មន្ត្រីរដ្ឋាភិបាល រួមទាំងមន្ត្រីសហជីពកម្មករបានអះអាងថា លោកនាយករដ្ឋមន្ត្រី ហ៊ុន សែន បានបញ្ជាឲ្យក្រសួងការងារ សងប្រាក់អតីតភាពការងារកម្មកររោងចក្រ យុងវ៉ា ដែលបានធ្វើកូដកម្មតវ៉ាកន្លងមក។
រោងចក្រ យុងវ៉ា ស្ថិតនៅក្នុងខេត្តកណ្ដាល មានកម្មករជាង ៧ពាន់នាក់ ហើយបានធ្វើកូដកម្មទាមទារប្រាក់សំណងនេះប្រហែលមួយខែមកហើយ បន្ទាប់ពីថៅកែរោងចក្រនេះលួចរត់ចោលរោងចក្រកាលពីដើមឆ្នាំ២០១៣ នេះមក។
លោក ធុល នាង ប្រធានមន្ទីរការងារខេត្តកណ្ដាល មានប្រសាសន៍ថ្ងៃទី១៩ កុម្ភៈ ថា ក្រុមមន្ត្រីរបស់លោកកំពុងធ្វើការស្រាវជ្រាវ កត់ត្រាឯកសារអតីតភាពការងារកម្មករ យុងវ៉ា ដើម្បីធ្វើជាឯកសារយោងបើកប្រាក់សំណងដល់កម្មករ។
លោក ធុល នាង៖ «យោងតាមគោលការណ៍ គឺសម្ដេចបានបញ្ជាមក គឺថា ដកប្រាក់រដ្ឋាភិបាលទូទាត់សងអត្ថប្រយោជន៍កម្មករតាមផ្លូវច្បាប់ជូនគាត់ ដែលគាត់ទាមទារ។ យើងដោះស្រាយជូនកម្មករ យើងបានប្រកាសហើយ។ ឥឡូវកំពុងធ្វើឯកសារគិតគូរតាមអត្ថប្រយោជន៍គាត់សិនដែលគាត់ទាមទារហ្នឹងណាស់»។
លោក ធុល នាង មិនបានបញ្ជាក់ថា តើទឹកប្រាក់សំណងនោះមានចំនួនប៉ុន្មានទេ។ ក៏ប៉ុន្តែលោក អ៊ុំ វិសាល មន្ត្រីសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានប៉ាន់ប្រមាណថា ប្រាក់សំណងសរុបដែលក្រុមកម្មករហៅថា «ប្រាក់បំណាច់អតីតភាព» ចំពោះកម្មករប្រហែលជាង ៧ពាន់នោះ មានចំនួនប្រហែល ៨លានដុល្លារសម្រាប់សងកម្មករចំនួន ៥ចំណុចដែលបានទាមទារកន្លងមក។
ដំណឹងនេះត្រូវបានកម្មករអរផងភ័យផង។ អរព្រោះពួកគេមិននឹកស្មានថា ការតវ៉ានេះបានជោគជ័យដូច្នេះ។ ពួកគេភ័យ គឺភ័យខ្លាចមានមន្ត្រីខិលខូចកិបកេងប្រាក់សំណងរបស់ពួកគេ។
លោក អ៊ុំ វិសាល បានហៅការប្រកាសរបស់រដ្ឋាភិបាលនេះថា ជាការទទួលខុសត្រូវជាប្រវត្តិសាស្ត្រមិនធ្លាប់មានកន្លងមកចំពោះកម្មកររងគ្រោះ ដោយសារថៅកែបោកប្រាស់ដូច្នេះ។ ក៏ប៉ុន្តែលោកបានអំពាវដល់រដ្ឋាភិបាលសុំបង្កើតគណៈកម្មការមួយ ដើម្បីធានាដល់កម្មករនីមួយៗទទួលបានប្រាក់សំណងត្រឹមត្រូវ និងទំហំការងារជាក់ស្ដែងរបស់កម្មករ ដែលបានធ្វើការអស់ជាច្រើនឆ្នាំមកហើយ។
លោក អ៊ុំ វិសាល៖ «ក្នុងនាមយើងជាសហជីពចំពោះមុខយើងព្រួយបារម្ភ ទោះបីជាមានការព្រមឯកភាពក្នុងការផ្ដល់ប្រាក់បំណាច់អតីតភាពទាំង ៥ចំណុចក៏ដោយ។ តែយើងបារម្ភខ្លាចការបើកទៅមិនត្រឹមត្រូវតាមអតីតភាពជាក់ស្ដែងរបស់ពួកគាត់...»។
បន្ថែមលើនេះ សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានចេញសេចក្ដីថ្លែងការណ៍មួយ សុំឲ្យរដ្ឋាភិបាលចាត់វិធានការឲ្យមានតម្លាភាពក្នុងដំណើរការបើកប្រាក់សងកម្មករនេះ ដោយសុំពីរចំណុច។ ទី១ សុំរៀបចំគណៈកម្មការដែលមានសមាសភាពតំណាងសហព័ន្ធសហជីពដែលមានបញ្ជិកាតែម្នាក់ និងមានសហជីពមូលដ្ឋាន ៣នាក់ ដើម្បីចូលរួមក្នុងគណៈកម្មការនោះ។ ចំណុចទី២ សុំផ្ដល់លិខិតបញ្ជាក់ពីក្រសួងការងារ ឬស្ថាប័នពាក់ព័ន្ធដែលមានចំណាររបស់នាយករដ្ឋមន្ត្រី ថាប្រាកដនឹងបើកប្រាក់បំណាច់ទាំង ៥ចំណុច ជូនកម្មករក្នុងអំឡុងពេលមួយជាក់លាក់ ដើម្បីសហជីពបានប្រកាសជូនកម្មករជ្រាប និងបញ្ចប់ធ្វើកូដកម្ម។
លោក អាត់ ធន់ ប្រធានសហព័ន្ធសហជីពប្រជាធិបតេយ្យកម្មករកាត់ដេរកម្ពុជា បង្ហើបឲ្យដឹងថា ប្រាក់អតីតការងារទាំង ៥ចំណុចរបស់កម្មករក្នុងម្នាក់ៗ អាចមានចាប់ពីទឹកប្រាក់ជាង ២០០ដុល្លារ ទៅដល់ជាង ២ពាន់ដុល្លារ អាស្រ័យរយៈពេលអតីតការងារយូរឆាប់របស់កម្មករម្នាក់ៗ រួមទាំងកម្មករមានជំនាញខ្ពស់មួយចំនួនទៀត ដែលអាចទទួលប្រាក់សំណងច្រើនជាងនេះ។ ទោះយ៉ាងណា មន្ត្រីរដ្ឋាភិបាលមិនបានបញ្ជាក់ភ្លាមៗ ឲ្យដឹងពីកាលបរិច្ឆេទទូទាត់ប្រាក់សំណងទៅកម្មករទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។