យុវជន ៨នាក់ ដែលមានអាយុចាប់ពី ១៦ រហូតដល់ ១៨ឆ្នាំ នៅស្រុកបាទី ខេត្តតាកែវ ត្រូវបានមន្ត្រីនគរបាលយុត្តិធម៌ចាប់ឃុំខ្លួនបណ្ដោះអាសន្ន ជាប់សង្ស័យពីបទថាបានបង្កហិង្សាដល់អ្នកធ្វើដំណើរ ក្នុងពិធីបុណ្យចូលឆ្នាំថ្មី និងកំពុងកសាងសំណុំរឿងបញ្ជូនទៅតុលាការបន្ត។
ក៏ប៉ុន្តែ ក្រុមគ្រួសារវិញ អះអាងថា ការចាប់ខ្លួននេះធ្វើឡើងដោយពុំមានមូលហេតុត្រឹមត្រូវ និងភស្តុតាងជាក់លាក់នោះទេ។
តំណាងក្រុមគ្រួសារយុវជនដែលត្រូវបានមន្ត្រីនគរបាលយុត្តិធម៌ស្រុកបាទី ចាប់ខ្លួន ឲ្យដឹងថា ពួកគេកំពុងស្វះស្វែងតាមផ្លូវច្បាប់ ដើម្បីជំរុញឲ្យមានការដោះលែងយុវជនទាំង ៨នាក់ ដែលកំពុងឃុំខ្លួនបណ្ដោះអាសន្ននោះ ឲ្យមានសេរីភាពឡើងវិញ។
លោក សេង វិចិត្ត ដែលអះអាងថាជាតំណាងឲ្យគ្រួសារ ៧នាក់ផ្សេងទៀត អះអាងនៅថ្ងៃទី២០ មេសា ថា យុវជនទាំង ៨នាក់ ដែលត្រូវបានអធិការស្រុកបាទី ចាប់ខ្លួន កាលពីថ្ងៃទី១៧ មេសា ត្រូវគេចោទប្រកាន់ពីបទបង្កហិង្សាដល់អ្នកដំណើរ ប៉ុន្តែតាមពិត ពួកគេពុំមានទោសកំហុសអ្វីដូចការចោទប្រកាន់នោះទេ។ លោកអំពាវនាវសុំឲ្យប្រមុខរដ្ឋាភិបាល និងស្ថាប័នពាក់ព័ន្ធជួយអន្តរាគមន៍ ដើម្បីឲ្យពួកគេមានសេរីភាពឡើងវិញ។
លោកបន្តថា ការចាប់ខ្លួននេះ គឺធ្វើឡើងស្ថិតក្រោមការសង្ស័យ និងពុំមានភស្តុតាងពិតប្រាកដនោះឡើយ។ ហេតុនេះ ពួកគេគួរត្រូវបានដោះលែងឲ្យមានសេរីភាពដូចដើមវិញ៖ «ចង់ទាមទារយុត្តិធម៌ដែលអយុត្តិធម៌ចំពោះក្មេងដែលមិនគួរគប្បីធ្វើបាបគ្នាអីចឹងអ្ហា។ ក្មេងកំពុងតែនៅរៀនអ្ហាបង។ អីចឹងសុំបងរកយុត្តិធម៌ឲ្យផង មេត្តាជួយឲ្យសម្ដេចហ្នឹងជួយអន្តរាគមន៍យុត្តិធម៌ឲ្យដោះលែងក្មេងហ្នឹងវិញផង»។
ក៏ប៉ុន្តែ បញ្ហានេះត្រូវបានអធិការស្រុកបាទី គឺលោក ឃុត ឡូ បញ្ជាក់ថា យុវជនទាំង ៨នាក់ ដែលកំពុងឃុំខ្លួនបណ្ដោះអាសន្ន និងបន្តនីតិវិធីកសាងសំណុំរឿង ដើម្បីបញ្ជូនទៅតុលាការនេះ ពិតជាបានប្រព្រឹត្តបទល្មើសដូចការចោទប្រកាន់យ៉ាងពិតប្រាកដ។ លោកបន្តថា ព្រោះក្នុងថ្ងៃចុងក្រោយនៃពិធីបុណ្យចូលឆ្នាំថ្មី យុវជនទាំង ៨នាក់នេះ បានអុកឡុកនៅតាមផ្លូវ រំខានដល់អ្នកធ្វើដំណើរក្នុងពិធីបុណ្យចូលឆ្នាំ និងបង្កហិង្សាថែមទៀត៖ «ជ្រែពេញភ្ញៀវកាត់មុខឡានភ្ញៀវ ក៏ភ្ញៀវហើយចុចកញ្ចក់ស្ដីឲ្យ ក៏ថាប្រយ័ត្នគ្រោះថ្នាក់ គ្រោះអីអីចឹងណាបង។ បាទ! ដល់ក្រោយមក ក៏ជ្រែចុះជ្រែឡើង ក៏ឈប់នៅសំរោងយោងទៅ វាមិនឈប់គប់ឡានភ្ញៀវនៅអើ ខាងត្បូងផ្សារសំរោងយោងទាំងអស់គ្នាហ្នឹងបាទ។ ឡានភ្ញៀវហ្នឹង ក៏អត់ហានឈប់ហ្នឹងដែរ។ ក្មេងៗវាគប់ច្រើនពេក ក៏មិនឈប់ផ្សារចំបក់។ ផ្សារចំបក់ ក៏ក្មេងៗហ្នឹងវាក៏មកតាមឡានហ្នឹងទៀត តាមឡានហ្នឹងក៏ក្រុមភ្ញៀវសហការជាមួយសមត្ថកិច្ចឃាត់ក្មេងៗទាំង៨ ទៅណាបង»។
យុវជនទាំង ៨នាក់ ដែលត្រូវមន្ត្រីនគរបាលយុត្តិធម៌ចាប់ខ្លួន កាលពីថ្ងៃទី១៧ មេសា នៅខាងមុខសាលាស្រុកបាទី មានឈ្មោះ លួក រ៉ា លួក រិទ្ធី សេង រ៉ា សេង វណ្ណា នួន រ៉ាត់ សេង ចូច ណង ប៊ុនថុន និងឈ្មោះ សយ សើ។
ទាក់ទិនករណីនេះ អ្នកសម្របសម្រួលសមាគមការពារសិទ្ធិមនុស្សអាដហុក (Adhoc) ប្រចាំខេត្តតាកែវ លោក អ៊ុន ថានន្ទ បដិសេធក្នុងការអត្ថាធិប្បាយ ដោយចាត់ទុកថា លោកនៅមិនទាន់ទទួលបានសំណុំរឿងនេះនៅឡើយទេ។
មេឃុំដូង ស្រុកបាទី លោក ណុប ទូច បដិសេធថា លោកពុំបានដឹងពីដំណើររឿងពាក់ព័ន្ធការប្រព្រឹត្តបទល្មើស និងការចាប់ខ្លួនយុវជនទាំង ៨នាក់នេះទេ។ ទោះជាបែបណា លោកបញ្ជាក់ថា មន្ត្រីអាជ្ញាធរកំពុងធ្វើលិខិតដើម្បីស្នើសុំឲ្យមានការដោះលែងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។