ប្រមុខរដ្ឋាភិបាលកម្ពុជា លោក ហ៊ុន សែន បានដឹកនាំគណៈប្រតិភូជាន់ខ្ពស់វិលត្រឡប់មកប្រទេសកម្ពុជា វិញហើយនៅថ្ងៃទី១០ ខែមេសា ក្រោយពីបានទៅបំពេញទស្សនកិច្ចរយៈពេល ៥ថ្ងៃ នៅប្រទេសចិន ចាប់ពីថ្ងៃទី៦ ដល់ថ្ងៃទី១០ ខែមេសា។
ក្នុងដំណើរទស្សនកិច្ចនោះ ប្រទេសចិន បានផ្តល់ជំនួយ និងផ្តល់ប្រាក់កម្ចីមកដល់កម្ពុជា ជាច្រើនលានដុល្លារលើគម្រោងអភិវឌ្ឍន៍នានា។
ប្រធានាធិបតីចិន លោក ស៊ី ជិនភីង (Xi Jinping) និងនាយករដ្ឋមន្ត្រីចិន លោក លី ខីឈាង (Li Kequiang) បានយល់ព្រមផ្តល់ជំនួយឥតសំណងជូនរដ្ឋាភិបាលលោក ហ៊ុន សែន ចំនួនជាង ៣០០លានយន់ ស្មើនឹងជិត ៥០លានដុល្លារអាមេរិក។ បន្ថែមលើនេះទៀត មេដឹកនាំចិន បានយល់ព្រមផ្តល់កម្ចីឥណទានសម្បទានចំនួន ៥០០លានដុល្លារអាមេរិក ទៀត ដើម្បីឲ្យកម្ពុជា ចំណាយលើគម្រោងសាងសង់ផ្លូវលំក្រាលកៅស៊ូចំនួន ៤០០គីឡូម៉ែត្រ ក្នុងមួយឆ្នាំៗ។
កម្ចីឥណទានសម្បទាននោះ គឺរដ្ឋាភិបាលកម្ពុជា គ្រោងយកមកចំណាយលើគម្រោងសាងសង់ហេដ្ឋារចនាសម្ព័ន្ធដទៃទៀត ដូចជា ប្រព័ន្ធធារាសាស្ត្រជាដើម។ ប្រាក់ជំនួយឥតសំណង និងប្រាក់កម្ចីឥណទានសម្បទាននោះ ត្រូវបានចុះហត្ថលេខារួចហើយនៅទីក្រុងប៉េកាំង ប្រទេសចិន។
ក្រៅពីនេះ ឯកសារអនុសារណៈចំនួន ៨ទៀត ក៏ត្រូវបានចុះហត្ថលេខាដែរ ក្នុងនោះមានគម្រោងសាងសង់រោងចក្រចម្រាញ់ប្រេងដ៏ធំមួយនៅចន្លោះខេត្តកំពត និងខេត្តព្រះសីហនុ ដែលមានតម្លៃជាង ១.៦០០លានដុល្លារអាមេរិក ដោយមានសមត្ថភាពចម្រាញ់ប្រេងចំនួន ៥លានតោនក្នុងមួយឆ្នាំ។
រដ្ឋមន្ត្រីក្រសួងពាណិជ្ជកម្ម លោក ចម ប្រសិទ្ធិ បានមានប្រសាសន៍នៅក្នុងសន្និសីទកាសែត នៅថ្ងៃទី១០ ខែមេសា ថា ទំនាក់ទំនងរវាងកម្ពុជា និងចិន បានឈានដល់កម្រិតកំពូលនាពេលចុងក្រោយនេះ៖ «ក្រៅពីនេះ ក៏មានចុះហត្ថលេខាលើឯកសារពីរដែលទាក់ទងនឹងការកសាងស្ពានមួយទៀតឆ្លងទន្លេបាសាក់ គឺនៅកន្លែងកោះធំ ខេត្តកណ្ដាល ថ្ងៃមុន។ យើងឃើញហើយថា សម្ដេចតេជោ លោកក៏បានបើកការដ្ឋានសាងសង់ស្ពានមួយឆ្លងទន្លេបាសាក់ ដែរ។ ឥឡូវថែមមួយទៀត គឺនៅកោះធំ ក្រៅពីនេះ យើងនឹងកសាងសាកលវិទ្យាល័យមួយនៅខេត្តក្រចេះ ទៀត»។
ប្រធានក្រុមតំណាងរាស្ត្រគណបក្ស សម រង្ស៊ី លោក សុន ឆ័យ បានមានប្រសាសន៍ថា បើសិនណាគណបក្ស សម រង្ស៊ី ឬគណបក្សសង្គ្រោះជាតិ ឈ្នះឆ្នោតក្នុងការបោះឆ្នោតសកល នៅថ្ងៃទី២៨ ខែកក្កដា ខាងមុខនេះ កិច្ចសន្យានានាដែលគ្មានតម្លាភាព និងខុសច្បាប់ជាមួយចិន នឹងត្រូវលុបចោល៖ «ការខ្ចីលុយបរទេសមកសាងសង់សមិទ្ធផលដែលគ្មានគុណភាព ដែលមានតម្លៃខ្ពស់ ហើយពាក់ព័ន្ធនឹងអំពើពុករលួយដោយប្រការណាមួយ រដ្ឋាភិបាលត្រូវតែទទួលខុសត្រូវ ក្នុងនោះប្រទេសដែលឲ្យប្រាក់ខ្ចី ក៏ត្រូវមានការទទួលខុសត្រូវរួមគ្នាផងដែរ»។
នៅក្នុងដំណើរទស្សនកិច្ចរយៈពេល ៥ថ្ងៃនោះដែរ លោកនាយករដ្ឋមន្ត្រី ហ៊ុន សែន និងមេដឹកនាំចិន បានចុះហត្ថលេខាបង្កើតគណៈកម្មការអន្តររដ្ឋាភិបាលមួយ រវាងកម្ពុជា និងចិន ដើម្បីត្រួតពិនិត្យលើការអនុវត្តក្នុងភាពជាប្រទេសដៃគូយុទ្ធសាស្ត្រស៊ីជម្រៅគ្រប់ជ្រុងជ្រោយ និងសកម្មភាពដៃគូយុទ្ធសាស្ត្រគ្រប់ជ្រុងជ្រោយដែរ។
លោកនាយករដ្ឋមន្ត្រី ហ៊ុន សែន ធ្លាប់បានចុះហត្ថលេខាជាមួយមេដឹកនាំចិន រួចម្តងហើយកាលពីឆ្នាំ២០១០ កន្លងទៅ ដើម្បីបង្កើនឋានៈទំនាក់ទំនងរវាងកម្ពុជា និងចិន នោះ ពីប្រទេសជិតខាងល្អ មកជាប្រទេសមិត្តល្អ និងពីប្រទេសដៃគូល្អ មកជាប្រទេសដៃគូយុទ្ធសាស្ត្រស៊ីជម្រៅគ្រប់ជ្រុងជ្រោយ និងសកម្មភាពដៃគូយុទ្ធសាស្ត្រគ្រប់ជ្រុងជ្រោយនៅឆ្នាំ២០១៣ នេះ។
ប្រភពពីរដ្ឋមន្ត្រីក្រសួងពាណិជ្ជកម្ម លោក ចម ប្រសិទ្ធិ បានអះអាងថា ក្នុងរយៈពេល ១០ឆ្នាំកន្លងមកនេះ ចិន បានផ្តល់ជំនួយនានាឲ្យកម្ពុជា សាងសង់ផ្លូវប្រវែងជាង ២ពាន់គីឡូម៉ែត្រ និងសាងសង់ស្ពានធំៗចំនួន៧ ទៀតនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។