ពលរដ្ឋមកពីសហគមន៍មានជម្លោះដីធ្លីនៅរាជធានីភ្នំពេញ និងគ្រួសារអ្នកជាប់ឃុំ ២១នាក់ ជួបជុំគ្នាតវ៉ានៅក្រសួងយុត្តិធម៌ និងតុលាការកំពូល នៅព្រឹកថ្ងៃទី២៨ ខែមីនា នេះ។ ពួកគេជំរុញអោយក្រសួងយុត្តិធម៌ អន្តរាគមន៍ដោះលែងសកម្មជនសិទ្ធិមនុស្ស និងកម្មករចំនួន ២១នាក់ ដែលកំពុងជាប់ឃុំនៅពន្ធនាគារត្រពាំងផ្លុង ព្រមទាំងជំរុញតុលាការកំពូលពន្លឿនការជំនុំជម្រះសំណុំរឿងសុំនៅក្រៅឃុំរបស់ពួកគេ។
ផ្សែងទ្រលោមហុយចេញពីបាច់ធូបធំៗនៅក្នុងដៃអ្នកតវ៉ាប្រមាណ ១០០នាក់ នៅខាងមុខក្រសួងយុត្តិធម៌ លាយឡំនឹងចម្រៀងត្អូញត្អែរទាមទារអោយដោះលែងមនុស្ស ២១នាក់ អោយមានសេរីភាពដោយពុំមានលក្ខខណ្ឌ៖ «សូមយុត្តិធម៌ជួយរាស្ត្រល្អ អោយផុតទុក្ខរួចចេញពីគុក ចេញផុតពីភពសែនខ្មៅងងឹត។ សូមយុត្តិធម៌កើតមានដល់ ២១នាក់ វិលត្រឡប់មកផ្ទះ គ្រួសារអ្នកកំពុងរង់ចាំ»។
បន្ទាប់ពីបានទាមទារនៅទីនោះមួយរយៈពេល ពួកគេបានបន្តទៅខាងមុខតុលាការកំពូល និងបានហែក្បួនជុំវិញតុលាការ ដោយស្រែកទាមទារអោយតុលាការបើកសវនាការអោយបានឆាប់។
ក្រៅពីកាន់ធូបទាំងបាច់ៗដោយចងក្រណាត់សសរសេរថាដោះលែងអ្នក ២១នាក់នោះ ពួកគេក៏កាន់ផ្កាឈូក និងពាក់រូបថត លោក វន់ ពៅ និងលោក ចន្ទ ពុទ្ធិសក្តិ នៅលើក្បាល។
តំណាងអ្នកបឹងកក់ អ្នកស្រី ទេព វន្នី មានប្រសាសន៍នៅខាងមុខតុលាការកំពូលថា ការតវ៉ានៅពេលនេះ គឺជាការរំលឹកចំពោះស្ថាប័នទាំង២ បន្ទាប់ពីពួកគាត់បានដាក់ញត្តិស្នើសុំវិធានការ និងអន្តរាគមន៍ ប៉ុន្តែពុំមានការឆ្លើយតប៖ «ពីថ្ងៃទី២៥ ខែកុម្ភៈ ឆ្នាំ២០១៤ អ្នកសហគមន៍បឹងកក់ ខ្ញុំបានយកញត្តិមកដាក់នៅក្រសួងយុត្តិធម៌ និងតុលាការកំពូល។ ក្នុងខ្លឹមសារញត្តិនោះ យើងមានគោលបំណងអោយក្រសួងយុត្តិធម៌ ផ្តល់ជូនអ្នក ២១នាក់ ដោះលែងអោយមានសេរីភាពឡើងវិញឆាប់ៗនៅថ្ងៃខាងមុខនេះ។ រហូតដល់ពេលនេះ គឺមានរយៈពេលជាង ១ខែហើយ គឺសហគមន៍បឹងកក់ ខ្ញុំមិនទាន់ទទួលបានព័ត៌មានណាមួយពីក្រសួងយុត្តិធម៌ ឬពីតុលាការកំពូល ក្នុងការអនុវត្តទៅតាមញត្តិរបស់ពួកយើងដែលដាក់អោយពួកគាត់»។
បើទោះមានការទាមទារយ៉ាងណាក៏ដោយ ក៏ពុំមានមន្ត្រីណាម្នាក់ចេញមកផ្ដល់ចម្លើយដល់ពួកគេដែរ។ ក្រុមអ្នកតវ៉ាបាននាំគ្នាហែក្បួនហួសទៅខាងមុខព្រះបរមរាជវាំង និងបានអំពាវនាវសុំព្រះរាជអន្តរាគមន៍ពីព្រះមហាក្សត្រ៖ «សូមព្រះមហាក្សត្រជួយដល់រាស្ត្រផង។ ប្រជាពលរដ្ឋខ្មែរកំពុងតែរងទុក្ខវេទនាខ្លាំងណាស់ ពួកយើងអត់ត្រូវការអោយព្រះអង្គសម្ងំសុខ ដោយអត់មើលឃើញប្រជាពលរដ្ឋកំពុងរងទុក្ខវេទនានោះទេ។ សូមព្រះអង្គគង់ជាម្លប់របស់កូនចៅទាំងអស់គ្នា។ ដូច្នេះ ព្រះអង្គត្រូវតែតើនឡើង ដើម្បីទតប្រជារាស្ត្រខ្លួនឯងកំពុងតែវេទនាខ្លាំងណាស់»។
ការទាមទារបានបញ្ចប់នៅម៉ោងជាង ១០ព្រឹក ដោយពួកគេបានយកសំណល់ធូបដែលពួកគេអុជរួចនោះ ទៅរៀបជាអក្សរដោយប្រើភាសាអង់គ្លេស ដែលមានន័យថា ដោះលែងមនុស្ស ២១នាក់។
តំណាងអ្នកបឹងកក់ អ្នកស្រី ទេព វន្នី បានអំពាវនាវអោយគ្រប់ស្ថាប័នពាក់ព័ន្ធបញ្ឈប់ភ្ជាប់បញ្ហារបស់អ្នកទាំង ២១នាក់ ទៅជាបញ្ហានយោបាយ៖ «ចា៎! ព្រោះអាយុជីវិតរបស់មនុស្សយើងម្នាក់ៗ គឺមានតម្លៃណាស់។ អាយុយើងគឺស្នើៗគ្នា។ យើងមិនអាចដោយសារតែមហិច្ឆតារបស់យើងចង់បានអំណាចណាស់លោភលន់មិន ចេះស្កប់ស្កល់ ហើយទៅយកជីវិតអ្នកដទៃយកមកធ្វើឈ្នាន់ខ្លួនឯងទេ។ គាត់ត្រូវតែគិតពីអាយុរបស់គេផង»។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ អ្នកការពារសិទ្ធិដីធ្លីក្នុងតំបន់បឹងកក់ លោក ច័ន្ទ ពុទ្ធិសក្តិ សកម្មជនសិទ្ធិមនុស្ស និងកម្មករជាច្រើននាក់ទៀត ត្រូវបានសមត្ថកិច្ចចាប់ខ្លួននៅមុខរោងចក្រយ៉ាកជីន(Yak Jin) និងសួនឧស្សាហកម្មកាណាឌីយ៉ា ផ្លូវវ៉េងស្រេង កាលពីថ្ងៃទី២ និងទី៣ ខែមករា នៅពេលដែលកម្មករតវ៉ាទាមទារឲ្យដំឡើងប្រាក់ឈ្នួល ១៦០ដុល្លារ។ ពួកគេត្រូវសាលាដំបូង និងសាលាឧទ្ធរណ៍ បដិសេធការសុំនៅក្រៅឃុំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។