វិស័យសំណង់នៅកម្ពុជា ត្រូវបានក្រុមអ្នកវាយតម្លៃអចលនទ្រព្យ កំពុងចាប់អារម្មណ៍ថា មានការរីកចម្រើនកាន់តែខ្លាំងនៅគ្រាដែលសេដ្ឋកិច្ចកម្ពុជា កំពុងមានការកើនឡើង។
ទន្ទឹមនឹងការរីកដុះដាលផ្ទះល្វែង អគារខ្ពស់ៗ និងខុនដូ នៅកម្ពុជានោះ វិស្វករខ្មែរនឹងមានឱកាសកាន់តែច្រើន ដើម្បីចាប់យកការងារទាំងនេះ។ ប៉ុន្តែអ្វីដែលនៅតែជាបញ្ហានោះ តើវិស្វករកម្ពុជា មានកម្រិតសមត្ថភាពគ្រប់គ្រាន់សម្រាប់បំពេញការងារទាំងនេះ ដើម្បីកាត់បន្ថយលំហូរនៃកម្លាំងពលកម្មបរទេសដែរឬទេ?
វិស្វករ និងកម្មករកម្ពុជា មួយចំនួន កំពុងតែមានការងារធ្វើដោយសារសកម្មភាពសាងសង់ផ្ទះល្វែងនៅក្នុងបុរី អគារខ្ពស់ៗ និងខុនដូ មានការកើនឡើងពី ២០ ទៅ ៣០% នៅដើមឆ្នាំ២០១៣ ខុសប្លែកជាងឆ្នាំ២០១០ និងឆ្នាំ២០១១ កន្លងទៅ។
អនុប្រធានការដ្ឋាននៃបុរីពិភពថ្មីចម្ការដូង ជាអតីតនិស្សិតផ្នែកវិស្វករសំណង់ស៊ីវិល លោក សួស វុទ្ធី បានថ្លែងថា ផ្ទះនៅបុរីនេះកំពុងលក់ដាច់សង់ស្ទើរមិនទាន់តាមតម្រូវការរបស់អតិថិជន ដោយសារតែសេដ្ឋកិច្ចមានដំណើរការល្អ។
លោកថា នេះជាមូលហេតុដែលជំរុញឲ្យអ្នកធ្វើការក្នុងវិស័យសំណង់គ្រប់ប្រភេទ និងវិស្វករកាន់តែមានទឹកចិត្តកាន់តែខ្លាំង ដើម្បីពង្រឹងសមត្ថភាពការងាររបស់ខ្លួនដើម្បីប្រកួតប្រជែងក្នុងអាជីពនេះ៖ «ពង្រឹងខ្លួនឯងឲ្យកាន់តែខ្លាំង ដើម្បីឈានទៅរកទីផ្សារប្រកួតប្រជែងជាមួយប្រទេសជិតខាងហ្នឹងតែម្ដង។ យើងសង្កេតឃើញថា ប្រទេសយើងរាល់ថ្ងៃកំពុងមានការរីកចម្រើនណាស់ពេលនេះ»។
លោក យន្ត សុផល ជាកម្មករសំណង់មួយរូបដែលកំពុងធ្វើការឲ្យបុរីមួយជាយរាជធានីភ្នំពេញ បានថ្លែងថា ការងាររបស់គាត់ឲ្យតែមានកម្លាំងធ្វើមិនចេះអស់ទេ។ គាត់សប្បាយរីករាយចំពោះការងារនេះ ថ្វីបើគាត់មិនបានចូលសាលារៀន ហើយបានប្រាក់កម្រៃទាបបន្តិចក៏ដោយ៖ «ខ្ញុំធ្វើគ្រប់សព្វពេលត្រូវការធ្វើការ៉ូធ្វើការ៉ូទៅ គេឲ្យធ្វើថ្នាំធ្វើខាងថ្នាំទៀតទៅ បៀកថ្នាំ រុញថ្នាំអីហ្នឹង។ ចុះថ្ងៃនេះធ្វើអី? បិទគម្របស៊ីហ្គែ។ ចេះទៀត?»។
យ៉ាងណាក៏ដោយ ការរីកចម្រើនក្នុងវិស័យសំណង់នេះ ក៏បានផ្ដល់ឱកាសការងារដល់និស្សិតដែលកំពុងសិក្សាផ្នែកវិស្វករសំណង់ស៊ីវិលយ៉ាងច្រើនគួរសម។ យុវជន ឈួន សុវណ្ណដា ជានិស្សិតឆ្នាំទី៤ ផ្នែកវិស្វករសំណង់ស៊ីវិល បានថ្លែងថា គាត់បានស្ម័គ្រចិត្តធ្វើការនៅតាមក្រុមហ៊ុននានា ដើម្បីរៀនយកបទពិសោធន៍សម្រាប់ការងារ ដើម្បីក្លាយទៅជាវិស្វករអាជីពនៅថ្ងៃក្រោយ៖ «កាលដំបូង ខ្ញុំចូលធ្វើនៅវីឡាអ្នកម៉ៅការក្រុមហ៊ុន ដើម្បីយកបទពិសោធន៍។ ហើយបានខ្ញុំដាក់ស៊ីវីចូលធ្វើនៅក្រុមហ៊ុនពិភពថ្មីផ្ទាល់តែម្ដង ធ្វើនៅនេះបាន ៨ខែ ធ្វើការនៅបុរីអីចឹង វាស្រួលដែរ។ យើងគ្រាន់តែត្រួតពិនិត្យលើអ្នកម៉ៅការ ពិនិត្យលើបច្ចេកទេស ការផ្គត់ផ្គង់សម្ភារៈ គ្រប់គ្រងលើកម្លាំងពលកម្មរបស់គាត់»។
នាយកគ្រប់គ្រងទូទៅនៃក្រុមហ៊ុន ប៊ុណ្ណា រៀលធី និងជាអនុប្រធានសមាគមអ្នកវាយតម្លៃអចលនទ្រព្យកម្ពុជា លោក នួន រិទ្ធី យល់ឃើញថា វិស័យសំណង់ក្នុងពេលបច្ចុប្បន្នមិនត្រឹមតែរីកចម្រើននោះទេ គឺគម្រោងសាងសង់នីមួយៗកាន់តែប្រណិត និងទំនើប។ ដូច្នេះ វិស្វករដែលទើបតែចាប់ផ្ដើមការងារមិនបានកាន់កាប់ការងារសំខាន់ៗនោះទេ លុះត្រាតែមានវិស្វករអាជីពដែលមានបទពិសោធន៍ការងារយ៉ាងហោចណាស់ ៥ឆ្នាំដែរ បានទុកចិត្តអាចទទួលធ្វើបាន។
លោកថា នេះគឺជាអ្វីដែលចោទជាបញ្ហាដែលទាមទារឲ្យមានវិស្វករពីបរទេសដែលគេមានជំនាញ និងការយល់ដឹងខ្ពស់ជាងវិស្វករដែលទើបប្រឡូកក្នុងការងារមិនមែនជាវិស្វករអាជីពនោះ៖ «សម្រាប់និស្សិតដែលគាត់ចាប់យកការងារជាវិស្វករនោះ គឺអត់ខុសទេ»។
ដោយឡែក អនុប្រធានក្រុមហ៊ុន អេស៊ា រៀល អ៊ីស្ទេត (Asia Real Estate Cambodia) លោក កិក ណារិន បានកត់សម្គាល់ថា សមត្ថភាពវិស្វករខ្មែរបច្ចុប្បន្ននៅមានកម្រិតនៅឡើយ។ វិស្វករកម្ពុជា មួយចំនួនពិតជានៅត្រូវការបំប៉នសមត្ថភាពរបស់ខ្លួនថែមទៀត ដើម្បីទប់ស្កាត់អ្នកជំនាញការមកពីក្រៅស្រុក ដែលចូលមកធ្វើការឲ្យកម្ពុជា កាន់តែច្រើន។
លោក កិក ណារិន បានបន្តទៀតថា ទន្ទឹមនឹងវិស្វករខ្មែរកំពុងពង្រឹងសមត្ថភាពរបស់ខ្លួននោះ ការហូរចូលនៃអ្នកជំនាញកម្រិតខ្ពស់ ឬវិស្វករមកធ្វើការលើគម្រោងនានាក្នុងប្រទេសកម្ពុជា នៅតែជៀសមិនរួច។
វិស្វករកម្ពុជា ពុំទាន់មានស្ថាប័នណាស្រង់ស្ថិតិថាមានចំនួនប៉ុន្មាននោះទេ។ មន្ត្រីគណៈវិស្វករ ថាមានវិស្វករប្រមាណ ២ម៉ឺននាក់ ប៉ុន្តែវិស្វករដែលបានចុះបញ្ជីនៅគណៈវិស្វករកម្ពុជា ជាវិស្វករអាជីព មានចំនួនជាង ១ពាន់នាក់ប៉ុណ្ណោះ។ យ៉ាងនេះក្ដី បច្ចុប្បន្នគេដឹងថា វិស្វករបរទេសដែលចូលមកធ្វើការក្នុងគម្រោងធំៗមាន ដូចជា ជនជាតិចិន ថៃ ជប៉ុន កូរ៉េ និងម៉ាឡេស៊ី ជាដើម។
អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក បេងហុង សុជាតិខេមរ៉ូ មានប្រសាសន៍ថា យើងមិនអាចមានតែគោលនយោបាយគាំទ្រកម្លាំងពលកម្មតែក្នុងស្រុកនោះទេ គឺចាំបាច់ឲ្យមានការប្រកួតប្រជែងគ្នាជាដាច់ខាត។ យន្តការនេះ នឹងឆ្លើយតបទៅនឹងប្រទេសក្នុងសហគមន៍អាស៊ាន និងធ្វើសមាហរណកម្មសេដ្ឋកិច្ចនៅឆ្នាំ២០១៥ ដ៏ខ្លីខាងមុខនេះ។
នៅក្នុងសម័យសកលភាវូបនីយកម្ម មិនថាប្រទេសណាជាប្រទេសណានោះទេ គឺគេនៅតែត្រូវការជានិច្ចចំពោះលំហូរចូលនៃកម្លាំងពលកម្មពីអ្នកជំនាញបរទេសកម្រិតខ្ពស់ ដើម្បីទទួលបានគំនិតច្នៃប្រឌិតពីប្រទេសនានា ធ្វើឲ្យការងារមានលក្ខណៈកាន់តែល្អប្រសើរ។ ទន្ទឹមនឹងគ្នានោះ ការបើកចិត្តទូលាយដើម្បីរៀននូវបទពិសោធន៍ និងគំនិតល្អៗពីគេ ត្រូវតែតោងឲ្យជាប់ជាមួយនឹងការខិតខំពង្រឹងសមត្ថភាពរបស់ខ្លួនដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។