លំហូរពលករចំណាកស្រុកខ្មែរនៅតែបន្តនាំគ្នាធ្វើទៅដំណើរទៅរកការងារធ្វើនៅប្រទេសថៃ។ ប៉ុន្តែរូបភាពនៃការឆ្លងកាត់ខ្សែបន្ទាត់ព្រំដែន ខ្មែរ-ថៃ នៅពេលនេះ គឺពួកគេបានពង្រាយគ្នាជាក្រុមតូចៗ ដើម្បីចៀសវាង និងបំបាំងភ្នែកកងកម្លាំងមានសមត្ថកិច្ចបានចាត់វិធានការចុះហាមឃាត់ពួកគេក្នុងរយៈពេលប៉ុន្មានថ្ងៃកន្លងមក។
ប្រជាពលរដ្ឋដែលជាអ្នករស់នៅតាមខ្សែបន្ទាត់ព្រំដែនខ្មែរ-ថៃ ក្នុងខេត្តបន្ទាយមានជ័យ ឲ្យដឹងនៅថ្ងៃទី២៩ ខែមេសា ថា ក្រុមមេខ្យល់ជួញដូរកម្លាំងពលកម្មខ្មែរជាអ្នករៀបចំផែនការថ្មីនេះ។ ពួកគេប្រើលេខទូរស័ព្ទរបស់ប្រទេសថៃ ច្រើនលេខទូរស័ព្ទ នៅក្នុងស្រុកខ្មែរដើម្បីធ្វើមធ្យោបាយទាក់ទង ជាមួយអ្នកចំណាកស្រុកខ្មែរ ដោយបានបង្កើតលេខកូដសម្ងាត់សម្គាល់ឲ្យពលករទាំងនោះ៖ «អ៊ីចឹងនៅតាមក្រឡុកក្រលៀត ឌឿងហែម គ្រប់ច្រករហក តាមសណ្ឋាគារ តាមដងផ្លូវ គឺឃើញពលករ រង់ចាំមេខ្យល់មកទទួល អ្នកខ្លះពួននៅក្នុងផ្ទះសំណាក់រង់ចាំពេលរាត្រី ទើបមេខ្យល់មកទទួលចេញទៅតាមច្រករបៀងកៀនកោះក្រោមដើមឈើ គឺមានពលករទាំងអស់ដេករង់ចាំមេខ្យល់ គឺច្រើនមែនទែន»។
នៅពេលជួបសួរនាំក្រុមពលករខ្មែរទាំងនោះ ពួកគាត់បានបដិសេធថា ពុំមែនជាអ្នករង់ចាំឆ្លងដែនទៅរកការនៅប្រទេសថៃទេ។ ការធ្វើដូច្នេះដោយសារតែពួកគាត់ភ័យខ្លាចអាជ្ញាធរហាមឃាត់មិនឲ្យឆ្លងដែន។
នៅក្រោយពីពិធីបុណ្យចូលឆ្នាំថ្មីប្រពៃណីជាតិខ្មែរ ចាប់ពីថ្ងៃទី១៧ ខែមេសា កងកម្លាំងចម្រុះដឹកនាំតំណាងអយ្យការ បានបើកយុទ្ធនាការទប់ស្កាត់លំហូរពលករចំណាកស្រុក ដែលប្រថុយប្រថានឆ្លងដែនខុសច្បាប់ទៅរកការងារនៅស្រុកថៃ។ ក្នុងនោះក្រុមអាជ្ញាធរហាមឃាត់ និងធ្វើការអប់រំ បានជាច្រើនពាន់នាក់ ដោយបានធ្វើកិច្ចសន្យាឱ្យត្រឡប់ទៅស្រុកកំណើត និងរកការងារធ្វើនៅក្នុងស្រុកខ្មែរវិញ។
ក្រុមអាជ្ញាធរមូលដ្ឋានបញ្ជាក់ថា ការឆ្លងដែនខុសច្បាប់របស់ពលករខ្មែរ អាចជួបប្រទះបញ្ហា និងគ្រោះថ្នាក់ជាច្រើន។ ដូចជាការចាញ់ឆបោករបស់មេខ្យល់ ជួបគ្រោះថ្នាក់ចរាចរណ៍ដោយសារតែការបើកបរគេចវេះពីសមត្ថកិច្ចថៃ។ នៅពេលធ្វើការនៅស្រុកថៃ ត្រូវថៅកែមិនបើកប្រាក់ឱ្យបោកប្រាស់កម្លាំងពលកម្ម ដោយសារតែពួកគាត់ចូលទៅប្រទេសថៃ ពុំមានឯកសារស្របច្បាប់។ ក្នុងរយៈពេលជាបន្តបន្ទាប់ ក្រុមអាជ្ញាធរថៃ បានចាប់ខ្លួនបញ្ជូនមកឲ្យប្រទេសខ្មែរវិញ ហើយបញ្ហាទាំងនេះ បាននាំឱ្យពួកគាត់ខាតពេលវេលារកស៊ីចិញ្ចឹមជីវិត និងជីវភាពក្នុងគ្រួសារ។
អាជ្ញាធរ៖ «ពួកមេខ្យល់គេរកវិធីសាស្ត្រធ្វើម៉េចពន្យល់ណែនាំបោកប្រាស់បងប្អូនប្រជាពលរដ្ឋនៅតាមមូលដ្ឋានឲ្យគេជឿជាក់លើគេ ហើយទៅធ្វើការនៅថៃ។ អានេះគឺជាល្បិចកលរបស់មេខ្យល់ ប៉ុន្តែក្នុងនាមអាជ្ញាធរយើងនឹងពន្យល់ទៅតាមនីតិវិធីផ្លូវច្បាប់»។
ក្រុមអាជ្ញាធរអះអាងថា នៅស្រុកខ្មែរមានការងារធ្វើច្រើន។ ការងារនៅក្នុងស្រុកពុំមានការព្រួយបារម្ភដូចនៅស្រុកថៃទេ។ ទន្ទឹមគ្នា ក្រុមអាជ្ញាធរបញ្ជាក់ថា បើប្រជាពលរដ្ឋខ្មែរចង់ទៅរកការងារធ្វើនៅប្រទេសថៃ ត្រូវនាំគ្នាទៅដោយស្របច្បាប់ មានលិខិតឆ្លង។ ប៉ុន្តែសេចក្ដីអំពាវនាវរបស់អាជ្ញាធរខ្មែរ នេះទំនងពុំមានប្រសិទ្ធភាពនោះទេ។ ក្រុមពលករខ្មែរជាអ្នកធ្វើចំណាក់ស្រុកទាំងនោះលើកហេតុផលថា ការងារនៅក្នុងស្រុកខ្មែរតូចចង្អៀត និងទទួលបានប្រាក់កម្រៃទាបខុសពីការងារដែលពួកគេធ្វើនៅក្នុងស្រុកថៃ ហើយបញ្ហានេះគេកត់សម្គាល់ឃើញថា លំហូរពលករខ្មែរនៅតែបន្តឆ្លងដែនខុសច្បាប់ចូលទៅការងារធ្វើនៅស្រុកថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។