តុលាការខេត្តបន្ទាយមានជ័យ កំពុងស្រាវជ្រាវរកចាប់ខ្លួនមុខសញ្ញាជនសង្ស័យជាច្រើននាក់ ដែលជាប់ពាក់ព័ន្ធក្នុងករណីជួញដូរឈើគ្រញូង ដឹកចេញពីតំបន់ព្រំដែនខ្មែរ-ថៃ ឆ្លងកាត់ស្រុកម៉ាឡៃ ខេត្តបន្ទាយមានជ័យ ដើម្បីយកទៅលក់បន្តនៅប្រទេសវៀតណាម។
ព្រះរាជអាជ្ញាតុលាការខេត្តបន្ទាយមានជ័យ លោក ផាន់ វណ្ណរ័ត្ន បានមានប្រសាសន៍នៅថ្ងៃសៅរ៍ ទី៣០ ខែមីនា ថា ការតាមចាប់ខ្លួនមុខសញ្ញាជនសង្ស័យនេះ ធ្វើឡើងក្រោយពីសមត្ថកិច្ចចម្រុះបានបើកប្រតិបត្តិការជាទ្រង់ទ្រាយធំ ចាប់បានឈើគ្រញូងជាច្រើនដុំ និងរថយន្តជាច្រើនគ្រឿង នៅព្រំដែនកម្ពុជា-ថៃ រួចមក។ វត្ថុតាងមានឈើគ្រញូង និងរថយន្ត បច្ចុប្បន្នកំពុងរក្សាទុកនៅស្នងការនគរបាលខេត្តបន្ទាយមានជ័យ។
លោក ផាន់ វណ្ណរ័ត្ន៖ «យើងទៅដល់ហ្នឹងរត់អស់ហើយ ឥឡូវយើងកំពុងស៊ើបអង្កេតតាមដេញតាមហ្នឹងទៀត។ តើស្លាកលេខហ្នឹង ពិតប្រាកដឬក្លែងក្លាយ ខ្ញុំកំពុងពិនិត្យទៀត។ យើងខ្លាចតែផ្លាកលេខហ្នឹងក្លែងក្លាយ។ បើអ៊ីចឹង យើងអាចរកអត់ឃើញ។ ឥឡូវកំពុងនៅស្នងការដ្ឋាននគរបាលខេត្តបន្ទាយមានជ័យ ឈើគ្រញូងប្រហែល ៧ម៉ែត្រគីប រថយន្ត ៤គ្រឿង មានរថយន្តមួយដឹកអង្ករជាមួយឈើ និងបីគ្រឿងទៀតដឹកឈើសុទ្ធ»។
កាលពីយប់ថ្ងៃទី២៧ ខែមីនា កងកម្លាំងសមត្ថកិច្ចចម្រុះ ដឹកនាំដោយលោក ផាន់ ភិរម្យ ជាតំណាងអយ្យការងតុលាការខេត្តបន្ទាយមានជ័យ បានចុះទៅឡោមព័ន្ធនៅទីតាំងច្រករបៀងខ្មែរ-ថៃ មួយ ដែលគ្រប់គ្រងដោយយោធាសឹករងស្រុកម៉ាឡៃ ស្ថិតនៅភូមិភ្នំរូង ឃុំបឹងបេង ហើយរឹបអូសបានឈើជាក្ដារបន្ទះ និងឈើមូលយ៉ាងច្រើន ហើយឈើទាំងនោះជាប្រភេទឈើគ្រញូង។
ប្រភពបានអះអាងថា កងកម្លាំងយោធាសឹករងស្រុកម៉ាឡៃ បានចេញមុខរេរាំក្នុងប្រតិបត្តិការបង្ក្រាបឈើគ្រញូងនេះ ប៉ុន្តែពួកគេបានដកថយវិញ ក្រោយពីពើបប្រទះជាមួយកម្លាំងមានសមត្ថកិច្ចចម្រុះច្រើននាក់ ដែលបានចុះទៅឡោមព័ន្ធនៅជុំវិញទីតាំងស្តុកឈើនោះ។ ប្រភពពីអាជ្ញាធរមូលដ្ឋានស្រុកម៉ាឡៃ ឲ្យដឹងថា ឈើគ្រញូងដែលគេស្តុកទុកនៅអូរព្រំដែននោះ គឺចេញមកពីប្រទេសថៃ ពុំមែនឈើដែលគេកាប់នៅក្នុងទឹកដីខ្មែរនោះទេ៖ «មាត់ច្រកដីថៃ នៅអូរព្រំដែនតែម្ដង ខាងទាហានព្រំដែន ប៉ូលិសព្រំដែន ព្រោះខាងហ្នឹងសមត្ថកិច្ចហើយ រឿងចេញចូលរឿងសមត្ថកិច្ចអ្នកគ្រប់គ្រងឈើ ប្រហែលជាមកពីថៃ ព្រោះជាប់ព្រំដែនចេញចូល សមត្ថកិច្ចទាំងសងខាងនៅសងខាងដងអូរ»។
ប្រភពបន្តថា ក្រុមឈ្មួញជាអ្នកជួញដូរឈើប្រណិត បានប្រើប្រាស់រូបភាពដោយយករថយន្តដឹកអង្ករចេញពីប្រទេសវៀតណាម ចូលទៅប្រទេសថៃ តាមច្រករបៀងខ្មែរ-ថៃ មួយ ដែលគេឲ្យឈ្មោះថា បន្ទាយដើមអម្ពិល ដែលគ្រប់គ្រងដោយយោធាសឹករងស្រុកម៉ាឡៃ។ ករណីនេះ គេបានសន្និដ្ឋានថា អង្ករទាំងនោះ គេប្រើប្រាស់ដើម្បីបិទបាំងនៅផ្នែកខាងក្រៅ ហើយកប់ឈើនៅខាងក្នុងរថយន្តដើម្បីដឹកឈើនោះចេញទៅលក់នៅប្រទេសវៀតណាម វិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។