ប្រជាពលរដ្ឋមួយចំនួននៅស្រុកត្រពាំងប្រាសាទ ខេត្តឧត្តរមានជ័យ កំពុងស្វះស្វែងរកការជួយជ្រោមជ្រែងខាងផ្លូវច្បាប់ពីអង្គការសិទ្ធិមនុស្សក្រៅរដ្ឋាភិបាល ដើម្បីដាក់ពាក្យប្ដឹងប្រឆាំងនឹងមន្ត្រីកងរាជអាវុធហត្ថនៃស្រុកនោះចំនួន ៤នាក់ ទៅតុលាការ។
គម្រោងប្ដឹងនោះ បន្ទាប់ពីគេចោទប្រកាន់ថា មន្ត្រីកងរាជអាវុធហត្ថទាំង ៤នាក់ បានប្រើអំពើហិង្សាបំពានលើរូបកាយជនស៊ីវិល។
យ៉ាងហោចណាស់មានប្រជាពលរដ្ឋចំនួន ៣នាក់ និងអ្នកកាសែតម្នាក់ នៅភូមិត្រពាំងប្រាសាទ ស្រុកត្រពាំងប្រាសាទ បានរងរបួសដោយសារតែក្រុមទាហានដែលមកស៊ីផឹក បានវាយដំ បន្ទាប់មកក្រុមមន្ត្រីកងរាជអាវុធហត្ថ បានប៉ះទង្គិចគ្នាជាមួយប្រជាពលរដ្ឋទាំងនោះម្ដងទៀត។
ក្រុមប្រជាពលរដ្ឋបានចោទប្រកាន់មន្ត្រីកងរាជអាវុធហត្ថចំនួន ៤រូប ថាមានជាប់ពាក់ព័ន្ធនឹងការប្រើអំពើហិង្សាមកលើពួកគេ។
លោក លឹម ហ៊ាង គឺជាម្ចាស់ភោជនីយដ្ឋានមួយកន្លែង យីហោ កាកា០០៩ នៅក្នុងទីរួមស្រុកត្រពាំងប្រាសាទ។ គាត់បានមានប្រសាសន៍ថា កាលពីល្ងាចថ្ងៃទី១៦ ខែមេសា កន្លងទៅ មានទាហាន ២នាក់មកស៊ីផឹកនៅហាងរបស់គាត់ ហើយបានបបួលក្មេងស្រីម្នាក់ជាអ្នករត់តុទៅដេកជាមួយ ក៏ប៉ុន្តែក្មេងស្រីនោះបានប្រកែក ធ្វើឱ្យទាហាននោះខឹង។ បន្ទាប់មក ក្រុមទាហានក៏បានចាកចេញទៅ ដោយមិនចង់ឱ្យលុយ។ ពេលនោះ ក្មេងស្រីដែលរត់តុក៏ហៅទាហានឱ្យឈប់គិតលុយសិន ស្រាប់តែទាហានក៏វាយក្មេងស្រីម្នាក់នោះ។ បុរសដដែលបានបន្ថែមថា នៅពេលឃើញស្ថានភាពបែបនោះ លោកក៏ទៅដកយកម៉ូតូហុងដាឌ្រីម សេរី២០១១ មួយគ្រឿងពីទាហាន ដើម្បីឱ្យដោះស្រាយរឿងថ្លៃស៊ីផឹក ប៉ុន្តែក្រោយមក ទាហានបានហៅគ្នា ២នាក់មកទៀត ដោយមានអាវុធ ២ដើមមកជាមួយផង។ ឃើញដូច្នេះ លោកក៏ទូរស័ព្ទហៅកងរាជអាវុធហត្ថមកជួយអន្តរាគមន៍ ប៉ុន្តែនៅពេលដែលកងរាជអាវុធហត្ថមកដល់ និយាយជាមួយកងទាហានបន្តិច បែរជាមកវាយតប់ និងចាប់ខ្លួនពួកគាត់ទៅវិញ។
លោក លឹម ហ៊ាង៖ «ចាប់ខ្ញុំវាយខ្នោះ ហើយខ្ញុំសួរថា មានរឿងអី បានជាចាប់ខ្ញុំ ហើយក៏លោកហៃហ្នឹងបានយកដៃទះកំផ្លៀងខ្ញុំ។ ខ្ញុំក៏បម្រះខ្លួនរត់បាត់ ហើយក៏ចាប់ផ្ដើមចាប់ម្នាក់ទៀតដែលជាអ្នកសារព័ត៌មាន ធ្វើអំពើហិង្សាលើរូបគេទៅ។ បងខ្ញុំអត់មានកំហុសអីទេ បញ្ជាការរងកងរាជអាវុធហត្ថចាប់យកទៅ ឥឡូវមិនទាន់បានចេញទេ។ ប្រពន្ធខ្ញុំម្ចាស់ហាង ពោះធំ ៧ខែ ជិត ៨ខែហើយ គេចាប់ដាក់លើឡាន ក្រោយមកប្រហែលជាម៉ោង ១១ ទៅម៉ោង ១២យប់ ចាប់ផ្ដើមសន្លប់។ អីចឹងខាងកងរាជអាវុធហត្ថហ្នឹងបញ្ជូនទៅព្យាបាលនៅអន្លង់វែង»។
ចំណែកលោក សុង តៃហ្គេច ជាអ្នកយកព័ត៌មានឱ្យកាសែតប្រព័ន្ធយុត្តិធម៌ បានអះអាងថា លោកជាអ្នកបានឃើញហេតុការណ៍នៃជម្លោះនោះ ហើយលោកក៏បានទៅថតយករូបភាព ក៏ប៉ុន្តែនៅពេលដែលមន្ត្រីកងរាជអាវុធហត្ថមួយក្រុមទៅដល់ ឃើញលោកកំពុងថតរូប ក៏វាយលោក ហើយយកម៉ាស៊ីនថតរបស់លោកទៅបោកចោលអស់។
ប្រជាពលរដ្ឋបានចោទប្រកាន់មន្ត្រីកងរាជអាវុធហត្ថ ៤នាក់ ឈ្មោះ សឿន ហៃ ឈ្មោះ ឡេង គឹមសាន ហៅ យួន ឈ្មោះ ប៊ុត សាវុធ និងឈ្មោះ ថា គឺជាអ្នកដែលបានប្រើហិង្សាមកលើអ្នកភូមិ។
ទោះយ៉ាងណា មន្ត្រីកងរាជអាវុធហត្ថស្រុកត្រពាំងប្រាសាទ បានព្យាយាមបដិសេធចោលការចោទប្រកាន់ទាំងនោះ។
មេបញ្ជាការកងរាជអាវុធហត្ថស្រុកត្រពាំងប្រាសាទ គឺលោក លី ដារិទ្ធិ បានហៅសកម្មភាពម្ចាស់ហាងកាកា០០៩ ដែលដកហូតយកម៉ូតូមួយគ្រឿងពីទាហាន ទៅទុកដើម្បីដោះស្រាយលុយជំពាក់ថ្លៃស៊ីផឹកនោះថា គឺជាករណីប្លន់ម៉ូតូទៅវិញ។
មេបញ្ជាការដដែល បានបញ្ជាក់ថា ទាហាន ២នាក់ដែលមកស៊ីផឹកនោះ គឺជាកងល្បាតការពារសន្តិសុខនៅពេលបុណ្យចូលឆ្នាំ ហើយបានចូលទៅស៊ីផឹកអស់ស្រាបៀចំនួន ៨កំប៉ុង ក៏ប៉ុន្តែម្ចាស់ហាងបែរជាគិតលុយរហូតដល់ស្រាបៀកន្លះកេស ទើបទាហានប្រកែកមិនព្រមឱ្យលុយ។ នៅពេលដែលឈ្លោះប្រកែកគ្នានោះ ម្ចាស់ហាងក៏ទូរស័ព្ទហៅកងរាជអាវុធហត្ថរបស់លោកទៅជួយមែន ក៏ប៉ុន្តែកងរាជអាវុធហត្ថបានសាកសួរទៅឃើញថា ម្ចាស់ហាងជាអ្នកមានកំហុស៖ «អត់មានបញ្ហាវាយធ្ងន់ធ្ងរទេ។ បើមានបញ្ហាតិចតួចដោយសារតែពេលដែលចាប់នោះ វាមានការប្រតាយប្រតប់គ្នារវាងម្ចាស់ហាងជាមួយនិងសមត្ថកិច្ច ពេលគេអញ្ជើញគាត់មក គាត់វាយលើគេទៅ ស្រីៗមកខាំ រយះដៃរយះជើង ដោយសារខាងហ្នឹងអ្នកបង្កទេ មិនមែនសមត្ថកិច្ចអ្នកទៅវាយទេ»។
សមាគមអាដហុក (Adhoc) ការពារសិទ្ធិមនុស្ស ខេត្តឧត្តរមានជ័យ បានឱ្យដឹងថា គេនឹងចាប់ផ្ដើមស៊ើបអង្កេតករណីនេះឱ្យបានឆាប់បំផុត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។