ចៅក្រមតុលាការខេត្តក្រចេះ បានសម្រេចចោទប្រកាន់ និងឃុំជនសង្ស័យ ៣នាក់ ដែលបានបាញ់សម្លាប់ លោក តាំង ទ្រី ជាអ្នកកាសែត និងសមាជិករបស់សមាគមសារព័ត៌មានខ្មែរអ្នកប្រជាធិបតេយ្យប្រចាំការនៅខេត្តក្រចេះ។ លោក តាំង ទ្រី ត្រូវឃាតកបាញ់សម្លាប់កាលពីយប់ថ្ងៃទី១១ ឈានចូលថ្ងៃទី១២ តុលា ក្នុងពេលលោកចុះទៅស្រាវជ្រាវតាមដានបទល្មើសព្រៃឈើ។
ចៅក្រមតុលាការខេត្តក្រចេះ នៅថ្ងៃទី១៥ តុលា បានចោទប្រកាន់ជនសង្ស័យទាំង ៣នាក់ ដែលបានបាញ់សម្លាប់អ្នកកាសែត ដោយកំណត់បទចោទប្រកាន់ផ្សេងៗគ្នា។
ក្នុងនោះមានឈ្មោះ ឡា ណារ៉ុន ជាអតីតទាហាន និងជាអ្នកបាញ់ ត្រូវចៅក្រមចោទប្រកាន់នោះពីបទឃាតកម្ម ឈ្មោះ ខិម ភក្ដី ជាប៉េអិម និងជាម្ចាស់កាំភ្លើង ត្រូវចៅក្រមចោទប្រកាន់ពីបទធ្វេសប្រហែស និងផ្សំគំនិតអំពើឃាតកម្ម និងឈ្មោះ ពិន ហ៊ាង ជាប៉ូលិស និងជាម្ចាស់រថយន្តដែលពួកគេជិះទៅបាញ់សម្លាប់ លោក តាំង ទ្រី ត្រូវចៅក្រមចោទប្រកាន់ពីបទប្រើប្រាស់អាវុធខុសច្បាប់ និងមិនប្ដឹងរាយការណ៍បទល្មើស និងបទល្មើសមជ្ឈិមដល់មន្ត្រីរាជការសាធារណៈ។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ប្រចាំខេត្តក្រចេះ កញ្ញា ហុង ជាវគុណ មានប្រសាសន៍ថា តាមព័ត៌មានដែលកញ្ញាប្រមូលបាន ការបាញ់សម្លាប់នេះដោយសារក្រុមអ្នកកាសែតនៅខេត្តក្រចេះ នាំគ្នាទៅស្រាវជ្រាវប្រមូលព័ត៌មានទាក់ទងការដឹកជញ្ជូនឈើខុសច្បាប់ពីខេត្តមណ្ឌលគិរី ទៅខេត្តកំពង់ចាម កាត់តាមខេត្តក្រចេះ៖ «ក្នុងចំណោមនោះ អ្នកដែលបាញ់ឈ្មោះ ឡា ណារ៉ុន ហៅ រស់ គាត់គឺជាអ្នកបាញ់។ តាមការស៊ើបអង្កេតរបស់ខ្ញុំ គឺដំបូងជនរងគ្រោះទាក់ទងការទៅឃ្លាំមើលការរកស៊ីឈើ។ បន្ទាប់មក ឡានគាត់ជាប់ផុង ជនរងគ្រោះចុះមើលឡានគាត់។ ក្រោយមកមានឡានឡិចស៊ិស (Luxsus) បើកមកដល់ បើកម្តងហើយ។ ជនរងគ្រោះ តាំង ទ្រី នោះ គាត់បានទៅនិយាយគ្នាជាមួយអ្នកបើកឡាននោះពីរបីម៉ាត់ ហើយឡាននោះក៏បើកទៅ។ បន្ទាប់មកគាត់ឲ្យអ្នកជិះឡានជាមួយគាត់ទៅរកអ្នកភូមិមកជួយអូសឡាន។ នៅក្នុងចំណុចនេះ បានន័យថា ក្នុងពេលឡានឡិចស៊ិសនេះមក ជិះមកហើយ និយាយគ្នាមួយម៉ាត់ពីរ ឡាននោះទៅវិញ ហើយមកវិញបាញ់តែម្តងទៅ»។
ប្រភពព័ត៌មានពីអ្នកកាសែត មន្ត្រីអង្គការមិនមែនរដ្ឋាភិបាល និងប៉ូលិស បានឲ្យដឹងថា កាលពីថ្ងៃទី១១ តុលា ក្រុមអ្នកកាសែតនៅខេត្តក្រចេះ មានគ្នាចំនួន ៨នាក់ ជិះរថយន្ត ៣គ្រឿង និងម៉ូតូមួយគ្រឿងចុះទៅប្រមូលព័ត៌មានទាក់ទងការដឹកជញ្ជូនឈើខុសច្បាប់ពីខេត្តមណ្ឌលគិរី មកដល់ស្រុកស្នួល ខេត្តក្រចេះ ត្រង់ចំណុចភូមិទួលពន្លៃ ឃុំឃ្សឹម។ ក្រោយពីប្រមូលព័ត៌មាន និងថតរូបក្បួនដឹកឈើខុសច្បាប់ចំនួន ២៣រទេះបានហើយ ក្រុមអ្នកកាសែតបានវិលត្រឡប់មកវិញទាំងយប់។ នៅពេលធ្វើដំណើរមកផ្ទះវិញ រថយន្តរបស់ លោក តាំង ទ្រី ជិះជាមួយ លោក សាវ ពិសិដ្ឋ អ្នកយកព័ត៌មានឲ្យកាសែតឃ្លាំមើលកម្ពុជា បើកមកក្រោយគេ ហើយធ្លាក់ជង្ហុកជាប់ភក់ មិនអាចធ្វើដំណើរទៅផ្ទះបាន។ ក្រោយមកមានរថយន្តឡិចស៊ីស៤៧០ មួយគ្រឿង បានបើកមកតាមទាន់រថយន្ត លោក តាំង ទ្រី ហើយក៏មានការជជែកគ្នា និងបាញ់សម្លាប់ លោក តាំង ទ្រី ចំកណ្ដាលថ្ងាសទៅ។ ប៉ុន្តែក្រោយពេលបាញ់សម្លាប់ លោក តាំង ទ្រី ហើយ រថយន្តឡិចស៊ីស៤៧០ នោះ បើកបានប្រហែល ៥០០ម៉ែត្រពីកន្លែងកើតហេតុ ក៏ក្រឡាប់បះជើងឡើងលើមិនអាចបើករត់ទៅមុខទៀតបាន។ ក្រោយមក អាជ្ញាធរក៏ចាប់បានជនល្មើសជាបន្តបន្ទាប់សរុបចំនួន ៣នាក់។
លោក សាវ ពិសិដ្ឋ អ្នកយកព័ត៌មានឲ្យកាសែតឃ្លាំមើលកម្ពុជា ដែលជិះរថយន្តជាមួយ លោក តាំង ទ្រី មុនពេលបាញ់សម្លាប់ បានឲ្យដឹងថា លោកបានជិះជាមួយ លោក តាំង ទ្រី មែន តែក្រោយពេលឡានជាប់ផុង លោកបានចាកចេញទៅរកអ្នកភូមិមកជួយរុញឡាន តែរកមិនបាន។ ក្រោយមកបានលោកដឹងថា លោក តាំង ទ្រី ត្រូវគេបាញ់សម្លាប់ទៅហើយ៖ «គេតាមធ្វើបាប ព្រោះបើតាមនិយាយទៅ គាត់មិនមែនធ្វើតែមួយកន្លែងទេ ការងារគាត់សកម្មក្នុងការពារបទល្មើសព្រៃឈើនោះច្រើនណាស់។ យ៉ាងនេះយើងមិនដឹងថាម៉េចទេ អានេះការគុំកួនរបស់បទល្មើស និងមន្ត្រីទាំងឡាយដែលគេទទួលផល ក៏គេមិនពេញចិត្តជាមួយ លោក តាំង ទ្រី ដែរណា»។
ការចាប់ខ្លួនឃាតកបាញ់អ្នកកាសែតនេះ គឺជាលើកទី១ហើយ បើគិតតាំងពីឆ្នាំ១៩៩៣ មក។ តាំងពីឆ្នាំ១៩៩៣ មកមានអ្នកកាសែតប្រហែល ១៤នាក់ហើយដែលត្រូវគេសម្លាប់ ប៉ុន្តែមិនដែលចាប់បានឃាតកទេ។
ក្រមព្រហ្មទណ្ឌប្រទេសកម្ពុជា បានចែងថា បទឃាតកម្មអាចជាប់ពន្ធនាគារពី ១០ ទៅ ១៥ឆ្នាំ ឬអាចជាប់ពន្ធនាគារអស់មួយជីវិត បើសិនជាការធ្វើឃាតនោះមានគម្រោងទុកជាមុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។