ស្របពេលនៅតាមខ្សែបន្ទាត់ព្រំដែនកម្ពុជា-ថៃ នៅតែបន្តមានភាពរកាំរកូសនៅឡើយនោះ។ ដោយឡែកគណៈកម្មាធិការព្រំដែនទូទៅ (GBC) របស់ប្រទេសទាំងពីរ បានសន្យាថា ខ្លួននឹងរឹតចំណងមិត្តភាពល្អក្នុងនាមប្រទេសជិតខាងបន្ថែមទៀត។
ក៏ប៉ុន្តែ គណបក្សប្រឆាំងចំអកថា ការអនុវត្តជាក់ស្ដែងគេសង្កេតឃើញថា មានភាពផ្ទុយពីកិច្ចប្រជុំ ឬការសន្យាជាដរាប។
គណៈកម្មាធិការព្រំដែនទូទៅកម្ពុជា-ថៃ ចាត់ទុកកិច្ចសហប្រតិបត្តិការ និងពង្រឹងផ្នែកសន្តិសុខនៅតាមខ្សែបន្ទាត់ព្រំដែនរវាងប្រទេសទាំងពីរ ថាគឺជាកិច្ចការចាំបាច់ក្នុងការទទួលខុសត្រូវដែលគ្រប់ភាគីពាក់ព័ន្ធត្រូវអនុវត្តប្រកបដោយប្រសិទ្ធភាព។
សេចក្ដីប្រកាសព័ត៌មានរួមរបស់គណៈកម្មាធិការព្រំដែនទូទៅ ចុះថ្ងៃទី១៧ ឧសភា ឲ្យដឹងថា កិច្ចប្រជុំលើកទី៩ នៅស្រុករ៉ាយ៉ង (Rayong) ប្រទេសថៃ ដោយមានការចូលរួមពីខាងភាគីកម្ពុជា ដឹកនាំដោយលោក ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ។ ចំណែកខាងភាគីថៃ ដឹកនាំដោយលោក សុខុមពល សុវណ្ណាថាត (Sukampol Suwannathat) រដ្ឋមន្ត្រីក្រសួងការពារប្រទេសរបស់ថៃ។
សេចក្តីប្រកាសព័ត៌មាន បានឲ្យដឹងទៀតថា នៅក្នុងកិច្ចប្រជុំដែលមានរយៈពេល ៣ថ្ងៃ ចាប់ពីថ្ងៃទី១៥ ដល់ថ្ងៃទី១៧ ឧសភា សហប្រធាននៃកិច្ចប្រជុំរបស់ប្រទេសទាំងពីរ បានសម្រេចគោលការណ៍ចំនួន ៤ចំណុច។ កត្តាទី១ ភាគីទាំងពីរសន្យាថាទប់ស្កាត់ និងបង្ក្រាបរាល់សកម្មភាពនានា ជាអាទិ៍ រត់ពន្ធគ្រឿងញៀន កាប់ឈើខុសច្បាប់ ការកាប់បំផ្លាញព្រៃឈើ និងសកម្មភាពឆ្លងដែនខុសច្បាប់ដទៃទៀត។ គោលការណ៍ទី២ កម្ពុជា-ថៃ នឹងកសាងជំនឿទុកចិត្ត និងគោរពគ្នាទៅវិញទៅមក ពាក់ព័ន្ធនឹងការផ្សព្វផ្សាយព័ត៌មាន។ ទី៣ ភាគីទាំងពីរនឹងឯកភាពឲ្យមានសហប្រតិបត្តិការលើវិស័យជីវភាពរស់នៅ ទេសចរណ៍ សិក្សាធិការអប់រំ និងសុខភាពសាធារណៈ នៅតាមព្រំដែន និងទី៤ បង្ហាញសុឆន្ទៈចំពោះលទ្ធផលល្អនៃកិច្ចប្រជុំទាំង ៣លើកកន្លងទៅ ជាពិសេសកិច្ចពិគ្រោះយោបល់ផែនការដោះមីនរួមរវាងមជ្ឈមណ្ឌលសកម្មភាពកំចាត់មីនថៃ និងកម្ពុជា។
លោក យឹម សុវណ្ណ មន្ត្រីនាំពាក្យគណបក្សសង្គ្រោះជាតិ យល់ឃើញថា កិច្ចប្រជុំទាំងនេះហាក់មិនបានជួយធ្វើឲ្យកម្ពុជា ទទួលបានផលចំណេញណាមួយម្ដងសោះឡើយ។ លោកបន្តថា ព្រោះភាគីថៃ ពុំដែលអនុវត្តរាល់ខ្លឹមសារនៃកិច្ចប្រជុំម្ដងនោះទេ។ លោកឲ្យដឹងទៀតថា ក្នុងពេលបច្ចុប្បន្ន ពលរដ្ឋកម្ពុជា តែងត្រូវយោធាព្រំដែនរបស់ថៃ បាញ់សម្លាប់ជាបន្តបន្ទាប់៖ «ដោយគ្នាគ្មានការងារធ្វើនៅក្នុងប្រទេស រងគ្រោះដោយសារបាត់បង់ដីធ្លី ទៅរកការងារធ្វើ គឺត្រូវគេបាញ់សម្លាប់ជាបន្តបន្ទាប់។ ហើយរដ្ឋាភិបាលហាក់បីដូចជាពុំមានវិធានការណាមួយឲ្យមានប្រសិទ្ធភាព ដើម្បីទប់ស្កាត់ទេ។ រាល់ការប្រជុំលទ្ធផលចេញមកល្អណាស់ ប៉ុន្តែស្ទើរតែរៀងរាល់ខែ ត្រូវប្រជាពលរដ្ឋខ្មែរត្រូវគេបាញ់សម្លាប់»។
លោក កែម ឡី អ្នកស្រាវជ្រាវសង្គម និងជាអ្នកវិភាគឯករាជ្យ ចាត់ទុកថា កិច្ចសន្ទនាដែលធ្វើឡើងនេះ គឺជាផ្នែកមួយដ៏សំខាន់។ ក៏ប៉ុន្តែ ថាដើម្បីជំរុញឲ្យយន្តការនេះមានប្រសិទ្ធភាព គ្រប់ដៃគូសន្ទនា គួរបង្កើនឆន្ទៈក្នុងការទទួលខុសត្រូវបន្ថែមទៀត ជាជាងការសន្យា ហើយពុំបានអនុវត្ត៖ «ភាគច្រើនយើងមានកិច្ចប្រជុំ ហើយយើងមានសេចក្ដីថ្លែងការណ៍រួម។ ក៏ប៉ុន្តែ នៅខ្វះចន្លោះច្រើន ទាក់ទងទៅនឹងយន្តការជំរុញឲ្យមានការអនុវត្តក្របខ័ណ្ឌតាមដាន និងត្រួតពិនិត្យលើការអនុវត្តទៅវិញ»។
អង្គការសង្គមស៊ីវិល នៅតែចាត់ទុកថា បញ្ហាប្រឈមនានានៅតាមខ្សែបន្ទាត់ព្រំដែនកម្ពុជា-ថៃ ដូចជាការបាញ់សម្លាប់ពលរដ្ឋខ្មែរឆ្លងដែនខុសច្បាប់ និងការរំកិលព្រំដែនមកក្នុងទឹកដីកម្ពុជា នៅតែជាបញ្ហាប្រឈមខ្ពស់នៅឡើយរវាងប្រទេសទាំងពីរ ដែលមានព្រំដែនជាប់គ្នានេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។