក់ជូនឯកអគ្គរដ្ឋទូតតាមការស្នើសុំពីអ្នកបឹងកក់។ ទោះជាយ៉ាងនេះក្ដី លោកថា ការសម្រេចយ៉ាងណានោះគឺជាសិទ្ធិរបស់មន្ត្រីស្ថានទូត។
កាលពីថ្ងៃទី៨ ធ្នូ ក្រុមគ្រួសារអ្នកបឹងកក់ បានដាក់លិខិតមួយតាមរយៈលោក សម រង្ស៊ី ប្រធានគណបក្សសង្គ្រោះជាតិ ឲ្យជួយអន្តរាគមន៍ពួកគេបានជួបលោកនាយករដ្ឋមន្ត្រី ហ៊ុន សែន ដើម្បីទាមទារឲ្យមានការដោះលែងមនុស្សទាំង ១៨នាក់។ បន្ទាប់ពីមានការចាប់ខ្លួនមនុស្សជាបន្តបន្ទាប់ សង្គមស៊ីវិល និងបក្សប្រឆាំងក៏បានដាក់លិខិតទៅក្រសួងស្ថាប័នពាក់ព័ន្ធទាមទារឲ្យការដោះលែងអ្នកទាំងអស់ដោយគ្មានលក្ខខណ្ឌ។ ពួកគេយល់ឃើញថា តុលាការមិនឯករាជ្យ តុលាការក្រោមសម្ពាធអ្នកនយោបាយ កាត់ក្ដីដោយគ្មានយុត្តិធម៌។ ទោះយ៉ាងណា មន្ត្រីក្រសួងយុត្តិធម៌ធ្លាប់បានឆ្លើយតបថា គឺជាឆន្ទានុសិទ្ធិរបស់តុលាការដែលធ្វើការតាមនីតិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។