រដ្ឋមន្ត្រីក្រសួងការពារជាតិ លោក ទៀ បាញ់ បំពេញទស្សនកិច្ចទៅកាន់ប្រទេសវៀតណាមពីថ្ងៃទី១១ដល់ថ្ងៃទី១៣ខែធ្នូ។
សេចក្ដីប្រកាសព័ត៌មានរបស់ក្រសួងការពារជាតិចុះថ្ងៃទី១០ខែធ្នូឲ្យដឹងថាដំណើរទស្សនកិច្ចរបស់លោក ទៀ បាញ់ ទៅកាន់ប្រទេសវៀតណាមពេលនេះធ្វើឡើងតបតាមការអញ្ជើញរបស់រដ្ឋមន្រ្តីក្រសួងការពារជាតិប្រទេសវៀតណាម។
សេចក្ដីប្រកាសព័ត៌មានឲ្យដឹងបន្តថាក្នុងដំណើរទស្សនកិច្ចនេះ លោក ទៀ បាញ់ និងសមភាគីវៀតណាមគ្រោងនឹងជួបប្រជុំទ្វេភាគីនិងចុះហត្ថលេខាលើផែនការកិច្ចសហប្រតិបត្តិការឆ្នាំ២០១៦រវាងក្រសួងការពារជាតិនៃប្រទេសទំាងពីរ។
លោក ទៀ បាញ់ ក៏នឹងទៅទស្សនាបញ្ជាការដ្ឋានកងវរសេនាតូចរថពាសដែកលេខ៤៧របស់ វៀតណាម ក្នុងរដ្ឋធានីហាណូយ (Hanoi) ព្រមទាំងទៅសួរសុខទុក្ខសិក្ខាកាមកងយោធពល ខេមរភូមិន្ទ ដែលកំពុងសិក្សានៅក្នុងប្រទេសវៀតណាមផងដែរ។
ដំណើរទៅកាន់ប្រទេសវៀតណាមរបស់រដ្ឋមន្ត្រីការពារជាតិកម្ពុជានេះគឺនៅបន្ទាប់ពីមន្ត្រីជាន់ខ្ពស់រដ្ឋាភិបាលកម្ពុជា បានជួបជាបន្តបន្ទាប់ជាមួយមន្ត្រីរបស់វៀតណាមដូចជាជំនួបរវាងលោកនាយករដ្ឋមន្ត្រី ហ៊ុន សែន ជាមួយអនុរដ្ឋមន្ត្រីការពារជាតិវៀតណាមនិងជំនួបរវាងរដ្ឋមន្ត្រីការបរទេសកម្ពុជា លោក ហោ ណាំហុង និងរដ្ឋមន្ត្រីក្រសួងការបរទេសវៀតណាមកាលពីខែតុលាជំនួបរវាងរដ្ឋមន្ត្រីក្រសួងទំនាក់ទំនងរដ្ឋសភា-ព្រឹទ្ធសភានិងអធិការកិច្ច អ្នកស្រី ម៉ែន សំអន ជាមួយប្រធានគណចលនាមហាជនបក្សកុម្មុយនិស្តវៀតណាម កាលពីដើមខែវិច្ឆិកា។
កាលពីខែតុលា ព្រះមហាក្សត្រ សម្តេចព្រះបរមនាថ នរោត្តម សីហមុនី ព្រះអង្គក៏បានយាងបំពេញទស្សនកិច្ចទៅកាន់ប្រទេសវៀតណាមចំនួន៤ថ្ងៃផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។