ស្នងការនគរបាលខេត្តក្រចេះ បានចោទអ្នកយកព័ត៌មានមួយចំនួន ដែលប្រចាំការនៅមូលដ្ឋាននេះថា បានបង្កភាពអនាធិបតេយ្យ ប៉ះពាល់ដល់ការប្រកបរបរចិញ្ចឹមជីវិតរបស់ប្រជាពលរដ្ឋក្នុងមូលដ្ឋាន។
បញ្ហានេះ ប្រធានក្លឹបអ្នកកាសែតកម្ពុជា បានស្នើឲ្យអ្នកសារព័ត៌មានគ្រប់រូប ត្រូវបំពេញបេសកកម្មរបស់ខ្លួន ដោយគោរពតាមក្រមសីលធម៌ និងមានវិជ្ជាជីវៈឲ្យបានត្រឹមត្រូវ។
ស្នងការនគរបាលខេត្តក្រចេះ លោក ជួង ស៊ាងហាក់ មានប្រសាសន៍នៅថ្ងៃទី២៨ ខែមីនា ថា សព្វថ្ងៃនេះ លោកសង្កេតឃើញមានអ្នកកាសែតខ្លះបានបើករថយន្តដេញចាប់ឡានរបស់ប្រជាពលរដ្ឋ ដែលដឹកក្ដារ ឬជន្លង់ឈើទៅជួសជុលផ្ទះ ឬប្រើប្រាស់ផ្សេងដើម្បីទារប្រាក់។ លោកឲ្យដឹងថា ក្រុមអ្នកសារព័ត៌មានដែលបង្កភាពអនាធិបតេយ្យនៅខេត្តក្រចេះ នោះ គឺស្ថាប័នកាសែតពួកគេមានតែឈ្មោះ ប៉ុន្តែមិនឃើញចេញផ្សាយទេ។
ស្នងការនគរបាលរូបនេះ ស្នើឲ្យក្លឹប ឬសមាគមន៍កាសែត ពិសេសក្រសួងព័ត៌មាន ជួយពង្រឹងក្រមសីលធម៌ដល់អ្នកសារព័ត៌មានទាំងឡាយណាដែលមិនទាន់មានវិជ្ជាជីវៈ។ លោកបន្តថា បើទុកឲ្យភាពអនាធិបតេយ្យទាំងនេះបន្តកើតមាននាថ្ងៃអនាគត នឹងនាំឲ្យប៉ះពាល់ដល់សេចក្តីថ្លៃថ្នូររបស់ស្ថាប័នកាសែត ឬអ្នកកាសែតដទៃទៀតដែលមានវិជ្ជាជីវៈត្រឹមត្រូវ។
អ្នកយកព័ត៌មានឲ្យកាសែតកោះសន្តិភាព ប្រចាំខេត្តក្រចេះ លោក លី ណា បានឲ្យដឹងនៅថ្ងៃទី២៩ ខែមីនា ថា សព្វថ្ងៃនេះពិតជាមានក្រុមអ្នកសារព័ត៌មានមកពីច្រើនស្ថាប័ន ដើរធ្វើសកម្មភាពអនាធិបតេយ្យខុសវិជ្ជាជីវៈពិតមែន៖ «ដឹកកូនក្រឡឹង ឬសសរខ្លីៗដាក់តាមឡានពីក្រោយហ្នឹង អ្នកកាសែតហ្នឹងដេញចាប់ឲ្យបង់លុយ ឬកាច់យកសោឡានខុសពីវិជ្ជាជីវៈសារព័ត៌មានទាំងស្រុង។ អ្នកកាសែតទាំងនោះសុទ្ធតែអះអាងថា ជាចាងហ្វាងកាសែត ឬនិពន្ធនាយក និងអ្នកកាសែត ២៤ខេត្តក្រុងជាដើម។ ចាប់ពីក្នុងទឹកស្នួលទៅមិនតិចជាង ១០០អង្គភាពកាសែតទេ»។
លោកព្រួយបារម្ភថា ទង្វើ និងសកម្មភាពរបស់ក្រុមអ្នកសារព័ត៌មានគ្មានវិជ្ជាជីវៈទាំងនេះ អាចនាំឲ្យប៉ះពាល់ដល់អ្នកកាសែតអាជីព និងកេរ្តិ៍ឈ្មោះស្ថាប័នកាសែត បើស្ថាប័នពាក់ព័ន្ធ ឬក្រសួងព័ត៌មានមិនមានវិធានការ។
បញ្ហានេះ មន្ត្រីក្រសួងព័ត៌មានមិនទាន់មានប្រតិកម្មឆ្លើយតប ឬមានវិធានការយ៉ាងណានៅឡើយ ប៉ុន្តែសម្រាប់លោក ប៉ែន សមិទ្ធិ ប្រធានក្លឹបអ្នកកាសែតកម្ពុជា មានប្រសាសន៍ថា អ្នកកាសែតគ្រប់រូបត្រូវបំពេញការងារឲ្យស្របតាមវិជ្ជាជីវៈ និងក្រមសីលធម៌របស់ខ្លួនឲ្យបានត្រឹមត្រូវ៖ «ស្នើឲ្យអ្នកសារព័ត៌មានត្រូវតែរក្សាសេចក្តីថ្លៃថ្នូរក្នុងអាជីព ដោយជៀសវាងនូវការឆ្វៀលឆ្វាត់បើកឡានតាមគេ ដែលនាំឲ្យមានការជាប់ចោទថា យើងជាអ្នកតាមជំរិត ដើម្បីផលប្រយោជន៍។ ហើយយើងពិបាកនឹងមានប្រតិកម្ម ពីព្រោះការនិយាយហ្នឹងវាហួសពេក យើងមិនដឹងថាហេតុការណ៍ប្រាកដហ្នឹងវាយ៉ាងម៉េច។ ប៉ុន្តែបើសិនជាមានបាតុភាពដូចគាត់និយាយអ៊ីចឹងមែន យើងស្នើថា អ្នកយកព័ត៌មានហ្នឹងគួរតែប្រយ័ត្នប្រយែង ហើយប្រើប្រាស់មធ្យោបាយផ្សេងជាជាងការប្រើប្រាស់មធ្យោបាយជិះឡានដេញតាមគេ»។
យ៉ាងណាក៏ដោយ លោក ជួង ស៊ាងហាក់ ស្នងការនគរបាលខេត្តក្រចេះ បានស្នើឲ្យថ្នាក់ដឹកនាំអង្គភាពកាសែតនីមួយៗ ពិសេសក្រសួងព័ត៌មាន ជួយជំរុញឲ្យក្រុមអ្នកសារព័ត៌មាន មិនទាន់មានវិជ្ជាជីវៈ ដែលកំពុងប្រចាំការនៅខេត្តក្រចេះ ឲ្យបំពេញការងាររបស់ពួកគេមានវិជ្ជាជីវៈស្របតាមច្បាប់សារព័ត៌មាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។