ពលករខ្មែរមកពីគ្រប់ខេត្តក្រុងទូទាំងប្រទេសរាប់ពាន់នាក់ នាំគ្នាសម្រុកត្រឡប់ទៅធ្វើការងារនៅប្រទេសថៃ តាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ជាបន្តបន្ទាប់ គឺបន្ទាប់ពីពួកគេបានមកលេងបុណ្យចូលឆ្នាំប្រពៃណីជាតិនៅឯស្រុកកំណើតមក។ សមត្ថកិច្ចច្រកទ្វារអន្តរជាតិប៉ោយប៉ែត បញ្ជាក់ថា ពលករត្រឡប់ទៅធ្វើការនៅប្រទេសថៃវិញនេះ មានចំនួនច្រើនប្រហាក់ប្រហែលនឹងពេលវិលត្រឡប់នៅថ្ងៃបុណ្យសំខាន់ៗរបស់ជាតិកាលពីឆ្នាំកន្លងទៅ។
ចាប់តាំងពីចប់បុណ្យចូលឆ្នាំប្រពៃណីខ្មែរនៅថ្ងៃទី១៧ មេសា មក គឺនៅម៉ោងប្រមាណ ៦ព្រឹករហូតដល់រសៀល នៅតាមដងផ្លូវជាតិលេខ៥ ចាប់ពីមុខវត្តប៉ាលេលេយ្យ ក្រុងប៉ោយប៉ែត រហូតដល់ច្រកទ្វារអន្តរជាតិ គេសង្កេតឃើញមានពលករខ្មែរក្មេងចាស់ប្រុសស្រីរាប់ពាន់នាក់ ខ្លះអង្គុយខ្លះដើរជាក្រុមៗ ដោយមានបង្វេចកាបូបខោអាវសំពីងសំពោងស្ទើរពាសពេញផ្លូវ ដើម្បីត្រៀមទៅបំពេញបែបបទចូលទៅប្រទេសថៃ រៀងៗខ្លួន។
ក្រុមពលករខ្មែរមកពីស្រុកភ្នំស្រុក ខេត្តបន្ទាយមានជ័យ ថ្លែងប្រាប់ខណៈអង្គុយចាំគ្នាតាមដងផ្លូវនៅក្បែររង្វង់មូលក្រុងប៉ោយប៉ែត ឲ្យដឹងថា ពួកគេមានគ្នា ១៩នាក់ត្រៀមទៅបំពេញបែបបទចេញទៅធ្វើការជាកម្មករដាំដើមឈើនៅខេត្តប្រាចិនបូរី ប្រទេសថៃ ដោយទទួលប្រាក់ឈ្នួលម្នាក់ ៣០០បាត ឬប្រមាណ ៣ម៉ឺន ៧ពាន់រៀលក្នុងមួយថ្ងៃ។ ពួកគេថ្លែងបន្តថា ហេតុដែលនាំគ្នាទៅធ្វើនៅប្រទេសថៃ ដោយសារនៅស្រុកខ្មែរគ្មានការងារធ្វើ ហើយម្យ៉ាងធ្វើស្រែចម្ការនៅឯស្រុកកំណើតមិនអាចមានប្រាក់គ្រប់គ្រាន់ដោះស្រាយផ្គត់ផ្គង់ជីវភាពបាន៖ «ពីផ្សាររោងខ្លឿជាប់ជាយដែនខ្មែរនេះទៅប្រហែលជាងមួយម៉ោងដល់កន្លែងធ្វើការរបស់ខ្ញុំហើយ។ថ្លៃធ្វើដំណើរតាំងពីផ្ទះរហូតដល់កន្លែងការងារ និងថ្លៃឯកសារអស់ប្រមាណ ១៦០០បាតថៃ។ ខ្ញុំទៅថៃ ២នាក់កូន ហើយអង្គុយចាំធ្វើប័ណ្ណឆ្លងដែនប្រមាណ ២ម៉ោងហើយ»។
ស្រដៀងគ្នានេះដែរ ពលករខ្មែរមកខេត្តកំពង់ស្ពឺ មួយក្រុមទៀតថ្លែងថា ពួកគេមានគ្នាចំនួនជាង ១០នាក់ធ្វើដំណើរមកពីស្រុកកំណើតនៅខេត្តកំពង់ស្ពឺ តាំងពីថ្ងៃទី១៧ មេសា ដើម្បីត្រៀមចេញទៅធ្វើការជាកម្មកររោងចក្រទឹកកកនៅស្រះកែវ ប្រទេសថៃ។ ពួកគេបន្តថា មិនចង់ទៅធ្វើការងារនៅក្រៅប្រទេសទេ ប៉ុន្តែដោយសារនៅស្រុកកំណើតគ្មានមុខរបររកស៊ីចិញ្ចឹមជីវិត និងក្រុមគ្រួសារក៏សម្រេចចិត្តនាំគ្នាទៅធ្វើការនៅស្រុកគេទាំងប្រថុយប្រថាន៖ «ខ្ញុំទើបតែមកធ្វើប័ណ្ណឆ្លងដែនទេ ទាល់ពេលរសៀលថ្ងៃស្អែកបានចេញទៅប្រទេសថៃ។ ខ្ញុំ (ទៅ) ប្រទេសថៃ លើកនេះបើកាក់កបខ្ញុំនឹងបន្តធ្វើការនៅទីនោះមួយរយៈ តែបើរកប្រាក់មិនបានទេ ខ្ញុំនឹងត្រឡប់មកវិញក្នុងពេលឆាប់ៗ»។
ទាក់ទងនឹងបញ្ហានេះដែរ នាយប៉ុស្តិ៍នគរបាលអន្តោប្រវេសន៍ប្រចាំច្រកទ្វារអន្តរជាតិប៉ោយប៉ែត លោក ស៊ឹម សំអាត មានប្រសាសន៍បញ្ជាក់ថា ពលករខ្មែរដែលទៅធ្វើការងារនៅប្រទេសថៃ តាមច្រកទ្វារអន្តជាតិប៉ោយប៉ែត មកពីគ្រប់ខេត្តក្រុងទូទាំងប្រទេស ហើយភាគច្រើនទៅធ្វើការដោយស្របច្បាប់។ លោកបន្តថា ពលករចាប់ផ្ដើមសម្រុកទៅប្រទេសថៃ ខ្លាំងប្រមាណ ១សប្ដាហ៍ គឺបន្ទាប់ពីបុណ្យចូលឆ្នាំខ្មែររួច ក្នុងនោះថ្ងៃណាដែលពលករចេញទៅប្រទេសថៃ ច្រើនមានចំនួនប្រមាណ ២ពាន់នាក់ក្នុងមួយថ្ងៃ។ យ៉ាងនេះក្ដីលោកថា ចំនួនពលករដែលចេញទៅធ្វើការនៅប្រទេសថៃ ក្នុងឱកាសបុណ្យសំខាន់របស់ជាតិឆ្នាំនេះ មានចំនួនប្រហាក់ប្រហែលនឹងឆ្នាំមុនៗ៖ «អ្នកខ្លះគាត់មកដល់ប៉ោយប៉ែត តាំងពីម៉ោង ១២យប់ ដោយពួកគាត់សម្រាកនៅផ្ទះសំណាក់ និងផ្ទះបងប្អូនក្បែរនោះដើម្បីរង់ចាំចេញទៅប្រទេសថៃ។ ក្នុងនោះពលករដែលមកដល់ច្រកទ្វារច្រើននៅចន្លោះពី ៧ រហូតដល់ ១០ព្រឹក។ ចំណែកច្រកវិញយើងបើកទ្វារធ្វើការតាំងពីម៉ោង ៦ព្រឹករហូតដល់ ១០យប់បានបិទច្រក»។
ទោះយ៉ាងនេះក្ដីអ្នកស្រាវជ្រាវសង្គមលោកបណ្ឌិត កែម ឡី មានប្រសាសន៍បញ្ជាក់ថា ពលករដែលធ្វើចំណាកស្រុកទៅប្រទេសថៃនេះ ដោយសារពួកគេពុំមានការងារធ្វើនៅក្នុងស្រុក ម្យ៉ាងវិញទៀត តម្លៃប្រាក់ឈ្នួលកម្មករក្នុងស្រុកទាបជាងនៅប្រទេសថៃ ហើយជីវភាពជួបការខ្វះខាតនៅក្នុងបន្ទុកគ្រួសារ បញ្ហាទាំងនេះហើយដែលជាកត្តាជំរុញឲ្យពួកគេចេញទៅស្វែងរកការងារនៅក្រៅប្រទេស។
ទោះយ៉ាងនេះក្ដីលោកថា បញ្ហាទាំងនេះ រដ្ឋាភិបាលអាចដោះស្រាយបាន ប្រើសិនរដ្ឋាភិបាលបង្វែរការអភិវឌ្ឍពីទីប្រជុំជនទៅជនបទឲ្យបានច្រើន ហើយពង្រីកផ្នែកកសិឧស្សាហកម្មនៅតាមជាយដែន និងផ្ដល់ប្រាក់ខែអប្បបរិមាណកម្មករឲ្យខ្ពស់ជាងពេលបច្ចុប្បន្ន ឬឲ្យប្រហាក់ប្រហែលប្រទេសជិតខាងជាដើម៖ «ដោយតែយើងពុំមានការអភិវឌ្ឍតំបន់ជនបទ និងពុំមានគោលនយោបាយអភិវឌ្ឍន៍សម្រាប់ជនក្រីក្រ និងជនងាយរងគ្រោះ ធ្វើឲ្យប្រជាពលរដ្ឋគ្មានជម្រើសកាន់តែច្រើនឡើង។ បញ្ហានេះប្រសិនបើរដ្ឋាភិបាលពុំមានយុទ្ធសាស្ត្រអ្វីទប់ស្កាត់ទេ នោះកំណើនពលករចំណាកស្រុកនឹងនៅតែបន្តទៅមុខទៀត»។
សមត្ថកិច្ចច្រកប្រចាំទ្វារអន្តរជាតិប៉ោយប៉ែត រំពឹងថា ចំនួនពលករខ្មែរដែលទៅធ្វើការងារនៅប្រទេសថៃ ហើយធ្វើដំណើរតាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ក្រោយពីបុណ្យចូលឆ្នាំខ្មែរឆ្នាំនេះ រហូតដល់ចុងខែមេសា ឆ្នាំ២០១៥ អាចមានចំនួនប្រមាណ ២ម៉ឺននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។