ក្រសួងមហាផ្ទៃ ប្រតិកម្មនឹងសម្ភីរបស់ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ថា បានប្រើពាក្យធ្ងន់ធ្ងរខ្លាំងដែលហាក់បីដូចជាមើលរំលងការបំពេញការងាររបស់ក្រសួងនៅពេលកន្លងមក។ ប្រតិកម្មនេះ បន្ទាប់ពីលោក ឱម យ៉ិនទៀង ថ្លែងថា លោកនឹងប្រើច្រាសដែកដុះក្អែលនគរបាលអត្តសញ្ញាណប័ណ្ណ និងនគរបាលចរាចរណ៍ដែលប្រព្រឹត្តអំពើពុករលួយ។
អ្នកនាំពាក្យក្រសួងមហាផ្ទៃ លោក ខៀវ សុភ័គ ថា លិខិតរបស់លោកមិនមែនជាអាយ៉ៃឆ្លើយឆ្លង ចង់បានការឆ្លើយតបពីលោក ឱម យ៉ិនទៀង ប៉ុន្តែលោកគ្រាន់តែចង់ប្រាប់ទៅប្រធានអង្គភាពប្រឆាំងអំពើពុករលួយ ថាការប្រើពាក្យបែបនេះ គឺមានន័យថា នគរបាលក្រសួងមហាផ្ទៃ ពុករលួយដុះស្នឹម។
លោក ខៀវ សុភ័គ មិនបដិសេធថា គ្មាននគរបាលពុករលួយនៅក្រសួងមហាផ្ទៃ នោះទេ ប៉ុន្តែលោកថា មានបុគ្គលមួយក្ដាប់តូចប៉ុណ្ណោះដែលប្រព្រឹត្តអំពើពុករលួយ៖ «ប្រើច្រាស់ដែកដើម្បីដុសសំអាតបានន័យថា ដុះស្នឹម ដុះស្លែ សំខាន់ពាក្យថា ច្រាស់ដែកនោះ កុំមើលដើមឈើមួយដើម មើលព្រៃទាំងមូល។ នគរបាលអ៊ីចឹងដែរ កុំមើលនគរបាលតែមួយមើលនគរបាលទាំងអស់»។
ក្នុងសេចក្ដីប្រកាសព័ត៌មានរបស់ក្រសួងមហាផ្ទៃ នៅថ្ងៃទី១០ ខែធ្នូ បានដកស្រង់សម្ដីរបស់ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង និយាយកាលពីថ្ងៃទី៩ ខែធ្នូ ក្នុងពិធីអបអរសាទរទិវាជាតិ និងអន្តរជាតិ ប្រយុទ្ធប្រឆាំងអំពើពុករលួយថា នគរបាលអត្តសញ្ញាណប័ណ្ណ និងនគរបាលចរាចរណ៍ដែលប្រព្រឹត្តអំពើពុករលួយ លោកនឹងប្រើច្រាសដែកដុសសំអាតបញ្ហានេះ។
លិខិតដដែលបានឆ្លើយតបថា កន្លងមកក្រសួងបានចាត់វិធានការរដ្ឋបាល និងផ្លូវច្បាប់ចំពោះនគរបាលដែលប្រព្រឹត្តទង្វើមិនគប្បី ប្រាសចាកក្រមសីលធម៌មន្ត្រីរដ្ឋបាលសាធារណៈ និងវិន័យកងកម្លាំងនគរបាល។
វិទ្យុអាស៊ីសេរី មិនអាចសុំការឆ្លើយតបពីប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បានទេ នៅថ្ងៃទី១១ ខែធ្នូ។
ប្រធានអង្គការតម្លាភាពកម្ពុជា លោក ព្រាប កុល យល់ថា ការចេញមុខបកស្រាយរបស់ក្រសួងមហាផ្ទៃ នៅពេលនេះ ឬការរក្សាភាពស្ងប់ស្ងៀម មិនមែនជារឿងសំខាន់នោះទេ ប៉ុន្តែអ្វីដែលសំខាន់នោះ ក្រសួងមហាផ្ទៃ បានធ្វើការងារលើអ្វីដែលអង្គភាពប្រឆាំងអំពើពុករលួយលើកឡើង។
មន្ត្រីសង្គមស៊ីវិលដែលធ្វើការងារទាក់ទងករណីពុករលួយរូបនេះ យល់ថា អង្គភាពប្រឆាំងអំពើពុករលួយ លុយជ្រៅរឿងពុករលួយធំៗ ដែលបំផ្លាញលុយជាតិរាប់លានដុល្លារ៖ «យើងឃើញបញ្ហាហ្នឹងមើលទៅចំនួនច្រើន ប៉ុន្តែបើមើលពីទំហំទឹកប្រាក់ មិនច្រើនទេ។ គួរធ្វើដែរ ទាក់ទងអំពើពុករលួយទ្រង់ទ្រាយធំដែលបំផ្លាញលុយជាតិអស់ច្រើន»។
កាលពីថ្ងៃទី៩ ខែធ្នូ លោក ឱម យ៉ិនទៀង បានប្រាប់ក្រុមអ្នកសារព័ត៌មានថា ក្រសួងមហាផ្ទៃ ត្រូវបានពលរដ្ឋប្ដឹងជាងគេពីករណីពុករលួយ ហើយចំណាត់ថ្នាក់លេខពីរក្រសួងអប់រំ និងស្ថាប័នតុលាការ ស្ថិតក្នុងចំណាត់ថ្នាក់លេខ៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។