ការអះអាងនេះ ធ្វើឡើងក្រោយពីមានកិច្ចប្រជុំមួយរវាងកម្ពុជា និងប្រទេសរុស្ស៊ី ក្នុងន័យដើម្បីពង្រីកកិច្ចសហប្រតិបត្តិការលើកទី៧ លើវិស័យមួយចំនួនបន្ថែមទៀត រួមមាន សេដ្ឋកិច្ច ពាណិជ្ជកម្ម និងវិស័យទេសចរណ៍។ ក៏ប៉ុន្តែ មន្ត្រីគណបក្សប្រឆាំង សម រង្ស៊ី អះអាងថា បើទោះជាកម្ពុជា មានកំណើនភ្ញៀវទេសចរដ៏ច្រើនបែបនេះ តែផលដែលបានមកពីវិស័យនេះ នឹងពុំបានដល់ដៃពលរដ្ឋច្រើននោះឡើយ។
មន្ត្រីក្រសួងការបរទេស និយាយថា កម្ពុជា និងប្រទេសរុស្ស៊ី សន្យានឹងជំរុញល្បឿននៃចរន្តសេដ្ឋកិច្ច ពាណិជ្ជកម្ម និងវិស័យទេសចរណ៍របស់ប្រទេសទាំងពីរ ឲ្យមានភាពសកម្មជាងមុននៅគ្រាដែលចំណងការទូតលើវិស័យនយោបាយនៃប្រទេសទាំងពីរ ហាក់ត្រូវមើលឃើញថាមានភាពរឹងមាំ និងស៊ីជម្រៅហើយនោះ។
មន្ត្រីនិយាយថា ការបន្តប្ដេជ្ញាលើគោលនយោបាយនៃចំណងការទូតជាថ្មីម្ដងទៀតរបស់ប្រទេសទាំងពីរនេះ ធ្វើឡើងក្នុងសម័យប្រជុំលើកទី៧របស់គណៈកម្មការអន្តរជាតិនៃកម្ពុជា-រុស្ស៊ី សម្រាប់កិច្ចសហប្រតិបត្តិការលើវិស័យពាណិជ្ជកម្ម សេដ្ឋកិច្ច និងទេសចរណ៍ ក្នុងទីក្រុងភ្នំពេញ។
កិច្ចប្រជុំដែលប្រើរយៈពេល២ថ្ងៃ ចាប់ពីថ្ងៃទី១ ដល់ថ្ងៃទី២ មេសា សម្រាប់កម្ពុជា សហប្រធាននៃកិច្ចប្រជុំដឹកនាំដោយអ្នកស្រី ស៊ុន សាភឿន រដ្ឋលេខាធិការក្រសួងការបរទេស។ ចំណែកប្រទេសរុស្ស៊ី សហប្រធាននៃកិច្ចប្រជុំមានលោក អេឡិចសានដឺរ វីរាដកូវ (Alexander V.Radkov) ជាប្រធានទីភ្នាក់ងារសហព័ន្ធទេសចរណ៍ និងជាសហប្រធាននៃគណៈកម្មការអន្តររដ្ឋាភិបាលកម្ពុជា-រុស្ស៊ី។
លោក កុយ គួង អ្នកនាំពាក្យក្រសួងការបរទេស មានប្រសាសន៍នៅថ្ងៃទី២ មេសា ក្រោយពីកិច្ចប្រជុំនោះថា នេះជាជំហានថ្មីមួយទៀតសម្រាប់កម្ពុជា និងរុស្ស៊ី ដែលភាគីទាំងពីរបានឯកភាពលើពិធីសារមួយចំនួន រួមមានការសន្យាបង្កើនចង្វាក់ពាណិជ្ជកម្មលើវិស័យសេដ្ឋកិច្ច និងវិស័យទេសចរណ៍ជាដើម។ លោកបន្តថា អ្វីដែលភាគីទាំងពីរជ្រើសរើសយកខ្លឹមសារនៃកិច្ចប្រជុំទាំងនេះមកពិភាក្សា ព្រោះកម្ពុជា និងរុស្ស៊ី អនុវត្តបានតិចតួចនៅឡើយក្នុងការជំរុញឲ្យមានកំណើនសេដ្ឋកិច្ចសម្រាប់ប្រទេសទាំងពីរ៖ «កិច្ចប្រតិបត្តិការផ្នែកពាណិជ្ជកម្ម ផ្នែកសេដ្ឋកិច្ច ផ្នែកវិនិយោគហ្នឹង ឲ្យដើរទន្ទឹមទៅនឹងកិច្ចប្រតិបត្តិការផ្នែកនយោបាយ ពីព្រោះកន្លងមក កិច្ចប្រតិបត្តិការទំនាក់ទំនងនយោបាយ និងការទូត មានលក្ខណៈ ប៉ុន្តែទំហំពាណិជ្ជកម្មនៃប្រទេសទាំងពីរមានលក្ខណៈខ្សត់ខ្សោយនៅឡើយទេ មិនបានធំធេងនៅឡើយទេ»។
លោក កុយ គួង បញ្ជាក់ទៀតថា ដោយសារគោលនយោបាយមានស្ថិរភាព ធ្វើឲ្យកម្ពុជា អាចស្រូបចំនួនភ្ញៀវទេសចរកើនឡើងជាង ៣លាននាក់ក្នុងឆ្នាំ២០១២។ តាមរយៈការបន្តកើនឡើងនៃចំនួនភ្ញៀវទេសចរនេះ ប្រទេសកម្ពុជា អាចនឹងទាក់ទាញភ្ញៀវទេសចរបានប្រមាណ ៧លាននាក់ថែមទៀត ក្នុងឆ្នាំ២០១៥ ខាងមុខ។
ក៏ប៉ុន្តែ លោក សុន ឆ័យ អ្នកតំណាងរាស្ត្រគណបក្ស សម រង្ស៊ី អះអាងថា បើទោះជាកំណើនភ្ញៀវទេសចរកើនឡើងយ៉ាងក៏ដោយ ប៉ុន្តែចំណូលនេះនឹងពុំបានដល់ដៃប្រជាពលរដ្ឋច្រើននោះឡើយ។ លោកបន្តថា ក្នុងមួយឆ្នាំៗ ចំណូលដែលបានមកពីវិស័យទេសចរណ៍នេះត្រូវបាត់បង់ដោយអំពើពុករលួយប្រមាណ ២០០លានដុល្លារ៖ «មកទល់សព្វថ្ងៃ ប្រទេសជាតិយើងបានផលតិចតួចណាស់ ជាពិសេសពលរដ្ឋមូលដ្ឋាននៅក្នុងតំបន់ទេសចរណ៍ ក៏បានផលពីវិស័យទេសចរណ៍តិចតួចខ្លាំងណាស់ មិនសមល្មមជាម្ចាស់ទឹកម្ចាស់ដីដែលមានកន្លែងទាក់ទាញមកក្នុងប្រទេសយើងដ៏ច្រើនយ៉ាងនេះទេ»។
វិទ្យុអាស៊ីសេរី ពុំអាចទាក់ទងមន្ត្រីក្រសួងទេសចរណ៍ បានទេនៅថ្ងៃទី២ មេសា ទាក់ទិនបញ្ហានេះ។
ប្រធានសមាគមទីភ្នាក់ងារទេសចរណ៍កម្ពុជា លោក អាង គឹមអៀន និយាយថា ក្នុងឆ្នាំ២០១២ កន្លងទៅ កម្ពុជា ទទួលបានភ្ញៀវទេសចរពីប្រទេសរុស្ស៊ី ប្រហែល ១សែននាក់ ក្នុងចំណោមភ្ញៀវទេសចរសរុបដែលមកទស្សនាប្រទេសកម្ពុជា។
ចំណែករបាយការណ៍របស់ក្រសួងទេសចរណ៍ ឲ្យដឹងថា អ្នកទទួលផលដោយផ្ទាល់ពីវិស័យទេសចរណ៍គិតត្រឹមឆ្នាំ២០១២ ប្រមាណ ៤០ម៉ឺននាក់ ក្នុងចំណោមពលរដ្ឋជាង ១៤លាននាក់។ តាមរយៈតួលេខនេះ ក្រសួងរំពឹងថាក្នុងឆ្នាំ២០២០ អ្នកទទួលផលពីវិស័យទេសចរណ៍ដោយផ្ទាល់ អាចនឹងមានកំណើនរហូតដល់ ៨០ម៉ឺននាក់នៃប្រជាពលរដ្ឋទូទាំងប្រទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។