ទស្សនាវីដេអូអំពីសកម្មភាពលោក ឈុត វុទ្ធី
ក្រុមគ្រួសារសកម្មជនការពារព្រៃឈើ លោក ឈុត វុទ្ធី ដែលត្រូវបានឆ្មាំក្រុមហ៊ុនសម្បទានព្រៃឈើបាញ់សម្លាប់ នៅពេលលោកកំពុងស៊ើបអង្កេតការកាប់ឈើខុសច្បាប់នៅខេត្តកោះកុង កាលពីថ្ងៃទី២៦ ខែមេសា ឆ្នាំ២០១២ បានទាមទារឲ្យរដ្ឋាភិបាលបន្តស្វែងរកឃាតកពិតមកផ្ដន្ទាទោសតាមផ្លូវច្បាប់។
ការអំពាវនាវនេះ ធ្វើឡើងនៅពេលដែលក្រុមគ្រួសារលោក ឈុត វុទ្ធី គ្រោងរៀបចំពិធីបុណ្យខួបមួយឆ្នាំនៃការស្លាប់របស់លោក ឈុត វុទ្ធី។ លោក ឈើយ ឧត្តមរស្មី កូនប្រុសសកម្មជនដីធ្លីលោក ឈុត វុទ្ធី មានប្រសាសន៍ថា តុលាការនៅមិនទាន់ផ្តល់យុត្តិធម៌ឲ្យក្រុមគ្រួសាររបស់លោកនៅឡើយទេ៖ «បាទ! វាដូចជាអត់មានភាពយុត្តិធម៌សោះ ព្រោះឥឡូវហ្នឹង ឃាតកហ្នឹងមិនដឹងជាត្រូវជានរណាគេ អីចឹងខ្ញុំចង់សំណូមពរទៅខាងរដ្ឋាភិបាលហ្នឹងបើកសំណុំរឿងហ្នឹងសាឡើងវិញអីចឹងណាស់ ធ្វើអីចឹងអត់កើតទេ ព្រោះថាក្នុងនាមគាត់ជាសកម្មជនការពារព្រៃឈើមួយស្លាប់គ្មានន័យគ្មានអីចឹង»។
លោកបន្តថា បុណ្យខួប ១ឆ្នាំនោះ នឹងធ្វើឡើងនៅទីកន្លែងដែលលោក ឈុត វុទ្ធី ត្រូវបានបាញ់សម្លាប់។ លោក ឈើយ ឧត្តមរស្មី បន្តថា បច្ចុប្បន្នលោកបានក្លាយជាប្រធានអង្គការការពារធនធានធម្មជាតិ ដើម្បីបន្តការងាររបស់ឪពុកលោក។ ប៉ុន្តែលោកកំពុងជួបប្រទះបញ្ហាថវិកាសម្រាប់ដំណើរការអង្គការនេះ។ លោកសំណូមពរឲ្យសហគមន៍ជាតិ និងអន្តរជាតិ ផ្តល់ថវិកាជួយដល់អង្គការរបស់លោក ដើម្បីជួយទប់ស្កាត់ការកាប់បំផ្លាញព្រៃឈើនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។