បុគ្គលិកក្រុមហ៊ុនអឹមហ្វូន ជាង ២០០នាក់ តំណាងឲ្យបុគ្គលិកជាង ១ពាន់នាក់ នៅថ្ងៃទី១៧ មីនា លើកបដាស្រែកទាមទារ និងអំពាវនាវឲ្យស្ថាប័នពាក់ព័ន្ធជួយអន្តរាគមន៍ ដើម្បីឲ្យថៅកែផ្តល់ប្រាក់បំណាច់ និងប្រាក់អតីតភាពការងារជូនកម្មករឲ្យបានឆាប់រហ័ស។
អតីតនាយកគ្រប់គ្រងទ្រព្យសម្បត្តិ និងជាតំណាងបុគ្គលិកក្រុមហ៊ុនអឹមហ្វូន លោក ផាន់ ឌឿន មានប្រសាសន៍ថា បុគ្គលិកទាំងអស់មានបំណងស្នើឲ្យក្រុមហ៊ុន និងអាជ្ញាធរពាក់ព័ន្ធផ្តល់សំណងដល់ពួកគេ ផ្អែកលើច្បាប់ការងារ។ លោកបន្តថា តាំងពីក្រុមហ៊ុនសម្រេចព្យួរការងារបុគ្គលិករួចមក បុគ្គលិកទាំងនេះមានការលំបាកខ្លាំងផ្នែកជីវភាព ដោយសារត្រូវបង់ថ្លៃផ្ទះ ថ្លៃទឹកភ្លើង និងសោហ៊ុយចំណាយស្វែងរកការងារធ្វើបន្តទៀតផង។
លោកបញ្ជាក់ថា បុគ្គលិកក្រុមហ៊ុនទាំងអស់នឹងបន្តធ្វើកូដកម្មទៀត ដរាបណាមានដំណោះស្រាយ៖ «មិនអាចរង់ចាំនីតិវិធីដែលពួកគាត់ធ្វើទេ យើងរង់ចាំឲ្យយូរបំផុតនៅថ្ងៃទី២៨ មីនា យើងត្រូវការជីវភាពរស់នៅ សុំឲ្យមានអន្តរាគមន៍។ អីចឹងអ្វីដែលគាត់ចេះតែពន្យារពេលហ្នឹង សុំឲ្យមានអន្តរាគមន៍ពីសំណាក់ស្ថានទូតថៃ ក៏ដោយ សិង្ហបុរី ក៏ដោយ ដើម្បីពន្លឿនឲ្យមានសំណង»។
លោក ផាន់ ឌឿន បន្តថា បុគ្គលិកទាំងអស់ស្នើឲ្យក្រុមហ៊ុនរំសាយបុគ្គលិកឲ្យបានឆាប់ ដើម្បីទូទាត់សំណងជាប្រាក់អតីតភាពការងារ និងប្រាក់បំណាច់ផ្សេងៗទៀត ជូនកម្មករនិយោជិត។
អគ្គលេខាធិការសហព័ន្ធសហជីពសំឡេងយុវជនខ្មែរ លោក អន សាខន ឲ្យដឹងថា ភាគីសហជីពបានអន្តរាគមន៍ដាក់លិខិតទៅក្រសួងសង្គមកិច្ចរួចហើយ ដើម្បីស្នើឲ្យមានកិច្ចចរចាផ្តល់សំណងជូនបុគ្គលិកកម្មករ។ លោកបន្តថា តាមច្បាប់ស្ដីពីការងារ ក្រុមហ៊ុនមានតួនាទីចេញសំណងឲ្យកម្មករលើករណីមួយចំនួន ដូចជា ប្រាក់អតីតភាពការងារ ប្រាក់បំណាច់ និងប្រាក់បណ្ដេញចេញពីការងារជាដើម ប៉ុន្តែក្រុមហ៊ុនបែរជាជ្រើសរើសយកវិធីព្យួរការងារបុគ្គលិក ដោយអូសបន្លាយពេលវេលាទៅវិញ។
លោក អន សាខន៖ «គាត់មិនរង់ចាំច្បាប់ក្ស័យធន និងជម្រះបញ្ជីផ្លូវតុលាការទេ គាត់ទាមទារមុន ចំពោះម្ចាស់បំណុលផ្សេងៗ គាត់ត្រូវរង់ចាំការសម្រេចពីតុលាការសិន គាត់ស្នើឲ្យក្រុមហ៊ុនផ្តល់ប្រាក់ឲ្យគាត់ តែមិនទាន់មានការកោះប្រជុំណាមួយនោះទេ»។
បុគ្គលិកក្រុមហ៊ុនអឹមហ្វូន ដែលចូលរួមកូដកម្ម មានតួនាទីចាប់ពីកម្មកររហូតដល់បុគ្គលិកជាន់ខ្ពស់ថ្នាក់នាយកផ្នែក ដែលមានប្រាក់បៀវត្សប្រចាំខែចាប់ពីជាង ១០០ដុល្លារ រហូតដល់ជាង ១ពាន់ដុល្លារ។ ប៉ុន្តែកូដកម្មនេះមិនត្រូវបានតំណាងថៅកែក្រុមហ៊ុនចេញមកដោះស្រាយនៅឡើយ។
តាមរយៈដីកាសម្រេចរបស់សាលាដំបូងរាជធានីភ្នំពេញ កាលពីថ្ងៃទី១៤ កុម្ភៈ បានប្រកាសបើកសំណុំរឿងស្នើសុំក្ស័យធនរបស់ប្រធានក្រុមហ៊ុនអឹមហ្វូន ដោយសំអាងលើរបាយការណ៍មេធាវីក្រុមហ៊ុនដែលបញ្ជាក់ពីការខាតបង់ថា ក្រុមហ៊ុនអឹមហ្វូន ខាតបង់ជាបន្តបន្ទាប់ចាប់ពីត្រីមាសទី៣ ឆ្នាំ២០០៩ ហើយមានលំហូរសាច់ប្រាក់អវិជ្ជមានតាំងពីឆ្នាំ២០១២។ ដីកាតុលាការលើកឡើងថា ក្រុមហ៊ុនខាតបង់ទឹកប្រាក់អស់ជាង ៦៧លានដុល្លារ និងបំណុលមានជាង ១២៦លានដុល្លារ ហើយមានសាច់ប្រាក់បណ្ដោះអាសន្នក្នុងដៃតែជិត ៦សែនដុល្លារ។ ប៉ុន្តែតុលាការមិនបានបញ្ជាក់ថា ទ្រព្យសម្បត្តិក្រុមហ៊ុនមានចំនួនប៉ុន្មាននោះទេ។ តុលាការក៏បានបញ្ជាឲ្យលើកបញ្ហាបីចំណុច ទី១ ប្រកាសបើកសំណុំរឿងក្ស័យធន ទី២ បង្គាប់ឲ្យជម្រះបញ្ជីក្រុមហ៊ុនភ្លាមៗ និងទី៣ តែងតាំងអភិបាលបណ្ដោះអាសន្ន។
ចំណែកចំនួនអតិថិជនជាង ៥សែននាក់ ដែលជាប្រភពចំណូលសំខាន់បំផុតរបស់ក្រុមហ៊ុនអឹមហ្វូន បែរជាត្រូវបានផ្ទេរឲ្យក្រុមហ៊ុនម៉ូប៊ីតែល (Mobitel) ដែលស្ថិតក្រោមការគ្រប់គ្រងរបស់អ្នកឧកញ៉ា គិត ម៉េង តាំងពីខែមករា ទៅវិញ។ ក្រុមហ៊ុនទាំងពីរមិនបានប្រកាសថាការផ្ទេរអតិថិជននោះមានលក្ខខណ្ឌអ្វីខ្លះ ឬដោះដូរជាប្រាក់ប៉ុន្មាននោះទេ។ បច្ចុប្បន្ននេះ បុគ្គលិកក្រុមហ៊ុនអឹមហ្វូន មានចំនួនជាង ១ពាន់នាក់ មិនមានប្រាក់បៀវត្សផ្គត់ផ្គង់ជីវភាពឡើយ ពួកគាត់ទទួលបានប្រាក់ព្យួរការងារពីក្រុមហ៊ុនក្នុងម្នាក់ៗ ២០% សមាមាត្រទៅនឹងចំនួនបៀវត្សប្រចាំខែ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។