កម្មករ​រោងចក្រ​​ផលិត​​ឡាំង​ក្រដាស​បន្ត​តវ៉ា​ទាមទារ​ប្រាក់​អតីតភាព​ការងារ

0:00 / 0:00

កម្មករ​នៅ​រោងចក្រ​ផលិត​ឡាំង​ក្រដាស ហារតា (Harta Packaging Industries Cambodia) បន្ត​តវ៉ា​នៅ​ខាង​មុខ​រោងចក្រ ទាមទារ​ឲ្យ​ភាគី​រោងចក្រ​បើក​ប្រាក់​អតីតភាព​ការងារ។ ការ​បន្ត​​តវ៉ា​នេះ គឺ​បន្ទាប់​ពី​ក្រុមប្រឹក្សា​អាជ្ញាកណ្ដាល​​ខកខាន​មិន​អាច​បើក​សវនាការ​ជម្រះ​ករណី​ដោះស្រាយ​ទំនាស់​ដែល​អូស​បន្លាយ​តាំង​ពី​ឆ្នាំ​២០១២ មក​នេះ។

កម្មករ​រោងចក្រ​ផលិត​ឡាំង​ក្រដាស ហារតា ជាង ១០០​នាក់ សម្រេច​បន្ត​បាតុកម្ម​អហិង្សា​នៅ​មុខ​រោងចក្រ​ក្នុង​ពេល​ដែល​ពួក​គេ​រង់ចាំ​សវនាការ​នៅ​ក្រុមប្រឹក្សា​អាជ្ញាកណ្តាល ដើម្បី​បញ្ចប់​ទំនាស់​ទាមទារ​ប្រាក់​អតីតភាព​ការងារ។

លោក ហា មួន កម្មករ​រោងចក្រ​ផលិត​ឡាំង​ក្រដាស ហារតា អះអាង​ថា នៅ​ថ្ងៃ​២៧ ខែ​មីនា ក្រុមប្រឹក្សា​អាជ្ញាកណ្ដាល​សន្យា​បើក​សវនាការ​ជម្រះ​ក្តី​ឲ្យ​កម្មករ​ទាមទារ​ប្រាក់​អតីតភាព​ការងារ។ ប៉ុន្តែ​បែរ​ជា​ក្រុមប្រឹក្សា​អាជ្ញាកណ្ដាល​លើក​ពេល​សវនាការ​ទៅ​ដល់​ថ្ងៃ​សុក្រ ទី​៤ ខែ​មេសា វិញ ទើប​កម្មករ​ខឹងសម្បា បន្ត​ការ​តវ៉ា​នៅ​មុខ​រោងចក្រ​នេះ។

តំណាង​ក្រុម​កម្មករ លោក ស៊ន បូរ៉ា ឲ្យ​ដឹង​ថា ពួកគាត់​ធ្វើ​ការ​ឲ្យ​រោងចក្រ​ផលិត​ឡាំង​ក្រដាស ហារតា តាំង​ពី​ឆ្នាំ​២០០៤ មក។ នៅ​ឆ្នាំ​២០១២ រោងចក្រ​នោះ​បាន​ប្ដូរ​ការ​គ្រប់គ្រង​របស់​ថៅកែ​ពី​ជនជាតិ​ម៉ាឡេស៊ី ទៅ​ថៅកែ​ជនជាតិ​ជប៉ុន​វិញ។ ថៅកែ​ថ្មី​បញ្ឈប់​កម្មករ​នៅ​ពេល​តវ៉ា​សុំ​ដំឡើង​ប្រាក់ខែ ទើប​កម្មករ​តវ៉ា​សុំ​បើក​ប្រាក់​អតីតភាព​ការងារ​ជាង ១០​ឆ្នាំ។

លោក​ថា រាល់​ការ​តវ៉ា ថៅកែ​បញ្ឈប់​កម្មករ​ម្តង ៥០​នាក់ ម្តង ១០០​នាក់ ក្នុង​ចំណោម​កម្មករ​ជាង ៥០០​នាក់ ដែល​ធ្វើ​ការ​តាំង​ពី​ឆ្នាំ​២០០៤ មក​នោះ។ បច្ចុប្បន្ន​នៅ​សល់​តែ​កម្មករ ២៨៥​នាក់ ដែល​នៅ​ទាមទារ​សុំ​ឲ្យ​បើក​ប្រាក់​អតីតភាព​ការងារ​ជាង ១០​ឆ្នាំ ដែល​បាន​ធ្វើការ​ឲ្យ​រោងចក្រ​នេះ៖ «វា​អត់​ទូទាត់​អតីត​ភាព​ឲ្យ​កម្មករ​ចាស់ៗ​ដែល​គ្នា​ទាមទារ។ ដល់​ពេល​កូដកម្ម​លើក​នេះ គឺ​វា​ប្រើ​រយៈពេល​រហូត​ដល់​ជិត ២​ខែ អត់​មាន​ដំណោះស្រាយ​អី​ទាំង​អស់»

លោក​បន្ត​ថា កម្មករ ២៨៥​នាក់ ដែល​បន្ត​ការ​តវ៉ា​នោះ​ កាល​ពី​ថ្ងៃ​ទី​២៥ ខែ​កុម្ភៈ រដ្ឋមន្ត្រី​ក្រសួង​ការងារ បាន​ជំរុញ​ឲ្យ​សហជីព​តំណាង​កម្មករ និង​ក្រុមប្រឹក្សា​អាជ្ញាកណ្ដាល​ដោះស្រាយ ស្រាប់​តែ​ខាង​សហជីព​ដែល​ការពារ​ផលប្រយោជន៍​រោងចក្រ សុំ​ឲ្យ​ថៅកែ​បញ្ឈប់​កម្មករ​តវ៉ា ២៨៥​នាក់​តែម្ដង។

ក្រុម​កម្មករ​រៀបចំ​ប្រើ​ហិង្សា តែ​សហព័ន្ធ​សហជីព​ដើម្បី​កម្មករ​ដែល​ការពារ​ប្រយោជន៍​កម្មករ បាន​អង្វរ​កម្មករ​កុំ​ឲ្យ​ប្រើ​ហិង្សា ហើយ​សហភាព​សហជីព​នោះ សន្យា​នឹង​ជួយ​ធ្វើ​ការ​ដោះស្រាយ​ជូន ទើប​កម្មករ​បន្ត​រង់ចាំ​ដំណោះស្រាយ​ដោយ​សន្តិវិធី។ ប៉ុន្តែ​ការ​ដោះស្រាយ​ចេះ​តែ​លើក​ពេល​សវនាការ​ម្ដង​ថ្ងៃ​នេះ ម្ដង​ថ្ងៃ​នោះ ឥឡូវ​ពន្យារ​ការ​ដោះស្រាយ​ដល់​ខែ ៤​ទៀត។

លេខាធិការដ្ឋាន​ក្រុមប្រឹក្សា​អាជ្ញាកណ្ដាល លោក ប៉ែន សាវាត ថ្លែង​នៅ​ព្រឹក​ថ្ងៃ​២៧ ខែ​មីនា ថា ក្រុមប្រឹក្សា​អាជ្ញា​កណ្ដាល​មិន​បាន​លើក​សវនាការ​ថ្ងៃ​នេះ​លើ​សំណុំ​រឿង​កម្មករ​រោងចក្រ ហារតា ទេ គឺ​ខាង​សហជីព​តំណាង​ឲ្យ​កម្មករ​នោះ​ទៅ​វិញ​ទេ សុំ​លើក​ពេល​ព្រោះ​រវល់៖ «ទាក់ទង​លើ​សំណុំ​រឿង​នេះ គឺ​យើង​បាន​ពន្យារ​ពេល ព្រោះ​អី​ខាង កម្មករ​គាត់​ស្នើ​សុំ​លើក​ថ្ងៃ​សវនាការ»

ប្រធាន​សហព័ន្ធ​សហជីព​ដើម្បី​កម្មករ លោក ពុត សុវណ្ណ បាន​ឲ្យ​ដឹង​ថា ការ​លើក​ពេល​សវនាការ​ជំនុំជម្រះ​នេះ ដោយសារ​លោក​មាន​ធុរៈ​ធ្វើ​បុណ្យ​ចាំបាច់។ ទន្ទឹម​នោះ ខាង​រោងចក្រ​ស្នើ​សុំ​ពន្យារ​សវនាការ​ទៅ​ដល់​ខែ​ក្រោយ (ថ្ងៃ​៤ ខែ​មេសា)។

រដ្ឋបាល​រោងចក្រ​ផលិត​ឡាំង​ក្រដាស ហារតា លោក សូ ភក្តី បាន​ឲ្យ​ដឹង​ថា មេធាវី​របស់​រោងចក្រ​ជា​អ្នក​ធ្វើការ​ដោះស្រាយ​រាល់​បណ្ដឹង​របស់​កម្មករ។ លោក​ឲ្យ​ដឹង​ដែរ​ថា រោងចក្រ​នេះ​មិន​បាន​ប្ដូរ​ឈ្មោះ​រោងចក្រ និង​ប្ដូរ​ថៅកែ​ទេ គឺ​គ្រាន់​តែ​ឲ្យ​កម្មករ​ធ្វើការ​ស្រប​តាម​ស្តង់ដារ​ការងារ​អន្តរជាតិ។

ក្រុម​កម្មករ​បាន​ឲ្យ​ដឹង​ថា រោងចក្រ​ផលិត​ឡាំង​ក្រដាស ហារតា មាន​ទីតាំង​នៅ​តាម​ផ្លូវ​ជាតិ​លេខ​៤ ក្នុង​ភូមិ​កន្ទោក សង្កាត់​ចោមចៅ ខណ្ឌ​ពោធិ៍សែនជ័យ។ រោងចក្រ​នោះ​បាន​ដំណើរ​ការ​ពី​ឆ្នាំ​២០០៤។ នៅ​មុន​ឆ្នាំ​២០១២ ដែល​មិន​ទាន់​ផ្លាស់ប្ដូរ​ថៅកែ​ពី​ជនជាតិ​ម៉ាឡេស៊ី ​ទៅ​ជនជាតិ​ជប៉ុន មាន​ការ​គោរព​ម៉ោង​ការងារ​និង​សិទ្ធិ​កម្មករ។ ប៉ុន្តែ​ក្រោយ​ឆ្នាំ​២០១២ ក្រោយ​ប្ដូរ​ថៅកែ​ថ្មី គេ​បាន​អនុវត្ត​ការងារ​ក្នុង​រោងចក្រ​តាម​បែប​ប្រទេស​ជឿនលឿន និង​រឹតតែ​មិន​គោរព​សិទ្ធិ​កម្មករ ហើយ​ជំរុញ​ឲ្យ​កម្មករ​ធ្វើ​ការ​ឲ្យ​បាន​តាម​ស្តង់ដារ​អន្តរជាតិ។ បើ​កម្មករ​ណា​តវ៉ា គេ​បញ្ឈប់​ភ្លាម និង​បើក​លុយ​អតីតភាព​ការងារ​ឲ្យ។ ប៉ុន្តែ​កម្មករ ២៨៥​នាក់ ដែល​នៅ​សល់​បន្ត​ការ​តវ៉ា ព្រោះ​គេ​មិន​ព្រម​បើក​ប្រាក់​អតីតភាព​ការងារ​ឲ្យ​ទេ។

ក្រុម​កម្មករ​នៅ​បន្ត​ការ​តវ៉ា​ស្ងាត់ស្ងៀម​នៅ​មុខ​រោងចក្រ មិន​មាន​ហិង្សា​ទេ ហើយ​បាន​រំសាយ​នៅ​ថ្ងៃ​ត្រង់ ថ្ងៃ​២៧ ខែ​មីនា បន្ទាប់​ពី​មាន​ដំណឹង​ថា នឹង​មាន​សវនាការ​នៅ​ថ្ងៃ​៤ ខែ​មេសា ខាង​មុខ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។