អ្នកកាសែតក្នុងស្រុក៣នាក់ រួមទាំងភរិយាអ្នកកាសែតម្នាក់ ត្រូវសមត្ថកិច្ចកងរាជអាវុធហត្ថខេត្តស្ទឹងត្រែង ចាប់ខ្លួនក្នុងបទចោទថា អ្នកកាសែតទាំងនោះកំហែងយកប្រាក់ ៥០០ដុល្លារ។
ចាងហ្វាងកាសែតនគររាជលោក គឹម សុវណ្ណរិទ្ធ និងភរិយា អ្នកយកព័ត៌មានកាសែតសង្គមខ្មែរលោក ម៉ម ម៉ុន និងអ្នកយកព័ត៌មានកាសែតជាតិខ្មែរ លោក គឹម ស៊ីនឿន ត្រូវចាប់ខ្លួនកាលពីថ្ងៃទី២០ ខែកក្កដា នៅភូមិស្រែស្រណុក ឃុំស្រែគរ ស្រុកសេសាន ខេត្តស្ទឹងត្រែង។
មន្ត្រីឃ្លាំមើលសិទ្ធិមនុស្សសមាគមអាដហុក លោក ហូ សំអុល មានប្រសាសន៍បញ្ជាក់ថា អ្នកកាសែតទាំងបីនាក់រួមទាំងភរិយា ត្រូវបាននាំខ្លួនទៅរក្សាទុកនៅបញ្ជាការដ្ឋានកងរាជអាវុធហត្ថខេត្ត។ លោកបញ្ជាក់ថា អ្នកកាសែតបានបញ្ជាក់ប្រាប់លោកថា ពួកគេបានទៅថតគំនរឈើមួយរបស់មន្ត្រីកងរាជអាវុធហត្ថដែលបម្រុងដឹកជញ្ជូនចេញពីព្រៃ ក៏ប៉ុន្តែមន្ត្រីអាវុធហត្ថអ្នកការពារឈើប្រាប់ថា ឈើនេះជាឈើរបស់មេបញ្ជាការកងរាជអាវុធហត្ថផ្ទៃប្រទេស គឺលោក សៅ សុខា ដើម្បីសាងសង់អាគារកងរាជអាវុធហត្ថ។
លោកបន្តថា អ្នកកាសែតបានសុំប្រាក់ចាក់សាំងរថយន្តពីមន្ត្រីអាវុធហត្ថ ក៏ប៉ុន្តែមន្ត្រីអាវុធហត្ថទទួលបញ្ជាពីមេបញ្ជាការរបស់ខ្លួនឲ្យឃាត់ខ្លួនអ្នកកាសែត៖ «ស៊ើបអង្កេតបន្តទៅ ព្រោះបើតាមការឆ្លើយបំភ្លឺរបស់ជនជាប់ចោទគាត់ថា មិនបានសុំទេ ខាងអាវុធហត្ថគេចោទថា គាត់ទៅកំហែងយកអ៊ីចឹងប្រហែលជាគេចង់ធ្វើបាបអ៊ីចឹង ព្រោះអីបើតាមខ្ញុំស៊ើបទៅខាងមន្ត្រីអាវុធហត្ថហ្នឹងគាត់ច្រើនកាច់កុងខាងសារព័ត៌មានអ៊ីចឹងណា»។
នៅរសៀលថ្ងៃទី២១ ខែកក្កដា វិទ្យុអាស៊ីសេរី បានទូរស័ព្ទសុំការបញ្ជាក់ពីមេបញ្ជាការកងរាជអាវុធហត្ថខេត្តស្ទឹងត្រែង លោក អៀង វ៉ាន់ឌី ប៉ុន្តែអ្នកទទួលទូរស័ព្ទបញ្ជាក់ថា លោកមេបញ្ជាការមិននៅក្បែរទូរស័ព្ទនោះទេ។ យ៉ាងនេះក្តី មន្ត្រីការពារសិទ្ធិមនុស្សដដែលឲ្យដឹងថា សមត្ថកិច្ចកងរាជអាវុធហត្ថគ្រោងបញ្ជូនអ្នកកាសែតទាំងបីនាក់ រួមទាំងភរិយាទៅស្ថាប័នអយ្យការតុលាការខេត្តនៅថ្ងៃអង្គារ ទី២២ ខែកក្កដា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។