និស្សិតពេទ្យប្រមាណ៣០នាក់ នៃវិទ្យាស្ថានវិទ្យាសាស្ត្រអន្តរជាតិ តវ៉ាជាថ្មីម្តងទៀតនៅមុខសាលា ក្នុងសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ នៅព្រឹកថ្ងៃទី២៤ វិច្ឆិកា។ ពួកគេទាំងនោះទាមទារឲ្យខាងសាលា គោរពតាមកិច្ចសន្យា ដោយឲ្យពួកគេចុះកម្មសិក្សា អនុវត្តទ្រឹស្ដីដែលពួកគេបានរៀន។ ប៉ុន្តែអ្នកគ្រប់គ្រងសាលាបញ្ជាក់ថា ការយឺតយ៉ាវចុះកម្មសិក្សានោះ មិនមែនជាកំហុសរបស់សាលាឡើយ ព្រោះក្រសួងពាក់ព័ន្ធ នៅមិនទាន់ចេញលិខិតអនុញ្ញាត ឲ្យពួកគេចុះកម្មសិក្សានៅឡើយ។
ជំនួបចរចាគ្នា រវាងភាគីសាលានិងនិស្សិតពេទ្យ នៅមិនទាន់ត្រូវរ៉ូវគ្នានៅឡើយ បើទោះបី មានការជួយសម្របសម្រួល ពីមន្ត្រីតំណាងក្រសួងការងារ និងបណ្ដុះបណ្ដាលវិជ្ជាជីវៈ និងអាជ្ញាធរ មូលដ្ឋាន។
ភាគីជម្លោះទាំងពីរ ជួបចរចាគ្នាកាលពីព្រឹកថ្ងៃទី២៤ វិច្ឆិកា បន្ទាប់ពីនិស្សិតពេទ្យ មិនចូលរៀន ហើយឈរលើកប៉ាដាតវ៉ានៅមុខសាលា ដើម្បីទាមទារលក្ខខណ្ឌ៣ចំណុច។
លក្ខខណ្ឌទាំងនោះរួមមាន ឲ្យខាងសាលាធ្វើតាមសន្យាជាមួយពួកគេ ដោយត្រូវឲ្យសិស្សចុះកម្មសិក្សា ឬចុះស្តាតាមមន្ទីរពេទ្យនានា។ ការបង់លុយ៦០ដុល្លារទៅឲ្យសាលា ដើម្បីអាចចុះស្តារ នៅតាមមន្ទីរពេទ្យ និងបង្កើនគុណភាពនិងពេលវេលាសិក្សាឲ្យបានត្រឹមត្រូវ។
និស្សិតរៀនឆ្នាំទី៣ ផ្នែកវេជ្ជសាស្ត្រយុវជន ថន រដ្ឋា ដែលជាតំណាងក្រុមនិស្សិតតវ៉ា បញ្ជាក់ថា ពួកគេមានការសង្ស័យថា វិទ្យាស្ថានវិទ្យាសាស្ត្រអន្តរជាតិ នោះមិនស្របច្បាប់ ឬគ្មានការអនុញ្ញាត ត្រឹមត្រូវពីក្រសួងសុខាភិបាល ទើបខាងក្រសួង មិនព្រមទម្លាក់ឈ្មោះ ឲ្យពួកគេចុះទៅធ្វើកម្មសិក្សា នៅតាមមន្ទីរពេទ្យនានា៖ «ពួកយើងមិនចូលរៀនដាច់ខាត លុះមានដំណោះស្រាយប្រឡងធ្វើអីបើសិនបើប្រឡងនឹងស្រង់ឈ្មោះសិស្សអវត្តមាន គាបយកលុយពុករលួយទៀត អញ្ចឹងយើងមិនទាន់ធ្វើអាណឹងទេ គឺយើងឲ្យមានដំណោះស្រាយពីក្រសួងអប់រំយុវជននិងកីឡា និងក្រសួងសុខាភិបាលសិនបានយើងចូលរៀនទៅវិញដើម្បីឲ្យដឹងថាសាលាស្របច្បាប់ឬអត់ស្របច្បាប់ បើសាលាអត់ស្របច្បាប់ចេះតែរៀនទៀតពួកយើងមានន័យអីប្រឡងបានន័យអី អញ្ចឹងពេលវេលាយើងមកសិក្សានឹងកាន់តែច្រើនៗ អញ្ចឹងបានប្រយោជន៍អី»។
និស្សិតពេទ្យប្រមាណ៣០នាក់ ដែលរៀនផ្នែកបរិញ្ញាបត្ររងគិលានុបដ្ឋាក តាំងពីឆ្នាំទី១ រហូត ដល់ឆ្នាំទី៣ហើយ មិនទាន់បានចុះស្តារនៅតាមមន្ទីរពេទ្យ ដោយខាងសាលាចេះតែដោះសារ ពន្យាពេលរហូត ទើបពួកគេសង្ស័យពីការគ្មានអាជ្ញាប័ណ្ណរបស់សាលានោះ។
យោងតាមលិខិតរបស់ក្រសួងសុខាភិបាល ចុះហត្ថលេខាដោយលោក ធា គ្រុយ ជារដ្ឋលេខាធិកា ក្រសួងដែលភ្ជួរជាប់នឹងជញ្ជាំងសាលា បង្ហាញថាក្រសួងបានអនុញ្ញាតឲ្យ វិទ្យាស្ថានវិទ្យាសាស្ត្រអន្តរជាតិបើកបណ្ដុះបណ្ដាល ថ្នាក់បរិញ្ញាបត្ររងគិលានុបដ្ឋាកចាប់ពីឆ្នាំសិក្សា២០១៣-២០១៤ តទៅ។ តែបើតាមការអះអាងរបស់ក្រុមនិស្សិត ពួកគេបានចូលរៀនជំនាញនេះ តាំងពីថ្ងៃទី១ ខែមករា ឆ្នាំ២០១២ គឺមុនពេលដែល ក្រសួងសុខាភិបាលផ្ដល់អាជ្ញាប័ណ្ណឲ្យសាលានេះទៅទៀត។ ជាក់ស្ដែងគិតត្រឹមចុងឆ្នាំ២០១៤ នេះ ពួកគេបានរៀនឆ្នាំទី៣ទៅហើយ។
ជុំវិញបញ្ហានេះ នាយកវិទ្យាស្ថានវិទ្យាសាស្ត្រអន្តរជាតិ លោក ហាក់ ចាន់នី មិនបានពន្យល់ពីមូលហេតុដែលសិស្សចូលរៀនមុនមានអាជ្ញាប័ណ្ណនោះទេ។
តែលោកបញ្ជាក់ថា ការយឺតយ៉ាវឲ្យសិស្សចុះស្តារនោះ មិនមែនជាកំហុសរបស់សាលាឡើយ តែក្រសួងពាក់ព័ន្ធ នៅមិនទាន់ចេញលិខិតអនុញ្ញាត ឲ្យពួកគេចុះកម្មសិក្សានៅឡើយ៖ «យើងចង់តែបញ្ជូនទៅទេសាលា ប្រឹងណាស់ចង់ឲ្យតែលឿនព្រោះដើម្បីអី ព្រោះសាលាឯកជនមិនមែនសាលារដ្ឋទេ។ សាលាឯកជនប្រឹងធ្វើម៉េចឲ្យបានសិស្សមករៀនច្រើន ចេញស្តារមានការងារធ្វើបានសិស្សល្បីកើត បើសិនជាសាលានៅតែរកេតរកូតអញ្ចឹងអ្នកចូលរៀនថ្មីមាននរណាចូលរៀន»។
ក្រុមនិស្សិតពេទ្យទាំងនោះ អះអាងថាពួកគេនឹងតវ៉ារហូតដល់មានដំណោះស្រាយ និងស្នើសុំឲ្យ អង្គភាពប្រឆាំងអំពើពុករលួយ និងក្រសួងពាក់ព័ន្ធទាំងអស់ ចុះស៊ើបអង្កេតពីភាពមិនប្រក្រតីមួយចំនួន នៅក្នុងវិទ្យាស្ថានវិទ្យាសាស្ត្រអន្តរជាតិនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។