លោកវរសេនីយ៍ឯក ខេង ទីតូ មន្ត្រីនាំពាក្យកងរាជអាវុធហត្ថលើផ្ទៃប្រទេស មានប្រសាសន៍នៅថ្ងៃសុក្រ ទី២៦ ខែមេសា ថា ប្រតិបត្តិការចាប់ខ្លួនជនសង្ស័យចាប់ជំរិតទារប្រាក់តាមប្រព័ន្ធអ៊ីនធឺណិត របស់មន្ត្រីជំនាញពេលនេះ មានជនជាតិចិនតៃវ៉ាន់ ចិនដីគោក និងជនជាតិខ្មែរ៖ «បង្ក្រាបបាន ៣៧នាក់ នៅក្នុងនោះមានខ្មែរ ៣នាក់ នៅពីរទីតាំង។ ទីតាំងទីមួយគឺនៅផ្ទះលេខ២៥ ផ្លូវលេខ១៣២ សង្កាត់ទឹកល្អក់១ ខណ្ឌទួលគោក។ ហើយទីតាំងទីពីរ នៅផ្ទះលេខ៩ ផ្លូវ២៧៥ សង្កាត់បឹងកក់១ ខណ្ឌទួលគោក ដែរ។ នៅអាទីតាំងទីមួយសង្កាត់ទឹកល្អក់១ហ្នឹង ចិនតៃវ៉ាន់ ១០នាក់ ចិនដីគោក ១នាក់ និងម្នាក់ទៀតជាអ្នកបើកបរជាជនជាតិខ្មែរ។ ហើយនៅទីតាំងទីពីរសង្កាត់បឹងកក់១ហ្នឹង គឺ ២៥នាក់ ចិនតៃវ៉ាន់ទាំងអស់ ហើយក្នុង ២៥នាក់ហ្នឹង ស្រី ៣នាក់»។
លោកវរសេនីយ៍ឯកបន្តថា ជនសង្ស័យជនជាតិចិន និងជនសង្ស័យជាជនជាតិខ្មែរ កំពុងត្រូវបានមន្ត្រីជំនាញអាវុធហត្ថ និងមន្ត្រីជំនាញពាក់ព័ន្ធ សាកសួរនៅស្នងការដ្ឋានកងរាជអាវុធហត្ថផ្ទៃប្រទេស មុននឹងបញ្ជូនទៅកាន់តុលាការ។
លោក ខេង ទីតូ បានឲ្យដឹងថា នេះជាយុទ្ធនាការបង្ក្រាបលើកទី២ របស់កងរាជអាវុធហត្ថលើផ្ទៃប្រទេសទៅលើជនសង្ស័យជនជាតិចិន គឺជាប់ពាក់ព័ន្ធសកម្មភាពចាប់ជំរិតទារប្រាក់តាមអ៊ីនធឺណិត។ លោកថា ការចាប់ខ្លួនជនជាតិចិន នៅខណ្ឌទួលគោក នាថ្ងៃទី២៦ ខែមេសា គឺជាករណីផ្សេងពីករណីដែលកងរាជអាវុធហត្ថបានឃាត់ខ្លួនជនជាតិចិន ចំនួន ២៦នាក់ នៅក្រុងសួង ខេត្តកំពង់ចាម កាលពីថ្ងៃទី២៤ ខែមេសា ប៉ុន្តែប្រភេទបទល្មើសដូចគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។