របាយការណ៍កម្រាស់ ២៦ទំព័រ ដែលសិក្សាទៅលើស្ថានភាពរោងចក្រកាត់ដេរ និងស្បែកជើងចំនួន១៥៥ រកឃើញថា ពុំមានការកែលំអនូវលក្ខខណ្ឌការងារសំខាន់ៗ រួមមានជាអាទិ៍ សុវត្ថិភាពអគ្គិភ័យ ពលកម្មកុមារ និងសុវត្ថិភាព និងសុខភាពរបស់កម្មករនិយោជិត។
លក្ខខណ្ឌការងារនៅតាមរោងចក្រកាន់តែអាក្រក់ក្នុងរយៈពេល ៣ឆ្នាំចុងក្រោយ ពោលគឺគិតពីឆ្នាំ២០១១ មក។
របាយការណ៍រកឃើញថា ក្នុងចំណោមរោងចក្រដែលត្រូវបានសិក្សា មានរោងចក្រចំនួន២៤ នៅបន្តចាក់សោបិទទ្វារច្រកចេញពេលមានអាសន្ននៅក្នុងម៉ោងធ្វើការ។ នៅមានរោងចក្រជិត៧០ ខកខានមិនបានរៀបចំការហ្វឹកហាត់ជម្លៀសអគ្គិភ័យរៀងរាល់ ៦ខែម្តង ហើយរោងចក្រចំនួន៨ មានរបស់របរបាំងច្រកដើរ។
រោងចក្រកាន់តែប្រសើរនៅកម្ពុជា រកឃើញថា មានកុមារ ៦នាក់ អាយុក្រោម ១៥ឆ្នាំ កំពុងធ្វើការនៅក្នុងរោងចក្រខ្លះ។ ចំពោះកូដកម្មវិញ កូដកម្មទាំង ៤០ករណី ដែលត្រូវបានកត់ត្រានៅក្នុងរយៈពេលសិក្សា របាយការណ៍រកឃើញថា សុទ្ធតែខកខានមិនបានធ្វើតាមលក្ខខណ្ឌតម្រូវដោយច្បាប់។ ចំណុចនេះមិនមានការផ្លាស់ប្តូរឡើយនៅក្នុងរយៈពេល ៣ឆ្នាំចុងក្រោយ ឬយូរជាងនេះ។
ប្រធានទីប្រឹក្សាបច្ចេកទេសរបស់រោងចក្រកាន់តែប្រសើរនៅកម្ពុជា នៃអង្គការអន្តរជាតិខាងការងារ លោកស្រី ជីល ធីកគឺ (Jill Tucker) មានប្រសាសន៍តាមរយៈសេចក្តីថ្លែងការណ៍ថា៖ «អ្វីដែលគួរឲ្យសោកស្ដាយ ទិន្នន័យដែលយើងប្រមូលបានបង្ហាញថា បន្ទាប់ពីមានការកែលំអលក្ខខណ្ឌការងារជាបណ្ដើរៗចាប់ពីឆ្នាំ២០០៥ ដល់ឆ្នាំ២០១១ ឥឡូវនេះលក្ខខណ្ឌការងារទាំងនេះបែរជាមានការធ្លាក់ចុះទៅវិញ។ អ្នកពាក់ព័ន្ធទាំងអស់ចាំបាច់ត្រូវតែអនុវត្តវិធានការឲ្យបានខ្លាំងក្លាជាងមុន ដើម្បីបញ្ឈប់និន្នាការថយចុះបែបនេះ»។
របាយការណ៍ក្រសួងពាណិជ្ជកម្ម ចំនួនរោងចក្រដែលអាចនាំចេញបានមានការកើនឡើងពី ៣៨៤ រហូតដល់ ៤១២រោងចក្រ ហើយចំនួនកម្មករនៅក្នុងរោងចក្រនាំចេញមានការកើនឡើងពីជាង ៣៧ម៉ឺននាក់ (៣៧៤.៣១៨នាក់) រហូតដល់ជាង ៣៩ម៉ឺននាក់ (៣៩៤.២៦២នាក់)។ ការចុះខ្សោយលក្ខខណ្ឌការងារ អាចកើតមានឡើងមួយផ្នែក ដោយសារតែកំណើនរបស់ឧស្សាហកម្ម ខណៈពេលដែលអ្នកគ្រប់គ្រងខិតខំប្រឹងប្រែងតាមឲ្យទាន់ការបញ្ជាទិញដែលមានសន្ទុះឡើងខ្ពស់។
ជុំវិញការរកឃើញពីការធ្លាក់នូវលក្ខខណ្ឌការងារក្នុងវិស័យកាត់ដេរ មន្ត្រីជាន់ខ្ពស់នៃសមាគមរោងចក្រកាត់ដេរនៅកម្ពុជា លោក ជាតិ ខេមរា យល់ថា មានរោងចក្រភាគច្រើនបានគោរព និងអនុវត្តនូវបទដ្ឋានច្បាប់ត្រឹមត្រូវ។ ប៉ុន្តែ លោក ជាតិ ខេមរា ទទួលស្គាល់ថា ពិតជាមានរោងចក្រមួយចំនួនបានធ្វើបំពានច្បាប់ពិតមែន៖ «មិនប្រសើរហ្នឹង វាប៉ុន្មានភាគរយ ព្រោះយើងនិយាយតែមួយ វាប៉ះពាល់ទាំងអស់ រោងចក្រគេផ្សេងៗ គេធ្វើបាន អាមួយហ្នឹងវាមិនទាន់ធ្វើបាន ស្រាប់តែនិយាយមកវិស័យកាត់ដេរឃើញលក្ខខណ្ឌការងារមិនប្រសើរ»។
ប្រធានសហភាពការងារកម្ពុជា លោក អាត់ ធន ចាត់ទុករបាយការណ៍ចេញដោយគម្រោងរោងចក្រកាន់តែប្រសើរនៅកម្ពុជា នៃអង្គការអន្តរជាតិខាងការងារ ជារបាយការណ៍ឆ្លុះបញ្ចាំងពីស្ថានភាពនៅក្នុងប្រទេសកម្ពុជា។ លោកយល់ថា វិស័យឧស្សាហកម្មកាត់ដេរ និងលក្ខខណ្ឌការងារនៅមានបញ្ហាច្រើន ដែលត្រូវធ្វើការផ្លាស់ប្ដូរ៖ «ពេលកម្មករធ្វើការ គាត់ចាក់សោ ហើយដាក់ឥវ៉ាន់បិទផ្លូវច្រកចេញ ចុះបើមានអគ្គិភ័យ ត្រូវធ្វើម៉េច ហីដូចជាកម្មករមានផ្ទៃពោះភាគច្រើនបញ្ឈប់ចោល យើងមានការរំលោភធ្ងន់ធ្ងរមែនទែន»។
លោកយល់ថា សព្វថ្ងៃក្រុមអធិការកិច្ចចុះត្រួតពិនិត្យមិនសូវមានប្រសិទ្ធភាពទេ។ ដោយទី១ មានមន្ត្រីខ្លះបានទៅធ្វើទីប្រឹក្សាការងារឲ្យក្រុមហ៊ុន។ ទី២ មន្ត្រីអធិការកិច្ចខ្លះចុះទៅពិនិត្យ និងរកឃើញភាពមិនប្រក្រតីនៅក្នុងរោងចក្រហើយ តែបែរជាមិនឲ្យមានការផ្លាស់ប្ដូរជាថ្នូរលាភសក្ការៈពីក្រុមហ៊ុន និងទី៣ មន្ត្រីខ្លះមិនអាចចូលទៅអធិការកិច្ចបាន ដោយខ្លាចការគំរាមកំហែង ព្រោះតែថៅកែក្រុមហ៊ុនជាអ្នកមានអំណាច។ ចំណុចទាំង៣នេះ ជាឧបសគ្គដែលធ្វើឲ្យក្រុមហ៊ុនមិនធ្វើការកែប្រែនូវលក្ខខណ្ឌការងារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។