ចំណែកពលករចំណាកស្រុកទាំងនោះវិញ អះអាងថា ពួកគេមិនតូចចិត្តឡើយចំពោះការចាប់បញ្ជូនត្រឡប់មកវិញនេះ។ ប៉ុន្តែអ្វីដែលពួកគេខកចិត្តត្រង់ថា នៅពេលអាជ្ញាធរថៃ បញ្ជូនដល់ស្រុកខ្មែរ ត្រូវរងការធ្វើបាប និងជំរិតទារលុយមួយដំណាក់ទៀតពីប៉ូលិសច្រកព្រំដែនរបស់កម្ពុជា ជាថ្នូរនឹងការបានវិលចូលប្រទេសរបស់ខ្លួនវិញ។
ពលករខ្មែរចំណាកស្រុកមកពីប្រទេសថៃ បានចោទប៉ូលិសការពារព្រំដែនច្រកអូស្មាច់ ថាបានជំរិតទារលុយពីពួកគេក្នុងម្នាក់ ១០០បាត ប្រមាណ ១ម៉ឺនរៀល ចំពោះករណីខកខានមិនបានបង់ឲ្យប៉ូលិសយាមការពារប៉ុស្តិ៍ចេញចូលព្រំដែនទេ ត្រូវរងការវាយធ្វើបាប និងគំរាមចាប់បញ្ជូនត្រឡប់ទៅប្រទេសថៃ វិញ។
ពលរដ្ឋនៅស្រុកបាកាន ខេត្តពោធិ៍សាត់ លោក បូ ធឿន មានប្រសាសន៍នៅថ្ងៃទី១៣ មេសា ដោយចាត់ទុកមន្ត្រីប៉ូលិសច្រកព្រំដែនអូស្មាច់ ថាគឺជាការសម្លាប់ពលរដ្ឋរបស់ខ្លួនឯងបន្ថែមទៀតពីលើភាពក្រីក្រដែលកំពុងប្រឈមក្នុងពេលបច្ចុប្បន្ននេះ។ លោកបន្តថា ប៉ូលិសព្រំដែនខាងភាគីកម្ពុជា តែងវាយធ្វើបាបចំពោះអ្នកដែលហ៊ានតវ៉ាពីការទាលុយ និងចាត់ទុកពលរដ្ឋខ្លួនដែលទៅរកការងារធ្វើដោយពុំមានលិខិតឆ្លងដែនត្រឹមត្រូវថា គឺជាអ្នកដែលឆ្លងដែនខុសច្បាប់ និងត្រូវតែអនុវត្តន៍តាមតម្រូវការជាចាំបាច់ ដោយចៀសមិនបាន៖ «ដល់ពេលត្រឡប់មកវិញហើយ អត់មានលុយឲ្យគេ គឺគំរាមកំហែងសម្លុត ដោយសារយើងអត់លុយឲ្យគេណាបង។ មកជាមួយខ្ញុំ មានគេវ៉ៃដែរបង អាម្នាក់ក្នុង៤-៥នាក់ គេវ៉ៃ មានប៉ូលិសខ្លះគាត់សម្លុត គ្រាន់មើលមុខគាត់មិនបានផង។ គាត់សម្លុតគំរាមកំហែងយើង ដេញយើងឲ្យចូលប៉ុស្តិ៍ចូលអីពេលដែលយើងអត់លុយ»។
ចំណែកលោក ញាណ សារុំ ពលរដ្ឋនៅក្រុងសំរោង ខេត្តឧត្តរមានជ័យ បញ្ជាក់ថា ការពិតអ្នកដែលអនុញ្ញាតឲ្យពលរដ្ឋឆ្លងដែនចូលទៅប្រទេសដោយខុសច្បាប់ គឺជាមន្ត្រីប៉ូលិសព្រំដែន។ ហេតុនេះ លោកអះអាងថា ពលករចំណាកស្រុកទាំងនេះមិនគួរត្រូវរងការចោទប្រកាន់ថាខុសច្បាប់ ឬជំរិតទារប្រាក់នោះទេ៖ «ពេលនាំចូលឲ្យចូល ពេលដែលនាំចេញថាគ្នាខុសច្បាប់។ ពេលដែលគ្នាចេញពីប្រទេសថៃ ជាន់ដីខ្មែរ ថាគ្នាខុសច្បាប់។ បានខ្ញុំនិយាយថា រឿងខុសច្បាប់យ៉ាងណា បើអ្នកឯងអ្នកឲ្យទៅនោះ បើអ្នកឯងកុំឲ្យទៅគេដែលហ៊ានទៅអ្ហា។ បើទៅប្រាប់ថាធ្វើប៉ាសស្ព័រប៉ាសអី គេចេះទៅធ្វើទៅអីហើយ ពេលមកដល់អើ ឲ្យតែបានលុយឲ្យទៅហើយ»។
ក៏ប៉ុន្តែ បញ្ហានេះត្រូវបានលោក គង់ សារឿន ប្រធានច្រកអូស្មាច់ នៃខេត្តឧត្តរមានជ័យ បដិសេធដោយចាត់ទុកថា មន្ត្រីរបស់លោកពុំដែនអនុវត្តន៍ផ្ទុយពីផែនការដែលដាក់ចេញនោះទេ។ លោកបន្តថា តែផ្ទុយទៅវិញ មន្ត្រីការពារព្រំដែន តែងអន្តរាគមន៍ជួយសម្រួលកិច្ចការនានាជូនពលរដ្ឋដែលមានបញ្ហាប៉ុណ្ណោះ៖ «អត់មានសម្លុតណា ពលករណាទេបង។ ពលករមានតែសម្រួលមកដូចពីម្សិលមិញ មានគេចាប់ប្រជាជនខ្មែរ ៦នាក់ទៅ ទៅរកត្រួតពិនិត្យ ខ្ញុំទៅជួយអន្តរាគមន៍ហ្នឹងដែរណាស់»។
ចំណែក លោក កែម ឡី អ្នកស្រាវជ្រាវ និងជាអ្នកវិភាគសង្គម គិតថា អ្វីដែលពលរដ្ឋខ្មែរនៅតែបន្តរកការងារធ្វើក្នុងប្រទេសថៃ នោះ ក៏ព្រោះតែកម្ពុជា ពុំមានទីផ្សារគ្រប់គ្រាន់ក្នុងការឆ្លើយតបពីតម្រូវការឲ្យបានជាក់លាក់របស់ប្រជាជន ដូចប្រទេសថៃ៖ «៧០ ទៅ ៨០% ហើយ ខ្មែរយើងហ្នឹង គឺខ្ចីលុយពីស្ថាប័នមីក្រូហិរញ្ញវត្ថុ ហើយភាគច្រើនពួកគាត់ដែលខ្ចីលុយហ្នឹង រកស៊ីអត់ចំណេញទេ ខាតចុងខាតដើមលក់ដីលក់ដីហ្នឹង ហើយបញ្ជូនកូនទៅរកចំណាកស្រុកតែម្ដង។ ៩៥% នៃប្រជាជនខ្មែរដែលទៅហ្នឹង គាត់ថារាល់ថ្ងៃហ្នឹង កុំតែបានទៅទៀតហ្នឹងណា។ បើអត់មានថៃ ហ្នឹង មិនដឹងជារកស៊ីអីទេ ងាប់អស់ហើយ»។
លោក កែម ឡី បន្តថា ផ្អែកតាមការសិក្សាស្រាវជ្រាវចុងខែមីនា កន្លងទៅថ្មីៗនេះ រកឃើញថា ពលរដ្ឋប្រមាណ ៩០% នៅតាមខ្សែបន្ទាត់ព្រំដែនកម្ពុជា ត្រឹមពឹងផ្អែកទាំងស្រុងលើសេដ្ឋកិច្ចរបស់ប្រទេសថៃ។ ក្នុងនោះ ៩៥% ត្រូវជាប់បំណុលធនាគារ និងសម្រេចចិត្តធ្វើចំណាកស្រុកទៅរកការងារធ្វើនៅប្រទេសថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។