សង្គមស៊ីវិលរិះគន់ចំពោះប្រាក់ជំនួយរបស់សហភាពអឺរ៉ុប ថាបានជួយលើកកម្ពស់ការអភិវឌ្ឍនៅប្រទេសកម្ពុជា តិចតួច។ ទឹកប្រាក់ជំនួយនោះបានជួយដល់ក្រុមអ្នកមានអំណាចកាន់តែមានអំណាចខ្លាំងឡើង ស្របពេលដែលប្រជាពលរដ្ឋជាច្រើនរងទុក្ខវេទនា ក្នុងនោះរួមមាន ការរំលោភសិទ្ធិមនុស្ស ការកើនឡើងក្រុមអ្នកងាយរងគ្រោះ និងប្រជាពលរដ្ឋក្រីក្រ ជាដើម។
សហភាពអឺរ៉ុប ជាម្ចាស់ជំនួយធំបំផុតមួយរបស់កម្ពុជា ដែលបានបញ្ចេញទឹកប្រាក់ប្រមាណ ២០០លានដុល្លារអាមេរិកក្នុងមួយឆ្នាំ។ ភាគច្រើននៃទឹកប្រាក់ទាំងនោះ គឺជាជំនួយឥតសំណង។
ក្រៅពីនេះ គម្រោងអភិវឌ្ឍន៍ចំនួន ៧០ផ្សេងទៀតរបស់សហភាពអឺរ៉ុប កំពុងដំណើរការនៅទូទាំងប្រទេសកម្ពុជា ដែលសមាមាត្រទឹកប្រាក់ជិត ១០០លានដុល្លារអាមេរិក។ សហភាពអឺរ៉ុប ក៏បានផ្ដល់ទឹកប្រាក់រាប់លានដុល្លារទៀត ជួយអភិវឌ្ឍការនាំចេញផលិតផលកម្ពុជា តាមរយៈការផ្ដល់កិច្ចព្រមព្រៀងស្ដីពីការអនុគ្រោះពន្ធគយ។
ប៉ុន្តែ អង្គការសង្គមស៊ីវិលដែលតាមដានកិច្ចការអភិវឌ្ឍន៍ពីការប្រើប្រាស់ជំនួយបរទេស សង្កេតឃើញថា ទឹកប្រាក់ជំនួយ និងប្រាក់កម្ចីរបស់សហភាពអឺរ៉ុប បានប្រើប្រាស់ខុសគោលដៅ និងខ្វះការត្រួតពិនិត្យរវាងម្ចាស់ជំនួយ និងអ្នកអនុវត្តន៍។
នាយកអង្គការសមធម៌កម្ពុជា លោក អៀង វុទ្ធី មានប្រសាសន៍ថា លោកអបអរសាទរចំពោះទឹកប្រាក់ជំនួយរបស់សហភាពអឺរ៉ុប ដើម្បីចូលរួមដល់ការអភិវឌ្ឍប្រទេសកម្ពុជា។ ប៉ុន្តែ លោកក៏បានលើកឡើងអំពីបញ្ហាមួយចំនួន ដូចជា ការរំលោភសិទ្ធិមនុស្ស និងការកើនឡើងក្រុមអ្នកងាយរងគ្រោះពីគោលនយោបាយរបស់សហភាពអឺរ៉ុប។
«សំឡេង»
លោក អៀង វុទ្ធី មានប្រសាសន៍បន្ថែមថា រដ្ឋាភិបាលកម្ពុជា ចង់បានច្រើនបំផុត គឺការផ្ដល់ប្រាក់ជំនួយដោយគ្មានលក្ខខណ្ឌ ដែលងាយស្រួលក្នុងការយកប្រើប្រាស់តាមវិធីណាក៏បាន។ ជាក់ស្ដែង រដ្ឋាភិបាលកម្ពុជា ក៏ធ្លាប់ប្រកាសរិះគន់ធនាគារពិភពលោក (World Bank) កន្លងទៅថា ធនាគារនេះមានលក្ខខណ្ឌស្មុគស្មាញពេកក្នុងការស្នើសុំប្រាក់ជំនួយអភិវឌ្ឍន៍។
បន្ថែមលើនេះ ប្រធានអង្គការតម្លាភាពកម្ពុជា លោក ព្រាប កុល មានប្រសាសន៍ថា ការប្រើប្រាស់ជំនួយបរទេសនៅកម្ពុជា ហាក់មានភាពមិនប្រក្រតី ដូចមានឧទាហរណ៍ស្រាប់អំពីរឿងអំពើពុករលួយនៃមូលនិធិសកល ក្នុងការជួយគាំទ្រវិស័យសុខាភិបាល ជាដើម។ លោកបញ្ជាក់ថា មានរឿងជាច្រើនទៀតដែលមានការលាក់បាំង ដោយសារការសហការគ្នារវាងអ្នកទទួលជំនួយ អ្នកអភិវឌ្ឍន៍ និងភាពទន់ខ្សោយនៃការត្រួតពិនិត្យប្រាក់ជំនួយបរទេស។
«សំឡេង»
ទោះជាយ៉ាងណាក៏ដោយ ទឹកប្រាក់ជំនួយ និងកម្ចីរបស់សហភាពអឺរ៉ុប មិនទាន់រកឃើញពីភាពមិនប្រក្រតីនៅឡើយ ចាប់តាំងពីក្រុមប្រទេសនេះបានផ្ដល់ជំនួយយ៉ាងច្រើនសន្ធឹកសន្ធាប់ដល់កម្ពុជា។
គិតពីឆ្នាំ២០០០ រហូតដល់ឆ្នាំ២០១៣ សហភាពអឺរ៉ុប បានផ្ដល់ជំនួយយ៉ាងហោចណាស់ ៧០០លានដុល្លារអាមេរិក ដែលជួយលើផ្នែកអប់រំ មនុស្សធម៌ បរិស្ថាន សិទ្ធិមនុស្ស និងគាំទ្រដល់អង្គការក្រៅរដ្ឋាភិបាលនានា ដើម្បីជួយអភិវឌ្ឍ និងស្ដារឡើងវិញ ដែលមានគម្រោងអភិវឌ្ឍន៍ជាច្រើនកំពុងអនុវត្ត។
ប៉ុន្តែ សង្គមស៊ីវិលនៅតែចង់ឲ្យសហភាពអឺរ៉ុប មានយន្តការតាមដានការប្រើប្រាស់ជំនួយរបស់ខ្លួន ដើម្បីបម្រើផលប្រយោជន៍ដល់ប្រជាពលរដ្ឋក្រីក្រ។
ឆ្លើយតបនឹងបញ្ហានេះ ប្រធានប្រតិភូនៃសហភាពអឺរ៉ុប ប្រចាំកម្ពុជា លោកឯកអគ្គរដ្ឋទូត ហ្សង់ ហ្វ្រង់ស័រ កូតាំង (Jean François CAUTAIN) មានប្រសាសន៍ប្រាប់វិទ្យុអាស៊ីសេរី តាមសារអេឡិចត្រូនិកនៅកំឡុងខែឧសភា ឆ្នាំ២០១៤ ថា ដើម្បីធានាថា ប្រាក់ជំនួយនេះត្រូវប្រើប្រាស់ប្រកបដោយតម្លាភាព និងត្រឹមត្រូវនោះ សហភាពអឺរ៉ុប តែងតែធ្វើការវាយតម្លៃគម្រោងទាំងអស់នោះជាប្រចាំ និងមានធ្វើសវនកម្មដោយអង្គភាពឯករាជ្យ។ បន្ថែមលើនេះ ទឹកប្រាក់ជំនួយរបស់សហភាពអឺរ៉ុប តែងផ្ដោតសំខាន់លើការកាត់បន្ថយការរំលោភសិទ្ធិមនុស្ស ដែលកំពុងកើតឡើងនៅប្រទេសកម្ពុជា។
លោក កូតាំង បញ្ជាក់ទៀតថា សហភាពអឺរ៉ុប និងប្រទេសជាសមាជិកទាំងអស់ គ្រោងនឹងអនុម័តកញ្ចប់ថវិកាជំនួយដល់ប្រទេសកម្ពុជា រាប់ពាន់លានដុល្លារអាមេរិក ចាប់ពីឆ្នាំ២០១៤ តទៅ។
របាយការណ៍របស់សហភាពអឺរ៉ុប ដោយមិនរួមបញ្ចូលសមាជិកទាំង ២៨ប្រទេស គ្រោងនឹងផ្ដល់ទឹកប្រាក់ ៦០០លានដុល្លារអាមេរិក ចាប់ពីឆ្នាំ២០១៤ ដល់ឆ្នាំ២០២០ ដែលផ្ដោតសំខាន់លើការគ្រប់គ្រងហិរញ្ញវត្ថុសាធារណៈ និងការគ្រប់គ្រងធនធានធម្មជាតិ។ សហភាពអឺរ៉ុប ជឿជាក់ថា ទឹកប្រាក់នេះនឹងជួយកាត់បន្ថយភាពក្រីក្រ និងលើកកម្ពស់ការអភិវឌ្ឍសេដ្ឋកិច្ចសង្គមប្រកបដោយនិរន្តរភាព។ ក្រៅពីនេះ សហភាពអឺរ៉ុប គ្រោងនឹងគាំទ្រដល់សង្គមស៊ីវិល ដែលជាមូលដ្ឋានសំខាន់សម្រាប់ការអភិវឌ្ឍនៅប្រទេសកម្ពុជា។
ដោយឡែក ប្រទេសសមាជិកសហភាពអឺរ៉ុប ទាំង២៨ គ្រោងនឹងផ្ដល់ជំនួយអភិវឌ្ឍន៍ជិត ២ពាន់លានដុល្លារអាមេរិក ចាប់ពីឆ្នាំ២០១៤ ដល់ឆ្នាំ២០២០ ដើម្បីជួយអភិវឌ្ឍយុទ្ធសាស្ត្រចតុកោណអាណត្តិទីបី។
ទោះបីជាសហភាពអឺរ៉ុប បានផ្ដល់ទឹកប្រាក់រាប់ពាន់លានដុល្លារអាមេរិក ដើម្បីចូលរួមអភិវឌ្ឍកម្ពុជា ក៏ដោយ ប៉ុន្តែអង្គការសិទ្ធិមនុស្សអន្តរជាតិជាច្រើន បានរកឃើញថា ស្ថានភាពសិទ្ធិមនុស្សនៅកម្ពុជា មានការអភិវឌ្ឍតិចតួចប៉ុណ្ណោះ។
ក្រោមការត្រួតពិនិត្យតាមពេលវេលាកំណត់ពីរដ្ឋជាសមាជិករបស់ក្រុមប្រឹក្សាសិទ្ធិមនុស្ស នៃអង្គការសហប្រជាជាតិ បានបញ្ជាក់ថា ស្ថានភាពសិទ្ធិមនុស្សកម្ពុជា បានធ្លាក់ចុះគួរឲ្យកត់សម្គាល់ ចាប់តាំងពីឆ្នាំ២០០៩ រហូតដល់បច្ចុប្បន្ន។ បន្ថែមលើនេះ ស្ថាប័នស្រាវជ្រាវអភិវឌ្ឍន៍នៅកម្ពុជា បានរកឃើញក្រុមអ្នកងាយរងគ្រោះ រួមមាន អ្នកមានដីតិចជាងមួយហិកតារ អ្នកក្រីក្រដែលមិនអាចរកចំណូលបាន ៥ពាន់រៀលក្នុងមួយថ្ងៃ ប្រជាពលរដ្ឋគ្មានការងារធ្វើមានចំនួន ១១លាននាក់ ក្នុងចំណោមប្រជាពលរដ្ឋកម្ពុជា សរុប ១៥លាននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។