ក្រុមហ៊ុនបញ្ជាទិញសម្លៀកបំពាក់ លេវ៉ាយ ស្ត្រស (Levi Strauss) ប្រកាសបន្ថយការបញ្ជាទិញផលិតផលកាត់ដេរពីរោងចក្រនានានៅកម្ពុជា បន្ទាប់ពីមានសកម្មភាពបង្ក្រាបហិង្សារបស់អាជ្ញាធរកម្ពុជា ទៅលើក្រុមកម្មករកម្មការិនី ដែលតវ៉ាទាមទារដំឡើងប្រាក់ខែគោល ១៦០ដុល្លារក្នុងមួយខែ។
ប្រភពព័ត៌មាន Frontiers ដែលបានដកស្រង់ប្រសាសន៍អ្នកនាំពាក្យក្រុមហ៊ុនបញ្ជាទិញសម្លៀកបំពាក់ លេវ៉ាយ ស្ត្រស អ្នកស្រី អេមប៊័រ ម៉ាក់កាស់លែន (Amber McCasland) ឲ្យដឹងថា ប្រការដែលក្រុមហ៊ុនអ្នកស្រីកាត់បន្ថយការបញ្ជាទិញសម្លៀកបំពាក់ពីកម្ពុជា នេះ គឺចង់ឲ្យមានការធានាសុវត្ថិភាព និងស្ថិរភាពរបស់កម្មកររោងចក្រ ជាពិសេសគឺគាំទ្រចំពោះកិច្ចប្រជុំពិភាក្សាកាលពីពេលថ្មីៗនេះ រវាងភាគីរដ្ឋាភិបាលកម្ពុជា ក្រុមអ្នកបញ្ជាទិញម៉ាកល្បីៗនៅលើពិភពលោក និងសហជីពអន្តរជាតិ ដើម្បីឈានដល់កិច្ចព្រមព្រៀងមួយ ប្រកាសអំពីប្រាក់ខែអប្បបរមាថ្មីរបស់កម្មករឲ្យបានឆាប់ៗខាងមុខនេះ។
ក្រុមអ្នកបញ្ជាទិញ និងសហជីពអន្តរជាតិ ព្រមានថា កម្ពុជា អាចនឹងមានផលអាក្រក់នៅពេលខាងមុខ ប្រសិនបើការគាបសង្កត់កម្មករ ការចាប់កម្មករឃុំនៅតែបន្តកើតមាន ហើយមិនព្រមដោះស្រាយដូចពេលបច្ចុប្បន្ន។ ចំណែកមន្ត្រីជំនាញនៃក្រសួងការងារ និងបណ្ដុះបណ្ដាលវិជ្ជាជីវៈ ក៏បានទទួលស្គាល់ថា គិតចាប់ពីមានបញ្ហាក្នុងរយៈពេល ២ខែចុងក្រោយ នៅចុងឆ្នាំ២០១៣ និងដើមឆ្នាំ២០១៤ កម្ពុជា បានខាតបង់ការនាំចេញលើវិស័យវាយនភណ្ឌកាត់ដេរនេះចំនួនទឹកប្រាក់ជាង ៥០០លានដុល្លារសហរដ្ឋអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។